ಹರಿಣಗಳ ಆರ್ಭಟಕ್ಕೆ ಬೆಚ್ಚಿಬಿದ್ದ ಕಾಂಗರೂ ಪಡೆ; ವಿಶ್ವಕಪ್​ನಲ್ಲೇ ಅತಿ ದೊಡ್ಡ ಸೋಲು

ಲಕ್ನೋ: ಈ ಬಾರಿಯ ವಿಶ್ವಕಪ್​ ಟೂರ್ನಿಯಲ್ಲಿ ದಕ್ಷಿಣ ಆಫ್ರಿಕಾ(Australia vs South Africa) ತಂಡ ಚೋಕರ್ಸ್​ ಹಣೆಪಟ್ಟಿಯನ್ನು ಕಳಚಿಕೊಳ್ಳುವ ಸಾಧ್ಯತೆ ದಟ್ಟವಾಗಿದೆ. 5 ಬಾರಿಯ ವಿಶ್ವ ಚಾಂಪಿಯನ್​ ಆಸ್ಟ್ರೇಲಿಯಾ ವಿರುದ್ಧ 134 ರನ್​ಗಳ ಭರ್ಜರಿ ಗೆಲುವು ಸಾಧಿಸಿ ಟೂರ್ನಿಯಲ್ಲಿ ಸತತ ಎರಡನೇ ಗೆಲುವು ದಾಖಲಿಸಿದೆ. ಇದಕ್ಕೂ ಮುನ್ನ ಲಂಕಾ ವಿರುದ್ಧ ದಾಖಲೆಯ ಮೊತ್ತದ ಗೆಲುವು ಸಾಧಿಸಿತ್ತು. ಆಸೀಸ್​ ವಿರುದ್ಧದ ಗೆಲುವಿನೊಂದಿಗೆ ದಕ್ಷಿಣ ಆಫ್ರಿಕಾ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೆ ನೆಗೆದಿದೆ. 2ನೇ ಸ್ಥಾನದಲ್ಲಿದ್ದ ಭಾರತ ಮೂರನೇ ಸ್ಥಾನಕ್ಕೆ ಕುಸಿಯಿತು.

ಇಲ್ಲಿನ ಅಟಲ್‌ಬಿಹಾರಿ ವಾಜಪೇಯಿ ಏಕನಾ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್​ ಸೂತು ಬ್ಯಾಟಿಂಗ್​ಗೆ ಇಳಿಸಲ್ಪಟ್ಟ ದಕ್ಷಿಣ ಆಫ್ರಿಕಾ ತಂಡ ಕ್ವಿಂಟನ್​ ಡಿ ಕಾಕ್​ ಅವರ ಶತಕ ಮತ್ತು ಐಡೆನ್​ ಮಾರ್ಕ್​ರಮ್​ ಅವರ ಅರ್ಧಶತಕದ ನೆರವಿನಿಂದ ನಿಗದಿತ 50 ಓವರ್​ಗಳಲ್ಲಿ 7 ವಿಕೆಟ್​ಗೆ 311 ರನ್​ ಬಾರಿಸಿತು. ಬೃಹತ್​ ಮೊತ್ತವನ್ನು ಕಂಡು ಬೆದರಿದ ಆಸೀಸ್ 40.5​ ಓವರ್​ಗಳಲ್ಲಿ 177 ರನ್​ಗೆ ಸರ್ವಪತನ ಕಂಡಿತು. ವಿಶ್ವಕಪ್​ನಲ್ಲಿ ಆಸ್ಟ್ರೇಲಿಯಾಕ್ಕೆ ಎದುರಾದ ಅತಿ ದೊಡ್ಡ ಮೊತ್ತದ ಸೋಲು ಇದಾಗಿದೆ. ದಕ್ಷಿಣ ಆಫ್ರಿಕಾ ಪರ ಫಾತಕ ಸ್ಫೆಲ್​ ನಡೆಸಿದ ಕಗಿಸೊ ರಬಾಡ 3 ವಿಕೆಟ್​ ಕಿತ್ತು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಶತಕ ವೀರ ಡಿ ಕಾಕ್​ ಪಂದ್ಯಶೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಡಿ ಕಾಕ್​ ಶತಕ ವೈಭವ

