ಇಂದೋರ್: ನ್ಯೂಜಿಲ್ಯಾಂಡ್ ವಿರುದ್ಧದ ಅಂತಿಮ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ 90 ರನ್ಗಳ ಗೆಲುವು ಸಾಧಿಸಿದೆ. ಈ ಮೂಲಕ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡಿದೆ. ಸೋಲು ಕಂಡ ನ್ಯೂಜಿಲ್ಯಾಂಡ್ ವೈಟ್ ವಾಶ್ ಮುಖಭಂಗಕ್ಕೆ ಒಳಗಾಯಿತು. ಭಾರತ ಈ ಗೆಲುವಿನೊಂದಿಗೆ ಐಸಿಸಿ ನೂತನ ಏಕದಿನ ಶ್ರೇಯಾಂದಲ್ಲಿ ನಂ.1 ಸ್ಥಾನಕ್ಕೇರಿದೆ.
ಇಂದೋರ್ನ ಹೋಳ್ಕರ್ ಸ್ಟೇಡಿಯಂನಲ್ಲಿ ಮಂಗಳವಾರ ನಡೆದ ಈ ಮುಖಾಮುಖಿಯಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ ರೋಹಿತ್ ಶರ್ಮಾ(101 ಮತ್ತು ಶುಭಮನ್ ಗಿಲ್(112) ಅವರ ಭರ್ಜರಿ ಶತಕದ ನೆರವಿನಿಂದ ನಿಗದಿತ 50 ಓವರ್ಗಳಲ್ಲಿ 9 ವಿಕೆಟ್ಗೆ 385 ರನ್ ಗಳಿಸಿತು. ಗುರಿ ಬೆನ್ನಟ್ಟಿದ ನ್ಯೂಜಿಲ್ಯಾಂಡ್ 41.2 ಓವರ್ಗಳಲ್ಲಿ 295ಕ್ಕೆ ಆಲೌಟ್ ಆಯಿತು. ಕಿವೀಸ್ ಪರ ಡೆವೋನ್ ಕಾನ್ವೆ(138) ಶತಕ ಬಾರಿಸಿ ಮಿಂಚಿದರು.
ಗುರಿ ಬೆನ್ನಟ್ಟಿದ ನ್ಯೂಜಿಲ್ಯಾಂಡ್ ತಂಡಕ್ಕೆ ಹಾರ್ದಿಕ್ ಪಾಂಡ್ಯ ಖಾತೆ ತೆರೆಯುವ ಮುನ್ನವೇ ದೊಡ್ಡ ಆಘಾತ ನೀಡಿದರು. ಮೊದಲ ಓವರ್ನ 2ನೇ ಎಸೆತದಲ್ಲಿ ಫಿನ್ ಅಲೆನ್ ವಿಕೆಟ್ ಕಿತ್ತರು. ಆದರೆ ದ್ವಿತೀಯ ವಿಕೆಟ್ಗೆ ಜತೆಯಾದ ಡೆವೋನ್ ಕಾನ್ವೆ ಮತ್ತು ಹೆನ್ರಿ ನಿಕೋಲ್ಸ್ ಭಾರತದ ಬೌಲಿಂಗ್ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ಹೋರಾಟವೊಂದನ್ನು ಜಾರಿಯಲ್ಲಿರಿಸಿದರು.
