ಮುಂಬಯಿ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ (RCB) ಅಂತೂ ಇಂತೂ ಡಬ್ಲ್ಯುಪಿಎಲ್ (WPL 2023) ಉದ್ಘಾಟನಾ ಆವೃತ್ತಿಯಲ್ಲಿ ಮೊದಲ ವಿಜಯ ಕಂಡಿತು. ಬುಧವಾರ ನಡೆದ ಡಬ್ಲ್ಯುಪಿಎಲ್ನ (WPL 2023) 13ನೇ ಪಂದ್ಯದಲ್ಲಿ ಯುಪಿ ವಾರಿಯರ್ಸ್ ವಿರುದ್ಧ 5 ವಿಕೆಟ್ ಗೆಲುವು ಸಾಧಿಸುವುದರೊಂದಿಗೆ ಮರ್ಯಾದೆ ಉಳಿಸಿಕೊಂಡಿತು. ಆರಂಭಿಕ ಬ್ಯಾಟರ್ಗಳು ಇಲ್ಲೂ ವೈಫಲ್ಯ ಎದುರಿಸಿದರೂ ಕನಿಕಾ ಅಹುಜಾ 46 ರನ್ ಬಾರಿಸಿ ಗೆಲುವು ತಂದುಕೊಟ್ಟರು.
ಆರ್ಸಿಬಿ ಗೆಲುವಿನ ಸಂಭ್ರಮ ಹೀಗಿದೆ
ಇಲ್ಲಿನ ಡಿವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಹಣಾಹಣಿಯಲ್ಲಿ ಟಾಸ್ ಗೆದ್ದ ಆರ್ಸಿಬಿ ತಂಡ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಅಂತೆಯೇ ಮೊದಲು ಬ್ಯಾಟ್ ಮಾಡಿದ ಯುಪಿ ವಾರಿಯರ್ಸ್ ತಂಡ 19.3 ಓವರ್ಗಳಲ್ಲಿ 135 ರನ್ಗಳಿಗೆ ಆಲ್ಔಟ್ ಆಯಿತು. ಗುರಿ ಬೆನ್ನಟ್ಟಿದ ಸ್ಮೃತಿ ಮಂಧಾನಾ ಪಡೆ 18 ಓವರ್ಗಳಲ್ಲಿ 5 ವಿಕೆಟ್ ಕಳೆದುಕೊಂಡ 136 ರನ್ ಬಾರಿಸಿ ಗೆಲುವು ಸಾಧಿಸಿತು.
ಸಣ್ಣ ಮೊತ್ತದ ಗುರಿಯಾದರೂ ಮತ್ತೆ ಮತ್ತೆ ಆರ್ಸಿಬಿ ಪಡೆ ಬ್ಯಾಟಿಂಗ್ ವೈಫಲ್ಯ ಎದುರಿಸಿತು. ಸ್ಮೃತಿ ಮಂಧಾನ ಶೂನ್ಯಕ್ಕೆ ಔಟಾಗುವ ಮೂಲಕ ಮತ್ತೊಂದು ಬೃಹತ್ ವೈಫಲ್ಯ ಕಂಡರೆ, ಸೋಫಿ ಡಿವೈನ್ 6 ಎಸೆತಗಳಲ್ಲಿ 14 ರನ್ ಬಾರಿಸಿ ಸ್ಫೋಟಿಸುವ ಲಕ್ಷಣ ತೋರಿದರೂ, ಯುಪಿ ನಾಯಕಿ ಹೀಲಿ ಅವರ ಫೀಲ್ಡಿಂಗ್ ಯೋಜನೆಗೆ ಬಲಿಯಾದರು. ಎಲಿಸ್ ಪೆರಿ 10 ರನ್ ಬಾರಿಸಿದರೆ ಹೇದರ್ ನೈಟ್ 24 ರನ್ಗಳಿಗೆ ಔಟಾದರು.
