ಕೋಲ್ಕೊತಾ: ಸುಯಾಶ್ ಶರ್ಮಾ ಯುವ ಲೆಗ್ ಸ್ಪಿನ್ನರ್ ಅನ್ನು ಐಪಿಎಲ್ಗೆ ಪರಿಚಯಿಸಿದ್ದ ಕೋಲ್ಕೊತಾ ನೈಟ್ ರೈಡರ್ಸ್ ತಂಡದ ಇದೀಗ ಒಂದೇ ಒಂದು ಟಿ20 ಪಂದ್ಯವನ್ನು ಆಡದ ಬ್ಯಾಟರ್ ಒಬ್ಬರನ್ನು ತಂಡಕ್ಕೆ ಸೇರಿಸಿಕೊಂಡಿದೆ. 20 ವರ್ಷದ ಆರ್ಯ ದೇಸಾಯಿ ಕೆಕೆಆರ್ ಬಳಗ ಸೇರಿಕೊಂಡ ಆಟಗಾರ. 20 ಲಕ್ಷ ರೂಪಾಯಿ ನೀಡಿ ಅವರನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿದೆ ಫ್ರಾಂಚೈಸಿ. ದೇಸಾಯಿ ಟಾಟಾ ಐಪಿಎಲ್ನ ಇನ್ನುಳಿದ ಪಂದ್ಯಗಳಲ್ಲಿ ಕೆಕೆಆರ್ ತಂಡವನ್ನು ಪ್ರತಿನಿಧಿಸಲಿದ್ದಾರೆ.
ಗುಜರಾತ್ ಮೂಲಕ ಆರ್ಯ ದೇಸಾಯಿ ಮೂರು ಪ್ರಥಮದರ್ಜೆ ಪಂದ್ಯಗಳನ್ನು ಗುಜರಾತ್ ತಂಡದ ಪರವಾಗಿ ಆಡಿದ್ದಾನೆ. ಒಟ್ಟು 151 ರನ್ಗಳನ್ನು ಅವರು ಬಾರಿಸಿದ್ದಾರೆ ಎಂದು ಬಿಸಿಸಿಐ ಪ್ರಕಟಣೆ ತಿಳಿಸಿದೆ.
ದೇಸಾಯಿ 2022-23ರಲ್ಲಿ ಮೂರು ರಣಜಿ ಟ್ರೋಫಿ ಪಂದ್ಯಗಳಲ್ಲಿ ಆಡಿದ್ದಾನೆ. ವಿದರ್ಭ ತಂಡದ ವಿರುದ್ಧ ಅವರು ಅರ್ಧ ಶತಕ ಕೂಡ ಬಾರಿಸಿದ್ದರು. ಆದರೆ, ಸೀಮಿತ ಓವರ್ಗಳ ಮಾದರಿಯಲ್ಲಿ ಒಂದೇ ಒಂದು ಪಂದ್ಯವನ್ನು ಅವರು ಆಡಿರಲಿಲ್ಲ.
ಕೆಕೆಆರ್ ತಂಡ ಯುವ ಆಟಗಾರರಿಗೆ ಪ್ರೋತ್ಸಾಹ ಕೊಡುವುದು ಇದೇ ಮೊದಲಲ್ಲ. ಕಳೆದ ವಾರ ಸ್ಪಿನ್ ಬೌಲರ್ ಸುಯಾಶ್ ಶರ್ಮಾಗೆ ಅವಕಾಶ ನೀಡುವ ಮೂಲಕ ಮೆಚ್ಚುಗೆ ಗಳಿಸಿತ್ತು. ಸುಯಾಶ್ ದೇಶಿಯ ಕ್ರಿಕೆಟ್ನಲ್ಲಿ ಆಡದೇ ಇರುವ ಹೊರತಾಗಿಯೂ ಆರ್ಸಿಬಿ ವಿರುದ್ಧದ ಹಣಾಹಣಿಯಲ್ಲಿ ಅವಕಾಶ ನೀಡಲಾಗಿತ್ತು. ಆ ಪಂದ್ಯದಲ್ಲಿ ಅವರು ಮೂರು ವಿಕೆಟ್ ಕಿತ್ತು ತಂಡದ 81 ರನ್ಗಳ ಅಂತರದ ವಿಜಯದಲ್ಲಿ ಪಾಲು ಪಡೆದುಕೊಂಡಿದ್ದರು.
