ದೋಹಾ: ಕತಾರ್ ಫಿಫಾ ವಿಶ್ವ ಕಪ್ ಫೈನಲ್ ಪಂದ್ಯದಲ್ಲಿ ಅರ್ಜೆಂಟೀನಾ ತಂಡವು ಫ್ರಾನ್ಸ್ ವಿರುದ್ಧ ಗೆಲುವು ಸಾಧಿಸಿತು. ಈ ಗೆಲುವಿನೊಂದಿಗೆ ಬಹು ಕಾಲದ ಲಿಯೋನೆಲ್ ಮೆಸ್ಸಿಯ(Lionel Messi) ವಿಶ್ವ ಕಪ್ ಕೊರಗು ನೀಗಿತು. ಜತೆಗೆ ಮೆಸ್ಸಿ ಹಲವಾರು ದಾಖಲೆಗಳನ್ನು ಮುರಿದರು. ಇದೇ ವೇಳೆ ಸೋಶಿಯಲ್ ಮೀಡಿಯಾದಲ್ಲಿ ವಿಶ್ವ ದಾಖಲೆ ಮಾಡಿದ್ದ ಒಂದು ಮೊಟ್ಟೆಯ ಕಥೆಯೂ ಮುಗಿಯಿತು.
ಕನಸಿನ ಫಿಫಾ ವಿಶ್ವಕಪ್ ಗೆಲುವಿನ ಬಳಿಕ ಲಿಯೊನೆಲ್ ಮೆಸ್ಸಿ ಅವರು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ “ಚಾಂಪಿಯನ್ಸ್ ಆಫ್ ದಿ ವರ್ಲ್ಡ್” ಎಂಬ ಕ್ಯಾಪ್ಶನ್ ನಲ್ಲಿ ಫೋಟೊ ಹಂಚಿಕೊಂಡಿದ್ದಾರೆ. ಈ ಪೋಸ್ಟ್ ಇದೀಗ 57 ಮಿಲಿಯನ್ ಲೈಕ್ಸ್ ಪಡೆದು ವಿಶ್ವದಲ್ಲೇ ಅತಿ ಹೆಚ್ಚು ಲೈಕ್ ಪಡೆದ ಪೋಸ್ಟ್ ಎಂಬ ನೂತನ ದಾಖಲೆ ಬರೆದಿದೆ.
ಮೆಸ್ಸಿ ಹಂಚಿಕೊಂಡ ಪೋಸ್ಟ್ನಲ್ಲಿ, “ನಾನು ಅನೇಕ ಬಾರಿ ಅದರ ಬಗ್ಗೆ ಕನಸು ಕಂಡೆ. ಅದು ಈಗ ನನಸಾಗಿದೆ. ನನಗೆ ನಂಬಲಾಗಲಿಲ್ಲ. ನನ್ನ ಕುಟುಂಬ, ಬೆಂಬಲಿಗರು ಮತ್ತು ನಮ್ಮನ್ನು ನಂಬಿದ ಎಲ್ಲರಿಗೂ ಧನ್ಯವಾದಗಳು. ಅರ್ಜೆಂಟೀನಾದವರು ಒಟ್ಟಾಗಿ ಹೋರಾಡಿ ತಮ್ಮ ಗುರಿಗಳನ್ನು ತಲುಪಿದೆವು” ಎಂದು ಬರೆದುಕೊಂಡಿದ್ದಾರೆ.
ಮೆಸ್ಸಿಯ ಈ ಪೋಸ್ಟ್ ಇದೀಗ ಇನ್ಸ್ಟಾಗ್ರಾಮ್ನಲ್ಲಿ ಹೆಚ್ಚು ಇಷ್ಟಪಟ್ಟ ಪೋಸ್ಟ್ ಎಂಬ ದಾಖಲೆ ಬರೆದಿದೆ. ಇದರೊಂದಿಗೆ ಈ ಹಿಂದಿನ “ವರ್ಲ್ಡ್ ರೆಕಾರ್ಡ್ ಎಗ್” ನ ಪೋಸ್ಟ್ ದಾಖಲೆಯನ್ನು ಮುರಿದಿದೆ. ಇದುವರೆಗೆ ಮೊಟ್ಟೆಯ ಫೋಟೋ 55.8 ಮಿಲಿಯನ್ ಲೈಕ್‌ಗಳನ್ನು ಪಡೆದು ಮೊದಲ ಸ್ಥಾನದಲ್ಲಿತ್ತು.
ಫೈನಲ್‌ನಲ್ಲಿ ಅರ್ಜೆಂಟೀನಾ ಪೆನಾಲ್ಟಿ ಶೂಟೌಟ್‌ನಲ್ಲಿ 4-2 ಗೋಲುಗಳಿಂದ ಫ್ರಾನ್ಸ್ ತಂಡವನ್ನು ಸೋಲಿಸಿ ಮೂರನೇ ಬಾರಿ ವಿಶ್ವ ಕಪ್ ಗೆದ್ದ ಸಾಧನೆ ಮಾಡಿತು. ಈ ಗೆಲುವಿನ ಸಂಭ್ರಮದ ಬಳಿಕ ಮೆಸ್ಸಿ ತಾವು ವಿಶ್ವ ಕಪ್ ಟ್ರೋಫಿಯನ್ನು ಎತ್ತಿದ ಫೋಟೊವನ್ನು ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ | Fifa World Cup | ಭಾರತದಲ್ಲಿ ದಾಖಲೆ ಬರೆದ ಫಿಫಾ ವಿಶ್ವ ಕಪ್ ಫೈನಲ್ ಪಂದ್ಯ! ಡಿಜಿಟಲ್ ವೀಕ್ಷಣೆ ಎಷ್ಟು?