ಮೊದಲು ಬ್ಯಾಟಿಂಗ್​ ನಡೆಸಿದ ದಕ್ಷಿಣ ಆಫ್ರಿಕಾ ಪರ ಎಡಗೈ ಬ್ಯಾಟರ್​ ಕ್ವಿಂಟನ್​ ಡಿ ಕಾಕ್​ ಅವರು ಸೊಗಸಾದ ಬ್ಯಾಟಿಂಗ್​ ನಡೆಸಿ ಶತಕವನ್ನು ಬಾರಿಸಿದರು. ಇದು ಅವರ ಸತತ ಎರಡನೇ ಶತಕವಾಗಿದೆ. ಮೊದಲ ಪಂದ್ಯದಲ್ಲಿ ಲಂಕಾ ವಿರುದ್ಧ ಶತಕ ಬಾರಿಸಿದ್ದರು. ಆಸೀಸ್​ ಬೌಲರ್​ಗಳಿಗೆ ಆರಂಭದಿಂದಲೇ ಬೆಂಡೆತ್ತಿದ ಡಿ ಕಾಕ್​ 5 ಆಕರ್ಷಕ ಸಿಕ್ಸರ್​ ಮತ್ತು 8 ಬೌಂಡರಿ ಸಿಡಿಸಿ 106 ಎಸೆತಗಳಿಂದ 109 ರನ್​ ಗಳಿಸಿದರು. ಮ್ಯಾಕ್ಸ್​ವೆಲ್​ ಅವರು ಡಿ ಕಾಕ್​ ಅವರನ್ನು ಕ್ಲೀನ್​ ಬೌಲ್ಡ್​ ಮಾಡಿದರು. ದಕ್ಷಿಣ ಆಫ್ರಿಕಾ ಪರ ವಿಶ್ವಕಪ್​ನಲ್ಲಿ ಅತ್ಯಧಿಕ ಶತಕ ಸಾಧಕರ ಪಟ್ಟಿಯಲ್ಲಿ ಡಿ ಕಾಕ್​ ಹರ್ಷಲ್​ ಗಿಪ್ಸ್​, ಫಾಫ್​ ಡು ಪ್ಲೆಸಿಸ್​ ಮತ್ತು ಹಾಸಿಂ ಆಮ್ಲ ಅವರ ದಾಖಲೆಯನ್ನು ಸರಿಗಟ್ಟಿದರು. ಎಲ್ಲರು ತಲಾ 2 ಶತಕ ಬಾರಿಸಿದ್ದಾರೆ. 4 ಶತಕ ಬಾರಿಸಿದ ಎಬಿ ಡಿ ವಿಲಿಯರ್ಸ್​ ಅಗ್ರಸ್ಥಾನ ಪಡೆದಿದ್ದಾರೆ.

ಬ್ಯಾಟಿಂಗ್​ ಮರೆತ ಆಸೀಸ್​

ಆಸ್ಟ್ರೇಲಿಯಾದ ಬಲಿಷ್ಠ ಆಟಗಾರರು ಈ ಪಂದ್ಯದಲ್ಲಿ ಬ್ಯಾಟಿಂಗ್​ ಮರೆತವರಂತೆ ಆಡಿದರು. ಘಾಟಾನುಘಟಿಗಳಾದ ಡೇವಿಡ್​ ವಾರ್ನರ್​(13) ಮಿಚೆಲ್​ ಮಾರ್ಷ್(7)​, ಸ್ಟೀವನ್​ ಸ್ಮಿತ್(19),​ ಜೋಶ್​ ಇಂಗ್ಲೀಷ್(5)​, ಗ್ಲೆನ್​ ಮ್ಯಾಕ್ಸ್​ವೆಲ್(3)​, ಮಾರ್ಕಸ್​ ಸ್ಟೋಯಿನಿಸ್​(5) ಅಗ್ಗಕ್ಕೆ ಔಟಾಗಿ ಪೆವಿಲಿಯನ್​ ಪರೇಡ್​ ನಡೆಸಿದರು. ಕಗಿಸೊ ರಬಾಡ ಬೌಲಿಂಗ್​ ದಾಳಿಗೆ ಬೆಚ್ಚಿ ಬಿದ್ದ ಆಸೀಸ್​ ಆಟಗಾರರು ಪ್ರತಿ ರನ್​ಗೂ ಪರದಾಡಿದರು. ಅಷ್ಟರ ಮಟ್ಟಿಗೆ ಫಾತಕವಾಗಿತ್ತು ಅವರ ಬೌಲಿಂಗ್​. ಇವರಿಗೆ ಮಾರ್ಕೊ ಜಾನ್ಸನ್​ ಕೂಡ ಉತ್ತಮ ಸಾಥ್​ ನೀಡಿದರು. ಅವರು ಕೂಡ 2 ವಿಕೆಟ್​ ಬೇಟೆಯಾಡುವಲ್ಲಿ ಯುಶಸ್ಸು ಕಂಡರು. ಮೊದಲ ವಿಕೆಟ್​ ಇವರೇ ಕಿತ್ತರು.