ಉಭಯ ಆಟಗಾರರ ರನ್ ಗಳಿಕೆ ವೇಗವನ್ನು ಗಮನಿಸಿದಾಗ ಭಾರತ ಸವಾಲನ್ನು ಚೇಸ್ ಮಾಡುವ ಸೂಚನೆ ಇತ್ತು. ಆದರೆ ಹೆನ್ರಿ ನಿಕೋಲ್ಸ್(42) ಅವರ ವಿಕೆಟ್ ಪತನದ ಬಳಿಕ ತಂಡ ನಾಟಕೀಯ ಕುಸಿತ ಕಂಡಿತು. ನಿಕೋಲ್ಸ್ ಮತ್ತು ಕಾನ್ವೆ ದ್ವಿತೀಯ ವಿಕೆಟ್ಗೆ 106 ರನ್ ಜತೆಯಾಟ ನಡೆಸಿದರು. ಒಂದೆಡೆ ವಿಕೆಟ್ ಬೀಳುತ್ತಿದ್ದರೂ ಡೆವೋನ್ ಕಾನ್ವೆ ಏಕಾಂಗಿಯಾಗಿ ಹೋರಾಟ ನಡೆಸಿದರು. ಇದೇ ವೇಳೆ ಅವರು ಶತಕವನ್ನು ಪೂರೈಸಿದರು. ಒಟ್ಟು 100 ಎಸೆತ ಎದುರಿಸಿ 138 ರನ್ ಬಾರಿಸಿದರು. ಆದರೆ ಉಳಿದ ಆಟಗಾರರಿಂದ ನಿರೀಕ್ಷಿತ ಬ್ಯಾಟಿಂಗ್ ಪ್ರದರ್ಶನ ಕಂಡು ಬಾರದೆ ಅಂತಿಮವಾಗಿ ಕಿವೀಸ್ ಸೋಲು ಕಂಡಿತು.
ಶಾರ್ದೂಲ್-ಕುಲ್ದೀಪ್ ಘಾತಕ ಬೌಲಿಂಗ್
ಭಾರತ ಪರ ಆಲ್ರೌಂಡರ್ ಶಾರ್ದೂಲ್ ಠಾಕೂರ್ ಮತ್ತು ಕುಲ್ದೀಪ್ ಯಾದವ್ ಉತ್ತಮ ಬೌಲಿಂಗ್ ನಿರ್ವಹಣೆ ತೋರಿದರು. ಅದರಲ್ಲೂ ಶಾರ್ದೂಲ್ ಠಾಕೂರ್ 45 ರನ್ ವೆಚ್ಚದಲ್ಲಿ ಪ್ರಮುಖ ಮೂರು ವಿಕೆಟ್ ಕಿತ್ತು ಮಿಂಚಿದರು. ಕುಲ್ದೀಪ್ ಕೂಡ ಮೂರು ವಿಕೆಟ್ ಉರುಳಿಸಿದರು. ಉಳಿದಂತೆ ಚಹಲ್ 2 ವಿಕೆಟ್ ಪಡೆದರು.
ರೋಹಿತ್-ಗಿಲ್ ಶತಕದ ಆರ್ಭಟ
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ ಭಾರತ ಪರ ರೋಹಿತ್ ಮತ್ತು ಶುಭಮನ್ ಗಿಲ್ ಶತಕ ಬಾರಿಸಿ ಮಿಂಚಿದರು. ಕಿವೀಸ್ ವಿರುದ್ಧದ ಮೊದಲೆರಡು ಪಂದ್ಯಗಳಲ್ಲಿ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ರೋಹಿತ್ ಶರ್ಮಾ ಮತ್ತು ಶುಭಮನ್ ಗಿಲ್ ತಮ್ಮ ಪರಾಕ್ರಮವನ್ನು ಈ ಪಂದ್ಯದಲ್ಲಿಯೂ ಮುಂದುವರಿಸಿದರು. ಆದರೆ ಈ ಪಂದ್ಯದಲ್ಲಿ ಉಭಯ ಆಟಗಾರರ ಬ್ಯಾಟಿಂಗ್ ಆರ್ಭಟ ಹಿಂದಿನ ಎರಡು ಪಂದ್ಯಕ್ಕಿಂತಲೂ ಜೋರಾಗಿತ್ತು. ಜಿದ್ದಿಗೆ ಬಿದ್ದವರಂತೆ ಬ್ಯಾಟ್ ಬೀಸಿದ ರೋಹಿತ್ ಮತ್ತು ಗಿಲ್ ಸಿಕ್ಸರ್, ಬೌಂಡರಿ ಮೂಲಕ ಕಿವೀಸ್ ಬೌಲರ್ಗಳ ಬೆವರಿಳಿಸಿದರು.
