ಅಹಮದಾಬಾದ್ : ಭಾರತ ಹಾಗೂ ಆಸ್ಟ್ರೇಲಿಯಾ ತಂಡಗಳ ನಡುವಿನ ಟೆಸ್ಟ್ ಸರಣಿ ನಾಲ್ಕನೇ ಪಂದ್ಯದಲ್ಲಿ ಪ್ರವಾಸಿ ತಂಡದ ಆರಂಭಿಕ ಬ್ಯಾಟರ್ ಉಸ್ಮಾನ್ ಖ್ವಾಜಾ (104 ಬ್ಯಾಟಿಂಗ್) ಶತಕ ಬಾರಿಸಿದ್ದಾರೆ. ಅವರ ಅಮೋಘ ಇನಿಂಗ್ಸ್ ನೆರವಿನಿಂದ ಬಲ ಪಡೆದ ಆಸ್ಟ್ರೇಲಿಯಾ ತಂಡ ಪಂದ್ಯದ ಮೊದಲ ದಿನವಾದ ಗುರುವಾರದ ಅಂತ್ಯಕ್ಕೆ 4 ವಿಕೆಟ್ ನಷ್ಟಕ್ಕೆ 255 ರನ್ ಗಳಿಸಿದೆ. ಆಲ್ರೌಂಡರ್ ಕ್ಯಾಮೆರಾನ್ ಗ್ರೀನ್ (49) ಅರ್ಧ ಶತಕದ ಹೊಸ್ತಿಲಲ್ಲಿ ಇದ್ದಾರೆ.
ಅಹಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಮ್ನಲ್ಲಿ ನಡೆಯುತ್ತಿರುವ ಹಣಾಹಣಿಯಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ತಂಡದ ನಾಯಕ ಸ್ಟೀವ್ ಸ್ಮಿತ್ ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ನಾಯಕನ ಆಯ್ಕೆಯನ್ನು ಸಮರ್ಥಿಸಿಕೊಂಡು ಆಡಿದ ಆಸ್ಡ್ರೇಲಿಯಾದ ಆರಂಭಿಕ ಬ್ಯಾಟರ್ಗಳಾದ ಟ್ರಾವಿಸ್ ಹೆಡ್ (32) ಹಾಗೂ ಉಸ್ಮಾನ್ ಖ್ವಾಜಾ ಮೊದಲ ವಿಕೆಟ್ಗೆ 61 ರನ್ ಪೇರಿಸಿದರು. ಆದರೆ, ಟ್ರಾವಿಡ್ ಹೆಡ್ ಅವರನ್ನು ರವಿಚಂದ್ರನ್ ಅಶ್ವಿನ್ ತಮ್ಮ ಬಲೆಗೆ ಬೀಳಿಸಿದರು. ಮೂರನೇ ಕ್ರಮಾಂಕದಲ್ಲಿ ಆಡಲು ಇಳಿದ ಮರ್ನಸ್ ಲಾಬುಶೇನ್ 3 ರನ್ ಗಳಿಸುವಷ್ಟರಲ್ಲಿ ಶಮಿ ಎಸೆತಕ್ಕೆ ಕ್ಲೀನ್ ಬೌಲ್ಡ್ ಆದರು. ಹೀಗಾಗಿ ಭೋಜನ ವಿರಾಮದ ವೇಳೆಗೆ ಆಸ್ಟ್ರೇಲಿಯಾ ತಂಡ 2 ವಿಕೆಟ್ ನಷ್ಟಕ್ಕೆ 75 ರನ್ ಬಾರಿಸಿತು.
ಭೋಜನ ವಿರಾಮದ ಬಳಿಕ ನಾಯಕ ಸ್ಟೀವ್ ಸ್ಮಿತ್ (38) ದೊಡ್ಡ ಮೊತ್ತ ಪೇರಿಸುವ ಸುಳಿವು ಕೊಟ್ಟರೂ ಜಡೇಜಾ ಎಸೆತಕ್ಕೆ ಕ್ಲೀನ್ ಬೌಲ್ಡ್ ಆಗಿ ನಿರಾಸೆಯಿಂದ ನಡೆದರು. ಆದರೆ, ಖ್ವಾಜಾ ಜತೆ ಮಧ್ಯಮ ಕ್ರಮಾಂಕದಲ್ಲಿ ರನ್ ಗಳಿಕೆಗೆ ಆದ್ಯತೆ ಕೊಟ್ಟರು ಹಾಗೂ ಚಹಾ ವಿರಾಮದ ತನಕ ಮತ್ತೆ ವಿಕೆಟ್ ಉದುರದಂತೆ ನೋಡಿಕೊಂಡರು. ಆದರೆ, ಟಿ ಬ್ರೇಕ್ ಬಳಿಕ ಸ್ಮಿತ್ ಔಟಾದರು. ಅದಾದ ಬಳಿಕ ಪೀಟರ್ ಹ್ಯಾಂಡ್ಸ್ಕಾಂಬ್ 17 ರನ್ ಬಾರಿಸಿ ಶಮಿ ಎಸೆತಕ್ಕೆ ಬೌಲ್ಡ್ ಆದರು.
ಹ್ಯಾಂಡ್ಸ್ಕಾಂಬ್ ಔಟಾದ ಬಳಿಕ ಆಡಲು ಬಂದ ಕ್ಯಾಮೆರಾನ್ ಗ್ರೀನ್ 64 ಎಸೆತಗಳಲ್ಲಿ 49 ರನ್ ಬಾರಿಸಿದರು. ಇವರ ಜತೆ ಉತ್ತಮ ಜತೆಯಾಟ ನೀಡಿದ ಉಸ್ಮಾನ್ ಖ್ವಾಜಾ ದಿನದಾಟ ಮುಕ್ತಾಯಕ್ಕೆ ಮೊದಲು ಶತಕ ಬಾರಿಸಿದ ಸಂಭ್ರಮಿಸಿದರು. ಈ ಜೋಡಿ ಐದನೇ ವಿಕೆಟ್ಗೆ 85 ರನ್ ಬಾರಿಸಿದೆ.
ಇದನ್ನೂ ಓದಿ : PM Modi at Ahmedabad : ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನರೇಂದ್ರ ಮೋದಿ ಹವಾ, ಚಪ್ಪಾಳೆ ತಟ್ಟಿ ಸಂಭ್ರಮಿಸಿದ ಅಭಿಮಾನಿಗಳು
ಭಾರತ ತಂಡದ ಬೌಲಿಂಗ್ ಪರ ಮೊಹಮ್ಮದ್ ಶಮಿ 65 ರನ್ಗಳಿಗೆ 2 ವಿಕೆಟ್ ಪಡೆದರೆ, ರವಿಚಂದ್ರನ್ ಅಶ್ವಿನ್ 57 ರನ್ಗಳಿಗೆ 1 ವಿಕೆಟ್ ಪಡೆದರೆ, ರವೀಂದ್ರ ಜಡೇಜಾ 49 ರನ್ಗಳಿಗೆ 1 ವಿಕೆಟ್ ಉರುಳಿಸಿದ್ದಾರೆ.