ಕನಿಕಾ ತಿರುಗೇಟು
60 ರನ್ಗಳಿಗೆ ನಾಲ್ಕು ವಿಕೆಟ್ ಕಳೆದುಕೊಂಡು ಸಮಸ್ಯೆ ಸುಳಿಗೆ ಬಿದ್ದ ಆರ್ಸಿಬಿಯನ್ನು ಕನಿಕಾ ಅಹುಜಾ ಕಾಪಾಡಿದರು. ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಅವರು 8 ಫೋರ್ ಹಾಗೂ 1 ಸಿಕ್ಸರ್ ಸಮೇತ 46 ರನ್ ಬಾರಿಸಿದರು. ಆದರೆ, ಎಕ್ಲೆಸ್ಟೋನ್ ಎಸೆತಕ್ಕೆ ಬೌಲ್ಡ್ ಆಗುವ ಮೂಲಕ ನಾಲ್ಕು ರನ್ಗಳಿಂದ ಚೊಚ್ಚಲ ಅರ್ಧ ಶತಕ ಬಾರಿಸುವ ಅವಕಾಶ ಕಳೆದುಕೊಂಡರು. ಅವರಿಗೆ ಉತ್ತಮ ನೆರವು ಕೊಟ್ಟ ರಿಚಾ ಘೋಷ್ 31 ರನ್ ಕಲೆಹಾಕಿದರು. ಈ ಜೋಡಿ ಐದನೇ ವಿಕೆಟ್ಗೆ 60 ರನ್ ಗಳಿಸಿತು.
ಆರ್ಸಿಬಿ ಭರ್ಜರಿ ಬೌಲಿಂಗ್
ಅದಕ್ಕಿಂತ ಮೊದಲು ಟಾಸ್ ಸೋತು ಬ್ಯಾಟಿಂಗ್ಗೆ ಆಹ್ವಾನ ಪಡೆದ ಯುಪಿ ವಾರಿಯರ್ಸ್ ಬಳಗ ಆರಂಭದಲ್ಲಿ ಆಘಾತ ಎದುರಿಸಿತು. ನಾಯಕಿ ಅಲಿಸಾ ಹೀಲಿ (1) ಹಾಗೂ ದೇವಿಕಾ ವೈದ್ಯ (0) ವಿಕೆಟ್ ಪಡೆದ ಸೋಫಿ ಡಿವೈನ್ ಆರ್ಸಿಬಿಗೆ ಮುನ್ನಡೆ ಕಲ್ಪಿಸಿಕೊಟ್ಟರು. ಆದರೆ, ಮೂರನೇ ಕ್ರಮಾಂಕದಲ್ಲಿ ಆಡಲು ಬಂದ ಕಿರಣ್ ನವ್ಗಿರೆ 22 ರನ್ ಬಾರಿಸಿ ಸ್ವಲ್ಪ ಹೊತ್ತು ಕ್ರೀಸ್ ಕಾಯ್ದುಕೊಂಡರು. ನಾಲ್ಕನೇ ಕ್ರಮಾಂಕದಲ್ಲಿ ಬಂದ ತಾಹಿಲಾ ಮೆಕ್ಗ್ರಾಥ್ 2 ರನ್ಗೆ ಔಟಾದರು.
ಗ್ರೇಸ್ ಸ್ಫೋಟಕ ಬ್ಯಾಟಿಂಗ್
ಮಧ್ಯಮ ಕ್ರಮಾಂಕದಲ್ಲಿ ಆಡಲು ಇಳಿದ ಆಲ್ರೌಂಡರ್ ಗ್ರೇಸ್ ಹ್ಯಾರಿಸ್ ಸ್ಫೋಟಕ ಬ್ಯಾಟಿಂಗ್ ನಡೆಸಿದರು. 32 ಎಸೆತಗಳಲ್ಲಿ ಅವರು 46 ರನ್ ಬಾರಿಸಿ 29 ರನ್ಗಳಿಗೆ ನಾಲ್ಕು ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ತಂಡಕ್ಕೆ ನೆರವಾದರು. ದೀಪ್ತಿ ಶರ್ಮಾ ಕೂಡ 22 ರನ್ ಬಾರಿಸಿ ತಂಡದ ಮೊತ್ತ 100 ರನ್ ಗಡಿ ದಾಟುವಂತೆ ನೋಡಿಕೊಂಡರು. ಕೊನೆಯಲ್ಲಿ ಮತ್ತೆ ಬಿರುಸಿನ ದಾಳಿ ನಡೆಸಿದ ಆರ್ಸಿಬಿ ಸ್ಕೋರ್ ಗ್ರಾಫ್ ಏರದಂತೆ ನೋಡಿಕೊಂಡಿತು.