ಬೆಂಗಳೂರು: ಎಂ.ಎಸ್.ಧೋನಿ ನಾಯಕತ್ವದ ಚೆನ್ನೈ ಸೂಪರ್ ಕಿಂಗ್ಸ್ ದಾಖಲೆಯ 5ನೇ ಐಪಿಎಲ್ ಪ್ರಶಸ್ತಿ ಗೆದ್ದುಕೊಂಡಿದೆ. ಅದೇ ರೀತಿ ಸಿಎಸ್ಕೆ ಈಗ ಐಪಿಎಲ್ನ ಅತ್ಯಂತ ಮೌಲ್ಯಯುತ ಐಪಿಎಲ್ ಫ್ರಾಂಚೈಸಿ ಎಂಬ ಖ್ಯಾತಿ ಪಡೆದುಕೊಂಡಿದೆ. ಒಟ್ಟಾರೆಯಾಗಿ ಐಪಿಎಲ್ 2023 ಸ್ಟಾರ್ ಸ್ಪೋರ್ಟ್ಸ್ ಮತ್ತು ಜಿಯೋ ಸಿನೆಮಾದಲ್ಲಿ ದಾಖಲೆಯ ಸಂಖ್ಯೆಯ ವೀಕ್ಷಕರನ್ನು ಪಡೆಯುವ ಮೂಲಕ ಐಪಿಎಲ್ ಈಗ 26,434 ಕೋಟಿ ರೂಪಾಯಿ ಮೌಲ್ಯವನ್ನು ಪಡೆದುಕೊಂಡಿದೆ. ಹೂಡಿಕೆ ಬ್ಯಾಂಕಿಂಗ್ ಕಂಪನಿ ಹೌಲಿಹಾನ್ ಲೋಕೆ ಈ ಹೊಸ ವರದಿಯನ್ನು ಪ್ರಕಟಿಸಿದೆ.
ಎಂಎಸ್ ಧೋನಿ ಅವರು ಸಿಎಸ್ಕೆ ತಂಡದ ಪ್ರಗತಿಯ ಪ್ರೇರಕ ಅಂಶವಾಗಿದ್ದಾರೆ. ದೇಶಾದ್ಯಂತ ಅಭಿಮಾನಿಗಳನ್ನು ಹೊಂದಿರುವ ಸಿಎಸ್ಕೆ ತಂಡ ಆಡಿರುವ ಎಲ್ಲಾ ಪಂದ್ಯಗಳು ಪ್ರತಿ ಕ್ರೀಡಾಂಗಣದಲ್ಲಿ ಹೌಸ್ಫುಲ್ ಆಗಿದ್ದವು. ಇದಲ್ಲದೆ, ಅವರ ಜನಪ್ರಿಯತೆಯ ಆಧಾರದ ಮೇಲೆ ಇತರ ಫ್ರಾಂಚೈಸಿಗಳ ಮೇಲಿನ ಪ್ರಾಯೋಜಕರಿಂದ ಹೆಚ್ಚಿನ ಮೊತ್ತವನ್ನು ಪಡೆಯಲು ಸಾಧ್ಯವಾಗಿದೆ.
ಹಿಂದಿನ ವರ್ಷ 146 ಮಿಲಿಯನ್ ಡಾಲರ್ (1,206 ಕೋಟಿ ರೂಪಾಯಿ) ಗಳಿಸಿದ್ದ ಚೆನ್ನೈ ಸೂಪರ್ ಕಿಂಗ್ಸ್ ಈ ಬಾರಿ 212 ಮಿಲಿಯನ್ ಡಾಲರ್ (1751 ಕೋಟಿ ರೂಪಾಯಿ) ಮೌಲ್ಯ ಗಳಿಸಿದೆ. ಸಿಎಸ್ಕೆ ತಂಡ ಕಳೆದ ವರ್ಷದಿಂದ 45.2% ಬೆಳವಣಿಗೆಯನ್ನು ಕಂಡಿದೆ. ವಿರಾಟ್ ಕೊಹ್ಲಿ ಇರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 195 ಮಿಲಿಯನ್ ಡಾಲರ್ ಗಳಿಕೆಯೊಂದಿಗೆ (1610 ಕೋಟಿ ರೂಪಾಯಿ) ಎರಡನೇ ಸ್ಥಾನದಲ್ಲಿದೆ. ಮುಂಬೈ ಇಂಡಿಯನ್ಸ್ 190 ಮಿಲಿಯನ್ ಡಾಲರ್ (1569 ಕೋಟಿ ರೂಪಾಯಿ) ಮೌಲ್ಯದೊಂದಿಗೆ ಮೂರನೇ ಸ್ಥಾನಕ್ಕೆ ಕುಸಿದಿದೆ.
ಎಂ.ಎಸ್.ಧೋನಿ ನಾಯಕತ್ವದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಪಾಲ್ಗೊಂಡಿರುವ 14 ಆವೃತ್ತಿಗಳಲ್ಲಿ 10ನೇ ಬಾರಿ ಐಪಿಎಲ್ ಫೈನಲ್ ಪ್ರವೇಶಿಸಿದೆ. 2023ರ ಐಪಿಎಲ್ ಫೈನಲ್ ಪಂದ್ಯದಲ್ಲಿ ಸಿಎಸ್ಕೆ ತಂಡ ಗುಜರಾತ್ ಟೈಟನ್ಸ್ ವಿರುದ್ಧ 5 ವಿಕೆಟ್ಗಳ ಜಯ ಸಾಧಿಸಿ ಟ್ರೋಫಿ ಗೆದ್ದಿತ್ತು.
