ಮೊಹಾಲಿ: ಲಿಯಾಮ್ ಲಿವಿಂಗ್ ಸ್ಟನ್ (82) ಹಾಗೂ ಜಿತೇಶ್ ಶರ್ಮಾ (49) ಜೋಡಿಯ ವಿಸ್ಫೋಟಕ ಬ್ಯಾಟಿಂಗ್ ನೆರವು ಪಡೆದ ಪಂಜಾಬ್ ಕಿಂಗ್ಸ್ ತಂಡ ಐಪಿಎಲ್ 16ನೇ ಆವೃತ್ತಿಯ 46ನೇ ಪಂದ್ಯದಲ್ಲಿ ಮುಂಬಯಿ ಇಂಡಿಯನ್ಸ್ ವಿರುದ್ಧ ಮೊದಲು ಬ್ಯಾಟ್ ಮಾಡಿ 214 ರನ್ಗಳ ಬೃಹತ್ ಮೊತ್ತ ಪೇರಿಸಿತು. ಈ ಮೂಲಕ ಪ್ರವಾಸಿ ಮುಂಬಯಿ ಇಂಡಿಯನ್ಸ್ ತಂಡಕ್ಕೆ 215 ರನ್ಗಳನ್ನು ಪೇರಿಸಿ ಗೆಲ್ಲುವ ಸವಾಲು ಎದುರಾಗಿದೆ.
ಪಂಜಾಬ್ ಕ್ರಿಕೆಟ್ ಅಸೋಸಿಯೇಷನ್ ಗ್ರೌಂಡ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಮುಂಬಯಿ ಇಂಡಿಯನ್ಸ್ ತಂಡದ ನಾಯಕ ರೋಹಿತ್ ಶರ್ಮಾ ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ಪಂಜಾಬ್ ತಂಡ ನಿಗದಿತ 20 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು 214 ರನ್ ಬಾರಿಸಿತು.
ಇದನ್ನೂ ಓದಿ : IPL 2023 : ಕೆಕೆಆರ್ ವಿರುದ್ಧ ಸೋಲಿನ ಸಿಟ್ಟಿಗೆ ವಿರಾಟ್ ಕೊಹ್ಲಿ ಬೈದಿದ್ದು ಯಾರಿಗೆ?
ಮೊದಲು ಬ್ಯಾಟ್ ಮಾಡಿದ ಪಂಜಾಬ್ ಕಿಂಗ್ಸ್ ತಂಡ ಉತ್ತಮ ಆರಂಭ ಪಡೆದಿರಲಿಲ್ಲ. ಪ್ರಭ್ ಸಿಮ್ರಾನ್ ಸಿಂಗ್ 9 ರನ್ಗಳಿಗೆ ಔಟಾಗುವ ಮೂಲಕ ಹಿನ್ನಡೆ ಉಂಟಾಯಿತು. ಆದರೆ, ಮತ್ತೊಂದು ಬದಿಯಲ್ಲಿ ಶಿಖರ್ ಧವನ್ 20 ಎಸೆತಗಳಲ್ಲಿ 30 ರನ್ ಬಾರಿಸಿ ಆಧಾರವಾದರು. ಮ್ಯಾಥ್ಯೂ ಶಾರ್ಟ್ಸ್ ಸ್ವಲ್ಪ ಮಟ್ಟಿಗೆ ಅವರಿಗೆ ನೆರವಾದರು. 62 ರನ್ಗಳಿಗೆ ಪಂಜಾಬ್ ತಂಡದ ಎರಡನೇ ವಿಕೆಟ್ ಉರುಳಿದರೆ 95 ರನ್ಗಳಿಗೆ ಮೂರನೇ ವಿಕೆಟ್ ಪತನಗೊಂಡಿತು. ಅಷ್ಡರಲ್ಲಿ 1.2 ಓವರ್ಗಳು ಮುಕ್ತಾಯಗೊಂಡಿದ್ದವು.
ಅಬ್ಬರಿಸಿ ಲಿಯಾಮ್
ನಾಲ್ಕನೇ ವಿಕೆಟ್ಗೆ ಜತೆಯಾದ ಲಿಯಾಮ್ ಲಿವಿಂಗ್ಸ್ಟನ್ ಹಾಗೂ ಜಿತೇಶ್ ಶರ್ಮಾ ಅಬ್ಬರದ ಬ್ಯಾಟಿಂಗ್ ನಡೆಸಿದರು. ಅದರಲ್ಲಿ ಲಿಯಾಮ್ 7 ಫೋರ್ ಹಾಗೂ 4 ಸಿಕ್ಸರ್ಗಳ ಸಮೇತ 42 ಎಸೆತಗಳಲ್ಲಿ 82 ರನ್ ಬಾರಿಸಿದರು. 32 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದ್ ಅವರು ನಂತರದ 10 ಎಸೆತಗಳಲ್ಲಿ 32 ರನ್ ಬಾರಿಸಿದರು. ಮತ್ತೊಂದು ತುದಿಯಲ್ಲಿ ಅಷ್ಟೇ ಆಕ್ರಮಣಶೀಲತೆಯಿಂದ ಆಡಿದ ಜಿತೇಶ್ ಶರ್ಮಾ 5 ಫೋರ್, 2 ಸಿಕ್ಸರ್ಗಳ ಸಮೇತ 49 ರನ್ ಬಾರಿಸಿದರು. ಆದರೆ, ಅವರು ಒಂದು ರನ್ಗಳ ಕೊರತೆಯಿಂದ ಅರ್ಧ ಶತಕದಿಂದ ವಂಚಿತರಾದರು.
ಮುಂಬಯಿ ಪರ ಪಿಯೂಷ್ ಚಾವ್ಲಾ 29 ರನ್ ನೀಡಿ ಎರಡು ವಿಕೆಟ್ ಪಡೆದರು. ಅರ್ಶದ್ ಖಾನ್ 1 ವಿಕೆಟ್ ತಮ್ಮದಾಗಿಸಿಕೊಂಡರು.