ಒಂದು ಹಂತದಲ್ಲಿ ಈ ಜೋಡಿಯ ಬ್ಯಾಟಿಂಗ್ ಗಮನಿಸುವಾಗ ಭಾರತ ತಂಡ 500ರ ಗಡಿ ದಾಟುವ ಸೂಚನೆ ಇತ್ತು. ಟಿ20 ಮಾದರಿಯಲ್ಲಿ ಬ್ಯಾಟ್ ಬೀಸಿದ ಉಭಯ ಆಟಗಾರರು 20 ಓವರ್ ವೇಳೆಗೆ ಬರೋಬ್ಬರಿ 200 ರನ್ ಗಳ ಜತೆಯಾಟ ನಡೆಸಿ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದರು. ಇದೇ ವೇಳೆ ರೋಹಿತ್ ಮತ್ತು ಶುಭಮನ್ ಗಿಲ್ ಶತಕವನ್ನೂ ಪೂರೈಸಿದರು.
ಕಳೆದ ಒಂದುವರೆ ವರ್ಷಗಳಿಂದ ಶತಕದ ಬರ ಅನುಭವಿಸುತ್ತಿದ್ದ ರೋಹಿತ್ ಶರ್ಮಾ ಈ ಪಂದ್ಯದಲ್ಲಿ ಭರ್ಜರಿ ಶತಕ ಸಿಡಿಸಿ ಮಿಂಚಿದರು. ಈ ಮೂಲಕ ತಮ್ಮ ಏಕದಿನ ವೃತ್ತಿಜೀವನದ 30ನೇ ಶತಕವನ್ನು ಪೂರೈಸಿದರು. ಒಟ್ಟು 85 ಎಸೆತ ಎದುರಿಸಿದ ರೋಹಿತ್ 6 ಸಿಕ್ಸರ್ ಮತ್ತು 9 ಬೌಂಡರಿ ನೆರವಿನಿಂದ 101 ರನ್ ಗಳಿಸಿ ಬ್ರೇಸ್ವೆಲ್ಗೆ ವಿಕೆಟ್ ಒಪ್ಪಿಸಿದರು. ಗಿಲ್ ಮತ್ತು ರೋಹಿತ್ ಮೊದಲ ವಿಕೆಟ್ಗೆ ಬರೋಬ್ಬರಿ 212 ರನ್ ಜತೆಯಾಟ ನಡೆಸಿದರು.
ರೋಹಿತ್ ಶರ್ಮಾ ವಿಕೆಟ್ ಪತನದ ಬಳಿಕ 18 ರನ್ ಆಗುವ ವೇಳೆಗೆ ಶುಭಮನ್ ಗಿಲ್ ವಿಕೆಟ್ ಕೂಡ ಬಿತ್ತು. ಶುಭಮನ್ ಗಿಲ್ 78 ಎಸೆತ ಎದುರಿಸಿ 122 ರನ್ ಬಾರಿಸುವ ಮೂಲಕ ಶತಕ ಪೂರೈಸಿದರು. ಈ ಇನಿಂಗ್ಸ್ ವೇಳೆ 13 ಬೌಂಡರಿ ಮತ್ತು 5 ಸಿಕ್ಸರ್ ಸಿಡಿಯಿತು.