ಏತನ್ಮಧ್ಯೆ, ಐಪಿಎಲ್ ಬ್ರಾಂಡ್ ಮೌಲ್ಯವು 3.2 ಬಿಲಿಯನ್ ಡಾಲರ್ಗೆ (26,434 ಕೋಟಿ ರೂಪಾಯಿಗೆ) ಏರಿದೆ. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ದಾಖಲೆಯ ಐಪಿಎಲ್ ಮಾಧ್ಯಮ ಹಕ್ಕುಗಳ ಒಪ್ಪಂದವನ್ನು 48,390 ಕೋಟಿ ರೂ.ಗೆ (6.2 ಬಿಲಿಯನ್ ಡಾಲರ್) ಪಡೆಯುವುದರೊಂದಿಗೆ, ಐಪಿಎಲ್ ಬ್ರಾಂಡ್ ಮೌಲ್ಯವು 1.8 ಬಿಲಿಯನ್ ಡಾಲರ್ನಿಂದ 80% ರಷ್ಟು ಏರಿಕೆಯಾಗಿದೆ. ಇದಲ್ಲದೆ, ಐಪಿಎಲ್ ಉದ್ಯಮದ ಒಟ್ಟಾರೆ ಮೌಲ್ಯವು ಶೇಕಡಾ 80ರಷ್ಟು ಏರಿಕೆಯಾಗಿ 8.5 ಬಿಲಿಯನ್ ಡಾಲರ್ (67,734 ಕೋಟಿ ರೂಪಾಯಿಗೆ)ಗೆ ತಲುಪಿದೆ.
ಆಟಗಾರರನ್ನು ನೇಮಿಸಿಕೊಳ್ಳುವ ಅಮೆರಿಕದ ಶೈಲಿಯ ಫ್ರ್ಯಾಂಚೈಸಿ ಆಧಾರಿತ ವ್ಯವಸ್ಥೆಗಳ ಮೇಲೆ ರಚಿಸಲಾದ ಐಪಿಎಲ್, ಎನ್ಎಫ್ಎಲ್ ಮತ್ತು ಎನ್ಬಿಎಯಂಥ ಭಾರಿ ಲಾಭದಾಯಕ ಕ್ರೀಡಾ ಲೀಗ್ನಂತೆಯೇ ಖ್ಯಾತಿ ಗಳಿಸುತ್ತಿದೆ ಎಂದು ಹೌಲಿಹಾನ್ ಲೋಕೆಯ ಕಾರ್ಪೊರೇಟ್ ಮೌಲ್ಯಮಾಪನ ಸಲಹಾ ಸೇವೆಗಳ ಹಿರಿಯ ಉಪಾಧ್ಯಕ್ಷ ಹರ್ಷ ತಾಳಿಕೋಟಿ ಹೇಳಿದರು.
ಪ್ರಸಾರ ಶುಲ್ಕಕ್ಕೆ ಸಂಬಂಧಿಸಿದಂತೆ, ಐಪಿಎಲ್ ಎನ್ಎಫ್ಎಲ್ (ನ್ಯಾಷನಲ್ ಫುಟ್ಬಾಲ್ ಲೀಗ್ ಆಫ್ ಯುಎಸ್) ಗಿಂತ ಹಿಂದಿದೆ, ಇದು 35.1 ಮಿಲಿಯನ್ ಡಾಲರ್ (289 ಕೋಟಿ ರೂಪಾಯಿ) ವಿಧಿಸುತ್ತದೆ. ಐಪಿಎಲ್ ಪ್ರತಿ ಪಂದ್ಯದ ಶುಲ್ಕ 14.4 ಮಿಲಿಯನ್ ಡಾಲರ್ (118 ಕೋಟಿ ರೂಪಾಯಿಗಳಾಗಿದೆ) ಆಗಿದೆ.
ವಿಶ್ವದ ಪ್ರಮುಖ ಲೀಗ್ಗಳ ಪಂದ್ಯದ ಪ್ರಸಾರ ಶುಲ್ಕ
- ಎನ್ಎಫ್ಎಲ್: 35.1 (289 ಕೋಟಿ ರೂಪಾಯಿ)
- ಐಪಿಎಲ್: 14.4 (118 ಕೋಟಿ ರೂಪಾಯಿ)
- MLB: 10.8 (89 ಕೋಟಿ ರೂಪಾಯಿ)
- ಪ್ರೀಮಿಯರ್ ಲೀಗ್: 9.2 (75 ಕೋಟಿ ರೂಪಾಯಿ)
- ಭಾರತ ಕ್ರಿಕೆಟ್: 7.3 (60 ಕೋಟಿ ರೂಪಾಯಿ)
- ಬುಂಡೆಸ್ಲಿಗಾ: 3.8 (31 ಕೋಟಿ ರೂಪಾಯಿ)
- NBA: 2.1 (17 ಕೋಟಿ ರೂಪಾಯಿ)