ಮುಂಬಯಿ: ಐಪಿಎಲ್ ಜಾಗತಿಕ ಮಟ್ಟದ ಬೃಹತ್ ಕ್ರೀಡಾಕೂಟ ಎನಿಸಿಕೊಂಡಿರುವ ಬೆನ್ನಲ್ಲೇ ಅದರ ನೇರ ಪ್ರಸಾರದ ಹಕ್ಕುಗಳನ್ನು ಪಡೆದುಕೊಳ್ಳುವುದಕ್ಕೆ ನಾನಾ ಮಾಧ್ಯಮ ಸಂಸ್ಥೆಗಳು ಸರತಿ ಸಾಲಿನಲ್ಲಿ ನಿಂತವು. ಇದರಿಂದ ಬಿಸಿಸಿಐ ಕೂಡ ದೊಡ್ಡ ಮೊತ್ತವನ್ನು ಪಡೆದುಕೊಂಡು ಖಜಾನೆ ತುಂಬಿಸಿಕೊಂಡಿತು. ಕಳೆದ ವರ್ಷ ನಡೆದ ಐಪಿಎಲ್ ಮಾಧ್ಯಮ ಹಕ್ಕುಗಳ ವಿತರಣೆ ಬಿಡ್ಡಿಂಗ್ನಲ್ಲಿ ಪಾಲ್ಗೊಂಡಿದ್ದ ರಿಲಯನ್ಸ್ ಕಂಪನಿ ಒಡೆತನದ ವಯಾಕಾಮ್ 18, ಆನ್ಲೈನ್ ಸ್ಟ್ರೀಮಿಂಗ್ ಹಕ್ಕನ್ನು ತನ್ನದಾಗಿಸಿಕೊಂಡಿದೆ. ಅಚ್ಚರಿಯೇನೆಂದರೆ ದೊಡ್ಡ ಮೊತ್ತ ವಿನಿಯೋಗ ಮಾಡಿಕೊಂಡು ಹಕ್ಕನ್ನು ಪಡೆದಿರುವ ಹೊರತಾಗಿಯೂ ಈ ವರ್ಷ (IPL 2023) ಪ್ರೇಕ್ಷಕರಿಗೆ ಉಚಿತವಾಗಿ ವಿಕ್ಷಣೆಗೆ ಅವಕಾಶ ನೀಡುವುದಾಗಿ ಘೋಷಿಸಿದೆ. ಇದು ನೇರ ಪ್ರಸಾರದ ವಿತರಣೆಯಲ್ಲಿ ಪೈಪೋಟಿಗೆ ಕಾರಣವಾಗಿದ್ದು, ಇದೀಗ ಟಿವಿ ನೇರ ಪ್ರಸಾರದ ಹಕ್ಕನ್ನು ಪಡೆದುಕೊಂಡಿರುವ ಸ್ಟಾರ್ ಸ್ಪೋರ್ಟ್ಸ್ ಕೂಡ 12 ಪಂದ್ಯಗಳನ್ನು ಉಚಿತವಾಗಿ ಪ್ರಸಾರ ಮಾಡುವುದಾಗಿ ಹೇಳಿಕೊಂಡಿದೆ.
ಸ್ಟಾರ್ ಸ್ಪೋರ್ಟ್ಸ್ ಟಿವಿ ಏನಾದರೂ ಪಂದ್ಯವನ್ನು ಉಚಿತವಾಗಿ ಪ್ರಸಾರ ಮಾಡಿದರೆ ಐಪಿಎಲ್ ಇತಿಹಾಸದಲ್ಲಿಯೇ ಉಚಿತ ಪ್ರಸಾರಗೊಂಡ ದಾಖಲೆ ಸೃಷ್ಟಿಯಾಗಲಿದೆ. ಸ್ಟಾರ್ ನೆಟ್ವರ್ಕ್ಗೆ ಸೇರಿರುವ ಸ್ಟಾರ್ ಉತ್ಸವ್ ಚಾನೆಲ್ನಲ್ಲಿ 12 ಪಂದ್ಯಗಳು ಉಚಿತವಾಗಿ ಪ್ರಸಾರವಾಗಲಿದೆ ಎಂದು E4M ವರದಿ ಮಾಡಿದೆ. ಆದರೆ, ಯಾವ ಪಂದ್ಯಗಳು ಎಂಬ ಬಗ್ಗೆ ಮಾಹಿತಿ ನೀಡಿಲ್ಲ.
ಡಿಸ್ನಿ ಸ್ಟಾರ್ ಕೂಡ ಈ ಮಾಹಿತಿಯನ್ನು ಖಚಿತಪಡಿಸಿದೆ. ಇದೇ ವರ್ಷ ಮೊದಲ ಬಾರಿಗೆ ಸ್ಟಾರ್ ಉತ್ಸವ್ ಮೂವಿ ಚಾನೆಲ್ ಮೂಲಕ ಪ್ರಸಾರವಾಗಲಿದೆ ಎಂದು ಹೇಳಿದೆ. ಗ್ರಾಮೀಣ ಪ್ರದೇಶಕ್ಕೂ ನಮ್ಮ ಟಿವಿ ನೆಟ್ವರ್ಕ್ ವಿಸ್ತರಣೆಯಾಗಿದೆ. ಹೀಗಾಗಿ ಅವರೆಲ್ಲರಿಗೂ ಅತ್ಯುತ್ತಮ ವೀಕ್ಷಣೆ ಅನುಭವ ನೀಡುವ ಉದ್ದೇಶದಿಂದ ಉಚಿತವಾಗಿ ಪ್ರಸಾರ ಮಾಡುತ್ತೇವೆ ಎಂದೂ ಹೇಳಿದೆ.
ಇದನ್ನೂ ಓದಿ : Team India | ಮುಂದಿನ ಆವೃತ್ತಿಯ ಐಪಿಎಲ್ ಪಂದ್ಯಗಳನ್ನು ಮೊಬೈಲ್ನಲ್ಲಿ ಉಚಿತವಾಗಿ ವೀಕ್ಷಿಸಿ! ಹೇಗೆ ಸಾಧ್ಯ?
ಕಳೆದ ಜನವರಿಯಲ್ಲಿ ರಿಲಯನ್ಸ್ ಒಡೆತದನ ವಯಾಕಾಮ್ 18 ಸಂಸ್ಥೆಯು ಐಪಿಎಲ್ ಪಂದ್ಯವನ್ನು ಉಚಿತವಾಗಿ ಪ್ರಸಾರ ಮಾಡುವುದಾಗಿ ಹೇಳಿತ್ತು. ಜಿಯೋ ಆ್ಯಪ್ನಲ್ಲಿ ಪಂದ್ಯಗಳನ್ನು ನೋಡಬಹುದು ಎಂದು ಅದು ಹೇಳಿತ್ತು. ಒಟ್ಟು 11 ಸ್ಥಳೀಯ ಭಾಷೆಗಳಲ್ಲಿ ಪ್ರಸಾರ ಮಾಡುವುದಾಗಿಯೂ ತಿಳಿಸಿತ್ತು.