ಇದನ್ನೂ ಓದಿ IND vs PAK: ಭಾರತ-ಪಾಕ್​ ಪಂದ್ಯಕ್ಕೆ ಕಂಚಿನ ಕಂಠದ ಕಾಮೆಂಟರಿ ಕಿಂಗ್​ ಅಲಭ್ಯ

ಮಾನ ಉಳಿಸಿದ ಲಬುಶೇನ್​

ಒಂದೆಡೆ ವಿಕೆಟ್​ಗಳು ತರಗೆಳೆಯಂತೆ ಉದುರುತ್ತಿರುವುದನ್ನು ಕಂಡಾಗ ಆಸೀಸ್​ 100ರ ಒಳಗೆ ಗಂಟು ಮೂಟೆ ಕಟ್ಟುತ್ತದೆ ಎಂದು ಊಹಿಸಲಾಗಿತ್ತು. ಆದರೆ ಮಾರ್ನಸ್​ ಲಬುಶೇನ್​ ಏಕಾಂಗಿಯಾಗಿ ನಿಂತು ಸಣ್ಣ ಮಟ್ಟದ ಬ್ಯಾಟಿಂಗ್​​ ಹೋರಾಟ ನಡೆಸಿ ಪಾತಾಳಕ್ಕೆ ಕುಸಿದಿದ್ದ ತಂಡವನ್ನು ಮೇಲೆತ್ತುವ ಪ್ರಯತ್ನ ಮಾಡಿದರು. 46 ರನ್​ಗಳಿಸಿ ಮಹರಾಜ ಅವರ ಓವರ್​ನಲ್ಲಿ ವಿಕೆಟ್​ ಕೈಚೆಲ್ಲಿದರು. ಅಂತಿಮ ಹಂತದಲ್ಲಿ ಮಿಚೆಲ್​ ಸ್ಟಾರ್ಕ್ (27) ಮತ್ತು ನಾಯಕ ಪ್ಯಾಟ್​ ಕಮಿನ್ಸ್(22)​ ಶಕ್ತಿ ಮೀರಿ ಪ್ರಯತ್ನಿಸಿದರೂ ತಂಡಕ್ಕೆ ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ. ಆದರೆ ಸೋಲಿನ ಅಂತರವನ್ನು ಕಡಿಮೆಗೊಳಿಸಿದರು. ಈ ಮೂವರು ಆಟಗಾರರೇ ಆಸೀಸ್​ ಪರ ಅತ್ಯಧಿಕ ಮೊತ್ತ ಪೇರಿಸಿದ ಆಟಗಾರರು. ಉಳಿದೆಲ್ಲರು ವಿಫಲರಾದರು. ಕ್ಯಾಮರೂನ್​ ಗ್ರೀನ್​ ಬದಲಿಗೆ ಆಡಲಿಳಿದ ಮಾರ್ಕಸ್​ ಸ್ಟೋಯಿನಿಸ್​ ಬ್ಯಾಟಿಂಗ್​ ಜತೆಗೆ ಬೌಲಿಂಗ್​ನಲ್ಲಿ ಕಳಪೆ ಪ್ರದರ್ಶನ ತೋರಿದರು. ಜತೆಗೆ ಒಂದು ಕ್ಯಾಚ್​ ಕೂಡ ಕೈಚೆಲ್ಲಿದರು.

ದಕ್ಷಿಣ ಆಫ್ರಿಕಾ ಪರ ಎಲ್ಲರೂ ಉತ್ತಮ ಬ್ಯಾಟಿಂಗ್​ ನಿರ್ವಹಣೆ ತೋರಿದರು. ನಾಯಕ ಟೆಂಬ ಬವುಮಾ(35), ರಸ್ಸಿ ವಾನ್​ ಡರ್​ ಡುಸ್ಸೆನ್​(26), ಕ್ಲಾಸೆನ್​(29), ಡೇವಿಡ್​ ಮಿಲ್ಲರ್​ (17) ಮತ್ತು ಮಾರ್ಕೊ ಜಾನ್ಸೆನ್​(26) ರನ್​ ಗಳಿಸಿ ತಂಡದ ಬೃಹತ್​ ಮೊತಕ್ಕೆ ಸಹಕರಿಸಿದರು. ಆಸೀಸ್​ ಪರ ಬೌಲಿಂಗ್​ನಲ್ಲಿ ಮಿಂಚಿದವರೆಂದರೆ ಸ್ಟಾರ್ಕ್​ ಮತ್ತು ಮ್ಯಾಕ್ಸ್​ವೆಲ್​. ಉಭಯ ಆಟಗಾರರು ತಲಾ 2 ವಿಕೆಟ್​ ಪಡೆದರು. ಪ್ರಧಾನ ಸ್ಪಿನ್ನರ್​ ಆ್ಯಡಂ ಜಾಂಪ 70 ರನ್​ ಬಿಟ್ಟುಕೊಟ್ಟು ದುಬಾರಿಯಾದರು. ಪಡೆದದ್ದು ಒಂದು ವಿಕೆಟ್​​ ಮಾತ್ರ.