ಕೇಪ್ ಟೌನ್: ದಕ್ಷಿಣ ಆಫ್ರಿಕಾ ವಿರುದ್ಧದ ದ್ವಿತೀಯ ಹಾಗೂ ಅಂತಿಮ ಟಸ್ಟ್ ಪಂದ್ಯವನ್ನು ಗೆದ್ದು ಸರಣಿಯನ್ನು 1-1 ಸಮಬಲದೊಂದಿಗೆ ಡ್ರಾ ಗೊಳಿಸಿದ ನಾಯಕ ರೋಹಿತ್ ಶರ್ಮಾ ಅವರು ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿಯ(MS Dhoni) ದಾಖಲೆಯೊಂದನ್ನು ಸರಿಗಟ್ಟಿದ್ದಾರೆ.
ಭಾರತ ತಂಡ ದಕ್ಷಿಣ ಆಫ್ರಿಕಾದಲ್ಲಿ ಈ ಹಿಂದೆ ಆಡಿದ್ದ 8 ಟೆಸ್ಟ್ ಸರಣಿಗಳಲ್ಲಿ 7ರಲ್ಲಿ ಸೋತಿತ್ತು. 2010-11 ರಲ್ಲಿ ಏಕೈಕ ಬಾರಿ ಮಹೇಂದ್ರ ಸಿಂಗ್ ಧೋನಿ ಸಾರಥ್ಯದಲ್ಲಿ ಆಡಿದ್ದ ಮೂರು ಪಂದ್ಯಗಳ ಸರಣಿಯಲ್ಲಿ 1-1 ಸಮಬಲದ ಗೌರವ ಕಂಡಿತ್ತು. ಇದೀಗ ಆ ಸಾಧನೆಯನ್ನು ರೋಹಿತ್ ಶರ್ಮ ಸರಿಗಟ್ಟಿದ್ದಾರೆ. ಈ ಮೂಲಕ ರೋಹಿತ್ ಟೆಸ್ಟ್ ಸರಣಿ ಸೋಲಿಲ್ಲದೆ ದಕ್ಷಿಣ ಆಫ್ರಿಕಾದಿಂದ ನಿರ್ಗಮಿಸಿದ ಭಾರತದ 2ನೇ ನಾಯಕ ಎನಿಸಿದ್ದಾರೆ. 9ನೇ ಸರಣಿಯಲ್ಲಿ ಭಾರತ ಸಮಬಲ ಸಾಧಿಸಿದ್ದು ನಿಜಕ್ಕೂ ದೊಡ್ಡ ಸಾಹಸ. ಅದು ಕೂಡ ಗೆಲುವು ಕಾಣದ ಕೇಪ್ ಟೌನ್ ಮೈದಾನದಲ್ಲಿ ಸಾಧಿಸಿದ ಈ ಗೆಲುವು ಭಾರತದ ತಂಡದ ಸ್ಮರಣೀಯ ನೆನಪುಗಳ ಇತಿಹಾಸದ ಪುಟ ಸೇರಲಿದೆ.
Rohit Sharma becomes the 2nd Indian captain to draw a Test series in South Africa after MS Dhoni. 🇮🇳 pic.twitter.com/5TAQQrqyao
— Johns. (@CricCrazyJohns) January 4, 2024
ಕೇಪ್ ಟೌನ್ನಲ್ಲಿ ಮೊದಲ ಗೆಲುವು
ಪಂದ್ಯದಲ್ಲಿ 7 ವಿಕೆಟ್ಗಳ ಗೆಲುವು ಸಾಧಿಸಿದ ಭಾರತ ತಂಡ ನೂತನ ದಾಖಲೆಯೊಂದನ್ನು ತನ್ನ ಹೆಸರಿಗೆ ಬರೆದಿದೆ. ಕೇಪ್ ಟೌನ್ನಲ್ಲಿ ಟೆಸ್ಟ್ ಪಂದ್ಯ ಗೆದ್ದ ಏಷ್ಯಾದ ಮೊದಲ ತಂಡ ಎಂಬ ಹಿರಿಮೆಗೆ ಪಾತ್ರವಾಗಿದೆ. ಕೇಪ್ ಟೌನ್ನಲ್ಲಿ ಭಾರತವನ್ನು ಗೆಲ್ಲಿಸಿದ ಮೊದಲ ನಾಯಕ ಎನ್ನುವ ಕೀರ್ತಿಯೂ ರೋಹಿತ್ ಪಾಲಾಗಿದೆ.