ಹಠಾತ್ ಕುಸಿತ ಕಂಡ ಭಾರತ
ಶುಭಮನ್ ಮತ್ತು ರೋಹಿತ್ ಶರ್ಮಾ ವಿಕೆಟ್ ಪತನದ ಬಳಿಕ ತಂಡದ ಮೊತ್ತ ಹಠಾತ್ ಕುಸಿತ ಕಂಡಿತು. ವಿರಾಟ್ ಕೊಹ್ಲಿ(36), ಸೂರ್ಯಕುಮಾರ್ ಯಾದವ್(14), ಇಶಾನ್ ಕಿಶನ್(17) ನಿರೀಕ್ಷಿತ ಪ್ರದರ್ಶನ ತೋರುವಲ್ಲಿ ಎಡವಿದರು. ಇದರಿಂದ ತಂಡದ ಬೃಹತ್ ಮೊತ್ತಕ್ಕೆ ಹಿನ್ನಡೆಯಾಯಿತು. ಸೂರ್ಯಕುಮಾರ್ ಮತ್ತು ಇಶಾನ್ ಕಿಶನ್ ಕಿವೀಸ್ ವಿರುದ್ಧದ ಮೂರು ಪಂದ್ಯಗಳಲ್ಲಿಯೂ ಸಂಪೂರ್ಣ ವೈಫಲ್ಯ ಕಂಡರು.
ಸಿಡಿದು ನಿಂತ ಪಾಂಡ್ಯ
ಒಂದೊಡೆ ತಂಡದ ವಿಕೆಟ್ ಬೀಳುತ್ತಿದ್ದರೂ ಮಧ್ಯಮ ಕ್ರಮಾಂಕದಲ್ಲಿ ಸಿಡಿದು ನಿಂತ ಉಪನಾಯಕ ಹಾರ್ದಿಕ್ ಪಾಂಡ್ಯ ಬಿರುಸಿನ ಬ್ಯಾಟಿಂಗ್ ಮೂಲಕ ಅರ್ಧಶತಕ ಬಾರಿಸಿ ಮಿಂಚಿದರು. ಜತೆಗೆ ತಂಡದ ಮೊತ್ತವನ್ನು ಹಿಗ್ಗಿಸಿದರು. ಪಾಂಡ್ಯ ಮೂರು ಸಿಕ್ಸರ್ ಮತ್ತು ಮೂರು ಬೌಂಡರಿ ಮೂಲಕ 54 ರನ್ ಬಾರಿಸಿದರು. ಇವರಿಗೆ ಆಲ್ರೌಂಡರ್ ಶಾರ್ದೂಲ್ ಠಾಕೂರ್ ಉತ್ತಮ ಸಾಥ್ ನೀಡಿದರು. ಶಾರ್ದೂಲ್ ಒಟ್ಟು 17 ಎಸೆತಗಳಿಂದ 25 ರನ್ ಚಚ್ಚಿದರು.
ಸಂಕ್ಷಿಪ್ತ ಸ್ಕೋರ್
ಭಾರತ: 50 ಓವರ್ಗಳಲ್ಲಿ 9 ವಿಕೆಟ್ಗೆ 385 (ರೋಹಿತ್ ಶರ್ಮಾ 101, ಶುಭಮನ್ ಗಿಲ್ 112, ಹಾರ್ದಿಕ್ ಪಾಂಡ್ಯ 54)
ನ್ಯೂಜಿಲ್ಯಾಂಡ್: 41.2 ಓವರ್ಗಳಲ್ಲಿ 295ಕ್ಕೆ ಆಲೌಟ್( ಡೆವೋನ್ ಕಾನ್ವೆ 138, ಹೆನ್ರಿ ನಿಕೋಲ್ಸ್ 42, ಶಾರ್ದೂಲ್ ಠಾಕೂರ್ 45ಕ್ಕೆ3, ಕುಲ್ದೀಪ್ ಯಾದವ್ 62ಕ್ಕೆ 3)
ಇದನ್ನೂ ಓದಿ | IND VS NZ: ಆಸ್ಟ್ರೇಲಿಯಾ ಕ್ರಿಕೆಟಿಗ ರಿಕಿ ಪಾಂಟಿಂಗ್ ದಾಖಲೆ ಸರಿಗಟ್ಟಿದ ರೋಹಿತ್ ಶರ್ಮಾ