ಬೆಂಗಳೂರು: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವೇಗದ ಬೌಲರ್ ಮೊಹಮ್ಮದ್ ಸಿರಾಜ್ ಸಹ ಆಟಗಾರ ಮಹಿಪಾಲ್ ಲಾಮ್ರೋರ್ ಬಳಿ ಎರಡೆರಡು ಸಲ ಕ್ಷಮೆ ಕೋರಿದ್ದಾರೆ. ಕ್ಷಮೆ ಕೋರುವ ವಿಡಿಯೊವನ್ನು ಆರ್ಸಿಬಿ ಯೂಟ್ಯೂಬ್ ಚಾನೆಲ್ನಲ್ಲಿ ಪ್ರಕಟಿಸಿದೆ. ಸಿರಾಜ್ ಕ್ಷಮೆ ಕೋರುವುದಕ್ಕೂ ಕಾರಣವಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದ ವೇಳೆ ಮೊಹಮ್ಮದ್ ಸಿರಾಜ್ ಕೋಪದಿಂದ ಲಾಮ್ರೋರ್ ಅವರನ್ನು ನಿಂದಿಸಿದ್ದರು. ಅದನ್ನು ಮುಂದುವರಿಸದೇ ಕ್ಷಮೆ ಕೋರಿ ಮುಕ್ತಾಯಗೊಳಿಸಿದ್ದಾರೆ. ಹೀಗಾಗಿ ಆರ್ಸಿಬಿ ಫ್ರಾಂಚೈಸಿ, ಈ ವಿಷಯವನ್ನು ಅಭಿಮಾನಿಗಳಿಗೆ ತಿಳಿಸುವ ಉದ್ದೇಶದಿಂದ ವಿಡಿಯೊ ಹಾಕಿದೆ.
ಜಿದ್ದಾಜಿದ್ದಿನಿಂದ ಕೂಡಿದ್ದ ಪಂದ್ಯದಲ್ಲಿ ಆರ್ಸಿಬಿ ತಂಡ ವಿಜಯ ಸಾಧಿಸಿತ್ತು. 190 ರನ್ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ 182 ರನ್ಗಳಿಗೆ ಇನಿಂಗ್ಸ್ ಮುಗಿಸಿದ ಕಾರಣ ಆರ್ಸಿಬಿಗೆ ಜಯ ಸಿಕ್ಕಿತ್ತು. ಪಂದ್ಯದ 19ನೇ ಓವರ್ ಸಿರಾಜ್ ಎಸೆದಿದ್ದರು. ಆ ಓವರ್ನ ಕೊನೇ ಎಸೆತವನ್ನು ಬ್ಯಾಟರ್ ಧ್ರುವ್ ಜುರೇಲ್ ಲಾಂಗ್ ಆನ್ ಕಡೆ ಕಳುಹಿಸಿದ್ದರು. ಅಲ್ಲಿ ಫೀಲ್ಡ್ ಮಾಡುತ್ತಿದ್ದ ಲಾಮ್ರೋರ್ ಚೆಂಡನ್ನು ವಾಪಸ್ ಎಸೆಯುವುದು ತಡವಾಯಿತು. ಹೀಗಾಗಿ ರಾಜಸ್ಥಾನ್ ತಂಡ ಎರಡು ರನ್ ಗಳಿಸಿತು. ಇದರಿಂದ ಕೋಪಗೊಂಡ ಸಿರಾಜ್ lಲಾಮ್ರೊರ್ಗೆ ನಿಂದಿಸಿದ್ದರು.
ಇದನ್ನೂ ಓದಿ : IPL 2023: ಪತ್ನಿಯೊಂದಿಗೆ ಮಸ್ತ್ ಸ್ಟೆಪ್ಸ್‌ ಹಾಕಿ ಗಾಯಗೊಂಡ ವಿರಾಟ್ ಕೊಹ್ಲಿ; ಆರ್ಸಿಬಿ ಗತಿಯೇನು?
