ಬೆಂಗಳೂರು: ರಣಜಿ ಟ್ರೋಫಿ(Ranji Trophy) ಕ್ರಿಕೆಟ್‌ ಟೂರ್ನಿಯ 4 ಸೆಮಿಫೈನಲ್(ranji trophy semi final) ತಂಡಗಳು ಅಂತಿಮಗೊಂಡಿದ್ದು, ಕರ್ನಾಟಕ ತಂಡಕ್ಕೆ ಸೌರಾಷ್ಟ್ರ ಸವಾಲು ಎದುರಾಗಲಿದೆ. ಮತ್ತೊಂದು ಸೆಮೀಸ್‌ನಲ್ಲಿ ಹಾಲಿ ಚಾಂಪಿಯನ್‌ ಮಧ್ಯಪ್ರದೇಶ ಹಾಗೂ ಬಂಗಾಳ ಮುಖಾಮುಖಿಯಾಗಲಿದೆ.
8 ಬಾರಿ ಚಾಂಪಿಯನ್‌ ಕರ್ನಾಟಕ ತಂಡ ಕಳೆದ ವರ್ಷ ಕ್ವಾರ್ಟರ್‌ ಫೈನಲ್ನಲ್ಲಿಯೇ ಸೋತು ಹೊರಬಿದ್ದಿದ್ದು. ಆದರೆ ಈ ಬಾರಿ ಅಮೋಘ ಪ್ರದರ್ಶನ ನೀಡುವ ಮೂಲಕ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವಾಗಿ ಕಾಣಿಸಿಕೊಂಡಿದೆ. ಫೆ.8ರಿಂದ ಆರಂಭವಾಗಲಿರುವ ಸೆಮಿ ಕಾದಾಟದಲ್ಲಿ ಸೌರಾಷ್ಟ್ರ ವಿರುದ್ಧ ಅದೃಷ್ಟ ಪರೀಕ್ಷೆಗೆ ಇಳಿಯಲಿದೆ. ಸೌರಾಷ್ಟ್ರ ತಂಡದ ನಾಯಕ, ಪ್ರಮುಖ ವೇಗಿ ಜೈದೇವ್ ಉನಾದ್ಕತ್ ಅವರು ಆಸ್ಟ್ರೇಲಿಯಾ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾ ಪರ ಸ್ಥಾನ ಪಡೆದ ಕಾರಣ ಪ್ರಮುಖ ಪಂದ್ಯದಿಂದ ಹೊರಗುಳಿಯಲಿದ್ದಾರೆ. ಈ ಲಾಭವನ್ನು ಮಯಾಂಕ್ ಅಗರ್ವಾಲ್ ಪಡೆ ಉತ್ತಮವಾಗಿ ಬಳಸಿಕೊಳ್ಳಬೇಕಿದೆ.
ಶನಿವಾರ ಕ್ವಾರ್ಟರ್‌ ಫೈನಲ್‌ನಲ್ಲಿ ಸೌರಾಷ್ಟ್ರ ತಂಡ ಪಂಜಾಬ್‌ ವಿರುದ್ಧ 71 ರನ್‌ ಗೆಲುವು ದಾಖಲಿಸಿ ಸೆಮಿಫೈನಲ್ ಪ್ರವೇಶ ಪಡೆದಿತ್ತು. ಕಳೆದ ಬಾರಿ ಗುಂಪು ಹಂತದಲ್ಲೇ ಸೋತಿದ್ದ ಸೌರಾಷ್ಟ್ರ ಈ ಬಾರಿ ಉಪಾಂತ್ಯಕ್ಕೆ ಲಗ್ಗೆ ಇಟ್ಟಿತು. ಕರ್ನಾಟಕ ತಂಡ ಶುಕ್ರವಾರ ಉತ್ತರಾಖಂಡ ವಿರುದ್ಧ ಗೆದ್ದು ಸೆಮೀಸ್‌ಗೆ ತಲುಪಿತ್ತು. ಎಲೈಟ್‌ ‘ಸಿ’ ಗುಂಪಿನಲ್ಲಿ ಅಗ್ರಸ್ಥಾನಿಯಾಗಿದ್ದ ರಾಜ್ಯ ತಂಡ ಕ್ವಾರ್ಟರ್‌ನಲ್ಲಿ ಉತ್ತರಾಖಂಡವನ್ನು ಇನ್ನಿಂಗ್‌್ಸ ಹಾಗೂ 281 ರನ್‌ಗಳಿಂದ ಮಣಿಸಿತ್ತು.
ಇದನ್ನೂ ಓದಿ Ranji Trophy | ತ್ರಿಶತಕ ಬಾರಿಸಿ ದಾಖಲೆ ಬರೆದ ಮುಂಬೈ ಬ್ಯಾಟರ್ ಪೃಥ್ವಿ ಶಾ!
ಮಯಾಂಕ್ ಪಡೆಗೆ ತವರಿನ ಲಾಭ
ಕರ್ನಾಟಕ ಹಾಗೂ ಸೌರಾಷ್ಟ್ರ ನಡುವಿನ ಸೆಮಿಫೈನಲ್ ಪಂದ್ಯ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಗುಂಪು ಹಂತದಲ್ಲಿ ರಾಜ್ಯ ತಂಡ ಇದೇ ಕ್ರೀಡಾಂಗಣದಲ್ಲಿ 3 ಪಂದ್ಯಗಳನ್ನಾಡಿ ಮೇಲುಗೈ ಸಾದಿಸಿತ್ತು. ಆದ್ದರಿಂದ ಇದೀಗ ಸೆಮಿಫೈನಲ್ನಲ್ಲಿಯೂ ತವರಿನ ಲಾಭ ಮಯಾಂಕ್ ಪಡೆಗೆ ಲಭಿಸುವ ನಿರೀಕ್ಷೆಯಿದೆ. ಮಧ್ಯಪ್ರದೇಶ ಹಾಗೂ ಬಂಗಾಳ ನಡುವಿನ ಮತ್ತೊಂದು ಸೆಮಿಫೈನಲ್ ಪಂದ್ಯ ಇಂದೋರ್‌ನ ಹೋಲ್ಕರ್‌ ಕ್ರೀಡಾಂಗಣದಲ್ಲಿ ನಡೆಯಲಿದೆ.
ಸೆಮಿಫೈನಲ್ ವೇಳಾಪಟ್ಟಿ
ಫೆ.8-12 ಮಧ್ಯಪ್ರದೇಶ-ಬಂಗಾಳ, ಸ್ಥಳ: ಇಂದೋರ್‌
ಫೆ.8-12 ಕರ್ನಾಟಕ-ಸೌರಾಷ್ಟ್ರ, ಸ್ಥಳ: ಬೆಂಗಳೂರು