ಚಿನ್ನದ ಹುಡುಗ ನೀರಜ್ ಚೋಪ್ರಾ ಅವರಂತೆಯೇ ಕಾಣುವ ಕೆಕೆಆರ್ನ ಈ ಸ್ಪಿನ್ನರ್ ಯಾರು?
ಕೆಕೆಆರ್ ವಿರುದ್ಧದ ಐಪಿಎಲ್ (IPL 2023 ) ಪಂದ್ಯದಲ್ಲಿ ಆರ್ಸಿಬಿ ತಂಡ ಸೋಲುವುದಕ್ಕೆ ಮೂವರು ಸ್ಪಿನ್ನರ್ಗಳು ಕಾರಣ. ವರುಣ್ ಚಕ್ರವರ್ತಿ, ಸುನೀಲ್ ನರೈಲ್ ಹಾಗೂ ಸುಯಾಶ್ ಶರ್ಮಾ. ಈ ಮೂವರಲ್ಲಿ ಪಂದ್ಯದ ವೇಳೆ ಹೆಚ್ಚು ಗಮನ ಸೆಳೆದಿದ್ದು ಸುಯಾಶ್. ಅದಕ್ಕೆ ಎರಡು ಕಾರಣವಿದೆ. ಒಂದು ಅವರ ನೋಟ. ಎರಡನೆಯದು ಅವರ ಬೌಲಿಂಗ್ ಶೈಲಿ. ನೋಟದ ವಿಚಾರದಲ್ಲಿ ಹೇಳುವುದಾದರೆ ಅವರು 2021ರ ಒಲಿಂಪಿಕ್ಸ್ನಲ್ಲಿ ಚಿನ್ನದ ಪದಕ ಗೆದ್ದಿರುವ ಜಾವೆಲಿನ್ ಎಸೆತಗಾರ ನೀರಜ್ ಚೋಪ್ರಾ ಅವರಂತೆಯೇ ಇದ್ದಾರೆ. ಕ್ಲೀನ್ ಶೇವ್, ಹೇರ್ಬ್ಯಾಂಡ್ ಹಾಕಿರುವ ಉದ್ದನೆಯ ಕೂದಲಿನ ಮೂಲಕ ಅವರು ನೀರಜ್ ಅವರಂತೆಯೇ ಕಾಣುತ್ತಾರೆ. ಬಲಗೈ ಲೆಗ್ಸ್ಪಿನ್ನರ್ ಆಗಿರುವ ಅವರ ಬೌಲಿಂಗ್ ಶೈಲಿಯೂ ವಿಭಿನ್ನವಾಗಿದೆ. ಅಸಾಂಪ್ರದಾಯಿಕ ಬೌಲಿಂಗ್ ಮೂಲಕ ಬ್ಯಾಟರ್ಗಳ ಏಕಾಗ್ರತೆಯನ್ನು ಕಂಗೆಡಿಸುವ ಶೈಲಿ ಅವರದ್ದು. ಹೀಗಾಗಿ ಪಂದ್ಯದುದ್ದಕ್ಕೂ ಅವರು ಕ್ರಿಕೆಟ್ ಪ್ರೇಮಿಗಳ ಗಮನ ಸೆಳೆದರು.