ಇಲ್ಲಿನ ನ್ಯೂಲ್ಯಾಂಡ್ಸ್ ಮೈದಾನದಲ್ಲಿ ಬುಧವಾರ ಆರಂಭಗೊಂಡ ಈ ಟೆಸ್ಟ್ ಪಂದ್ಯ ಕೇವಲ ಎರಡನೇ ದಿನಕ್ಕೆ ಮುಕ್ತಾಯ ಕಂಡಿತು. ಗುರುವಾರ ಮೂರು ವಿಕೆಟ್ ನಷ್ಟಕ್ಕೆ 62 ರನ್ ಮತ್ತು 36 ಹಿನ್ನಡೆಯೊಂದಿಗೆ ದಿನದಾಟ ಆರಂಭಿಸಿದ ದಕ್ಷಿಣ ಆಫ್ರಿಕಾ ಐಡೆನ್ ಮಾರ್ಕ್ರಮ್ ಅವರ ಶತಕದ ಸಾಹಸದಿಂದ 176 ರನ್ಗೆ ಆಲೌಟ್ ಆಯಿತು. 79 ರನ್ ಗೆಲುವಿನ ಗುರಿ ಪಡೆದ ಭಾರತ 3 ವಿಕೆಟ್ ನಷ್ಟಕ್ಕೆ 80 ರನ್ ಬಾರಿಸಿ 7 ವಿಕೆಟ್ ಗೆಲುವು ಸಾಧಿಸಿತು. ಈ ಮೂಲಕ ಸರಣಿಯನ್ನು ಡ್ರಾದೊಂದಿಗೆ ಮುಕ್ತಾಯಗೊಳಿಸಿತು. ಮೊದಲ ಪಂದ್ಯದಲ್ಲಿ ಇನಿಂಗ್ಸ್ ಸೋಲಿಗೆ ತುತ್ತಾಗಿತ್ತು.
ಇದನ್ನೂ ಓದಿ IND vs SA 2nd Test: ಪಂದ್ಯ ಗೆದ್ದು ನೂತನ ದಾಖಲೆ ಬರೆದ ಭಾರತ ತಂಡ
🇮🇳👏 𝗔 𝗛𝗜𝗦𝗧𝗢𝗥𝗜𝗖 𝗪𝗜𝗡! Rohit Sharma's Team India stamps authority in Cape Town, rewriting history.
— The Bharat Army (@thebharatarmy) January 4, 2024
😉 In a notable feat, Rohit Sharma now stands alongside MS Dhoni as the second captain to secure a Test series draw in South Africa.
📷 Getty • #RohitSharma #ViratKohli… pic.twitter.com/FVU5byRe1N
79 ರನ್ ಚೇಸಿಂಗ್ ವೇಳೆ ಭಾರತ ಪರ ಯಶಸ್ವಿ ಜೈಸ್ವಾಲ್ ಬಿರುಸಿನ ಬ್ಯಾಟಿಂಗ್ ನಡೆಸಿ 6 ಬೌಂಡರಿ ನೆರವಿನಿಂದ 28 ರನ್ ಬಾರಿಸಿದರು. ಶುಭಮನ್ ಗಿಲ್ 10, ವಿರಾಟ್ ಕೊಹ್ಲಿ 12 ರನ್ಗೆ ವಿಕೆಟ್ ಕೈಚೆಲ್ಲಿದರು. 75 ರನ್ಗೆ ಮೂರು ವಿಕೆಟ್ ಬಿದ್ದು ಗೆಲುವಿಗೆ ಕೇವಲ 4 ರನ್ ಬೇಕಿದ್ದರೂ ಒಂದು ಕ್ಷಣ ಭಾರತೀಯ ಅಭಿಮಾನಿಗಳಲ್ಲಿ ಆತಂಕ ಸೃಷ್ಟಿಯಾಯಿತು. ಏಕೆಂದರೆ ಮೊದಲ ಇನಿಂಗ್ಸ್ನಲ್ಲಿ ಭಾರತ 153 ರನ್ಗೆ 4 ವಿಕೆಟ್ ಬಿದ್ದ ಬಳಿಕ ಒಂದೂ ರನ್ ಮಾಡದೆ 6 ವಿಕೆಟ್ ಕಳೆದುಕೊಂಡು ಆಲೌಟ್ ಆಗಿತ್ತು. ಹೀಗಾಗಿ ಅಭಿಮಾನಿಗಳಿಗೆ ಆತಂಕ ಉಂಟಾಗಿತ್ತು. ಆದರೆ ನಾಲ್ಕನೇ ವಿಕೆಟ್ಗೆ ಬಂದ ಶ್ರೇಯಸ್ ಅಯ್ಯರ್ ಬೌಂಡರಿ ಬಾರಿಸಿ ಭಾರತದ ಗೆಲುವನ್ನು ಸಾರಿದರು. ನಾಯಕ ರೋಹಿತ್ 17 ರನ್ ಬಾರಿಸಿ ಅಜೇಯಾಗಿ ಉಳಿದರು.
ಭಾರತದ ಪರ ಬಿಗು ದಾಳಿ ಸಂಘಟಿಸಿದ ಜಸ್ಪ್ರೀತ್ ಬುಮ್ರಾ 6, ಮುಖೇಶ್ ಕುಮಾರ್ 2, ಸಿರಾಜ್ ಮತ್ತು ಪ್ರಸಿದ್ಧ್ ಕೃಷ್ಣ ತಲಾ ಒಂದು ವಿಕೆಟ್ ಪಡೆದರು. ಸಿರಾಜ್ ಮೊದಲ ಇನಿಂಗ್ಸ್ನಲ್ಲಿ 15 ರನ್ಗೆ 6 ವಿಕೆಟ್ ಕಿತ್ತು ಮಿಂಚಿದ್ದರು.