ಮೈದಾನದಿಂದ ವಾಪಸಾದ ತಕ್ಷಣ ಮೊಹಮ್ಮದ್ ಸಿರಾಜ್ ಲಾಮ್ರೊರ್ ಕ್ಷಮೆ ಕೋರಿದ್ದಾರೆ. ಅದೇ ರೀತಿ ವಿಡಿಯೊದ ಮೂಲಕ ಮತ್ತೊಮ್ಮೆ ಕ್ಷಮೆ ಕೋರಿದ್ದಾರೆ. ನನಗೆ ತುಂಬಾ ಸಿಟ್ಟು ಬಂದಿತ್ತು. ನಾನು ಎರಡು ಬಾರಿ ಈಗಾಗಲೇ ಕ್ಷಮೆ ಕೋರಿದ್ದೇನೆ. ಈ ಕೋಪವನ್ನು ಮೈದಾನಕ್ಕಿಂತ ಹೊರಗಡೆ ತರುವುದು ನನಗೆ ಇಷ್ಟವಿಲ್ಲ. ಪಂದ್ಯ ಮುಗಿದ ತಕ್ಷಣವೇ ಎಲ್ಲವೂ ಮುಕ್ತಾಯಗೊಂಡಿದೆ,” ಎಂದು ಸಿರಾಜ್ ವಿಡಿಯೊದಲ್ಲಿ ಹೇಳಿದ್ದಾರೆ. ಲಾಮ್ರೊರ್ ಕೂಡ ಸಿರಾಜ್ ಕ್ಷಮೆಯನ್ನು ಸ್ವೀಕರಿಸಿದ್ದಾರೆ. ”ಸಿರಾಜ್ ಭಾಯ್ ನನಗೇನೂ ಬೇಸರವಿಲ್ಲ. ದೊಡ್ಡ ದೊಡ್ಡ ಪಂದ್ಯಗಳ ವೇಳೆ ಇಂಥ ಸಣ್ಣ ಸಂಗತಿಗಳು ನಡೆಯುತ್ತವೆ,” ಎಂದು ಅವರು ಹೇಳಿದ್ದಾರೆ.
ಆರ್ಸಿಬಿಗೆ ನಾಲ್ಕನೇ ಜಯ
ಪಂದ್ಯದಲ್ಲಿ ಆರ್ಸಿಬಿ ತಂಡ 7 ರನ್ಗಳ ಗೆಲುವು ಸಾಧಿಸಿದೆ. ಈ ಗೆಲುವಿನೊಂದಿಗೆ ಆರ್ಸಿಬಿ ತಾನಾಡಿದ 7 ಪಂದ್ಯಗಳಲ್ಲಿ 4 ಗೆಲುವು ಸಾಧಿಸಿ 8 ಅಂಕ ಸಂಪಾದಿಸಿದೆ. ಆರ್ಸಿಬಿ ಪರ ಬ್ಯಾಟಿಂಗ್ನಲ್ಲಿ ಗ್ಲೆನ್ ಮ್ಯಾಕ್ಸ್ವೆಲ್(77) ಮತ್ತು ಫಾಫ್ ಡು ಪ್ಲೆಸಿಸ್(62) ಮಿಂಚಿದರೆ, ಬೌಲಿಂಗ್ನಲ್ಲಿ ಹರ್ಷಲ್ ಪಟೇಲ್ 3 ವಿಕೆಟ್ ಕಿತ್ತರು.
ಚಿನ್ನಸ್ವಾಮಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಭಾನುವಾರದ ಐಪಿಎಲ್ನ ಮೊದಲ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ನಡೆಸಿದ ಆರ್ಸಿಬಿ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 189 ರನ್ ಗಳಿಸಿತು. ಗುರಿ ಬೆನ್ನಟ್ಟಿದ ರಾಜಸ್ಥಾನ್ ರಾಯಲ್ಸ್ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 182 ರನ್ ಗಳಿಸಿ ಸಣ್ಣ ಅಂತರದಿಂದ ಸೋಲು ಕಂಡಿತು.