ಸುಯಾಶ್ ಶರ್ಮಾ ಪಂದ್ಯದಲ್ಲಿ ನಾಲ್ಕು ಓವರ್ಗಳನ್ನು ಎಸೆದಿದ್ದಾರೆ. 30 ರನ್ ನೀಡಿರುವರ ಅವರು ಪ್ರಮುಖ 3 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಈ ಮೂಲಕ ಪದಾರ್ಪಣೆ ಪಂದ್ಯದಲ್ಲಿಯೇ ಅತ್ಯುತ್ತಮ ಸಾಧನೆ ಮಾಡಿದ ಬೌಲರ್ ಎಂಬ ಗರಿಮೆ ತನ್ನದಾಗಿಸಿಕೊಂಡಿದ್ದಾರೆ. ವಿಶೇಷ ಎಂದರೆ ಸುಯಾಶ್ ಕಣಕ್ಕೆ ಇಳಿದಿದ್ದು ಇಂಪ್ಯಾಕ್ಟ್ ಪ್ಲೇಯರ್ ಆಗಿ. ಮೊದಲು ಬ್ಯಾಟ್ ಮಾಡಿದ್ದ ಕೆಕೆಆರ್ ತಂಡ 204 ರನ್ಗಳ ಬೃಹತ್ ಮೊತ್ತ ಪೇರಿಸಿತ್ತು. ಬ್ಯಾಟ್ ಮಾಡುವ ವೇಳೆ ಪಿಚ್ ಸ್ಪಿನ್ಗೆ ನೆರವಾಗುವುದನ್ನು ಗುರುತಿಸಿದ್ದ ಕೆಕೆಆರ್ ತಂಡ ಆಲ್ರೌಂಡರ್ ವೆಂಕಟೇಶ್ ಅಯ್ಯರ್ ಅವರ ಬದಲಿಗೆ ಸ್ಪಿನ್ನರ್ ಸುಯಾಶ್ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದಾರೆ. ಸಿಕ್ಕಿರುವ ಅವಕಾಶವನ್ನು ಸದ್ಬಳಕೆ ಮಾಡಿಕೊಂಡ ಅವರು ಮೂರು ವಿಕೆಟ್ ತಮ್ಮದಾಗಿಸಿಕೊಂಡರು.
ಲಿಸ್ಟ್ ಎ ಪಂದ್ಯವೂ ಆಡಿಲ್ಲ ಸುಯಾಶ್
ಸುಯಾಶ್ ಶರ್ಮಾ ಬೌಲಿಂಗ್‌ನಿಂದ ಕೇವಲ ಕೆಕೆಆರ್‌ಗೆ ಮಾತ್ರವಲ್ಲ ಇಡೀ ಐಪಿಎಲ್ ಟೂರ್ನಿಯ ಎಲ್ಲಾ ತಂಡಗಳಿಗೂ ಅಚ್ಚರಿಯಾಗಿದೆ. ಯಾಕೆಂದರೆ, ಅವರು ಒಂದೇ ಒಂದು ಲಿಸ್ಟ್ ‘ಎ’ ಪಂದ್ಯವಾಗಲಿ, ಪ್ರಥಮ ದರ್ಜೆ ಪಂದ್ಯವಾಗಲಿ ಅಥವಾ ದೇಶಿ ಕ್ರಿಕೆಟ್ನಲ್ಲಿ ಒಂದೇ ಒಂದು ಪಂದ್ಯವನ್ನು ಆಡಿಲ್ಲ. ನೇರವಾಗಿ ಐಪಿಎಲ್ಗೆ ಪ್ರವೇಶ ಪಡೆದುಕೊಂಡು ಗಮನ ಸೆಳೆದಿದ್ದಾರೆ.
ಇದನ್ನೂ ಓದಿ : IPL 2023 : ಬೆಂಗಳೂರಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಅಭ್ಯಾಸ ವೀಕ್ಷಿಸಿದ ರಿಷಭ್ ಪಂತ್
2023ರ ಐಪಿಎಲ್ ಟೂರ್ನಿಯ ಮಿನಿ ಹರಾಜಿನಲ್ಲಿ ಸುಯಾಶ್ ಶರ್ಮಾ ಅವರನ್ನು ಕೋಲ್ಕತಾ ಫ್ರಾಂಚೈಸಿ 20 ಲಕ್ಷ ರೂ. ಮೂಲ ಬೆಲೆಗೆ ಖರೀದಿಸಿತ್ತು. ಆ ಮೂಲಕ ಕೆಕೆಆರ್ ತಂಡದ 25 ಸದಸ್ಯರ ಬಳಗ ಸೇರಿಕೊಂಡಿದ್ದರು. ಕೆಕೆಆರ್ ಟೀಮ್ ಅಭ್ಯಾಸ ನಡೆಸುವಾಗ ಸುಯಾಶ್ ಬೌಲಿಂಗ್ ಮಾಡಿದ್ದರು. ಅವರ ವಿಭಿನ್ನ ಶೈಲಿ ಹಾಗೂ ನಿಖರತೆ ತಂಡದ ಮ್ಯಾನೇಜ್ಮೆಂಟ್ ಗಮನ ಸೆಳೆದಿತ್ತು. ಹೀಗಾಗಿ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಅವಕಾಶ ಗಿಟ್ಟಿಸಿಕೊಂಡರು.