ದುಬೈ: ವಿರಾಟ್‌ ಕೊಹ್ಲಿಯ (೬೦) ಅರ್ಧ ಶತಕದ ಹೊರತಾಗಿಯೂ ಪರಿಣಾಮಕಾರಿ ಬೌಲಿಂಗ್‌ ದಾಳಿ ಸಂಘಟಿಸುವಲ್ಲಿ ವೈಫಲ್ಯ ಎದುರಿಸಿದ ಭಾರತ ತಂಡ, ಏಷ್ಯಾ ಕಪ್‌ ಸೂಪರ್‌-೪ ಹಂತದಲ್ಲಿ ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ೫ ವಿಕೆಟ್‌ಗಳ ಸೋಲಿಗೆ ಒಳಗಾಯಿತು. ಇಲ್ಲಿನ ದುಬೈ ಇಂಟರ್‌ನ್ಯಾಷನಲ್‌ ಕ್ರಿಕೆಟ್‌ ಸ್ಟೇಡಿಯಮ್‌ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಲು ಆಹ್ವಾನ ಪಡೆದ ರೋಹಿತ್ ಶರ್ಮ ಬಳಗ ೨೦ ಓವರ್‌ಗಳಲ್ಲಿ ೭ ವಿಕೆಟ್ ನಷ್ಟಕ್ಕೆ ೧೮೧ ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಎದುರಾಳಿ ಪಾಕ್ ತಂಡ ೧೯.೫ ಓವರ್‌ಗಳಲ್ಲಿ ೫ ವಿಕೆಟ್ ಕಳೆದುಕೊಂಡು ೧೮೨ ರನ್ ಬಾರಿಸಿ ಜಯಶಾಲಿಯಾಯಿತು. ಜಿದ್ದಾಜಿದ್ದಿನ ಹೋರಾಟದಲ್ಲಿ ಕೊನೆಗೂ ಜಯ ದಾಖಲಿಸಿದ ಪಾಕ್ ತಂಡ ಲೀಗ್‌ ಹಂತದಲ್ಲಿ ಭಾರತ ವಿರುದ್ಧದ ಸೋಲಿಗೆ ಪ್ರತಿಕಾರ ತೀರಿಸಿಕೊಂಡಿತು.
ದೊಡ್ಡ ಮೊತ್ತವನ್ನು ಬೆನ್ನಟ್ಟು ಆರಂಭಿಸಿದ ಪಾಕಿಸ್ತಾನ ತಂಡ ನಿರಂತರವಾಗಿ ರನ್ ಗಳಿಸುತ್ತಾ ಸಾಗಿ ಗೆಲುವು ತನ್ನದಾಗಿಸಿಕೊಂಡಿತು. ಭಾರತೀಯ ಬೌಲರ್‌ಗಳು ಎದುರಾಳಿ ತಂಡದ ವಿಕೆಟ್ ಪಡೆಯುವಲ್ಲಿ ವಿಫಲಗೊಂಡ ಕಾರಣ ಪಾಕ್ ತಂಡಕ್ಕೆ ಗೆಲುವು ಲಭಿಸಿದೆ. ಪಾಕಿಸ್ತಾನ ತಂಡದ ಪರ ಮೊಹಮ್ಮದ್ ರಿಜ್ವಾನ್‌ (71) ಮೊಹಮ್ಮದ್ ನವಾಜ್‌ (42) ಗೆಲುವಿನ ರೂವಾರಿಗಳೆನಿಸಿಕೊಂಡರು. ಕೊನೆಯಲ್ಲಿ ಆಸಿಫ್‌ ಅಲಿ ಕೊಟ್ಟ ಸುಲಭ ಕ್ಯಾಚ್‌ ಕೈ ಚೆಲ್ಲಿದ ಪಾಕ್ ಫೀಲ್ಡರ್‌ ಅರ್ಶ್‌ದೀಪ್‌ ಸಿಂಗ್‌ ಸೋಲಿನ ಹೊಣೆಯೊತ್ತುಕೊಳ್ಳಬೇಕಾಯಿತು.
ಭಾರತದ ಉತ್ತಮ ಆರಂಭ
ಭಾರತದ ಆರಂಭಿಕ ಜೋಡಿಯಾಗಿರುವ ರೋಹಿತ್ ಶರ್ಮ (೨೮) ಹಾಗೂ ಕೆ.ಎಲ್‌ ರಾಹುಲ್‌ (೨೮) ಆರಂಭದಿಂದಲೇ ಅಬ್ಬರದ ಬ್ಯಾಟಿಂಗ್‌ ಪ್ರದರ್ಶನ ನೀಡಿದರು. ಹಿಂದಿನ ಪಂದ್ಯದಲ್ಲಿ ಭಾರತ ತಂಡವನ್ನು ಕಾಡಿದ್ದ ಬೌಲರ್‌ ನಾಸಿಮ್‌ ಶಾ ಅವರನ್ನು ಸತತವಾಗಿ ದಂಡಿಸಿದರು. ೧೦ ರನ್‌ಗಳ ಸರಾಸರಿಯಂತೆ ರನ್ ಗಳಿಸಿದ ಅವರಿಬ್ಬರೂ ಮೊದಲ ೫.೧ ಓವರ್‌ಗಳಲ್ಲಿ ೫೪ ರನ್ ಬಾರಿಸಿದರು. ಆದರೆ ರವೂಫ್ ಎಸೆತಕ್ಕೆ ದೊಡ್ಡ ಹೊಡೆತ ಬಾರಿಸಲು ಮುಂದಾದ ರೋಹಿತ್ ವಿಕೆಟ್ ಒಪ್ಪಿಸಿದರು. ಸ್ವಲ್ಪ ಹೊತ್ತಿನಲ್ಲೇ ಶದಬ್‌ ಖಾನ್‌ ಎಸೆತಕ್ಕೆ ಸಿಕ್ಸರ್ ಬಾರಿಸಲು ಮುಂದಾದ ರಾಹುಲ್‌ ಕೂಡ ಔಟಾದರು. ನಂತರ ಬಂದ ಸೂರ್ಯಕುಮಾರ್‌ ಯಾದವ್‌ ನಿರೀಕ್ಷೆ ಮೂಡಿಸಿದರೂ ೧೩ ರನ್‌ಗಳಿಗೆ ಔಟಾದರು. ಆದಾಗ್ಯೂ ೧೦.೪ ಓವರ್‌ಗಳಲ್ಲಿ ಭಾರತ ೧೦೦ ರನ್‌ಗಳ ಗಡಿ ದಾಟಿತು.
ಫಾರ್ಮ್‌ಗೆ ಮರಳಿದ ಕೊಹ್ಲಿ
ಫಾರ್ಮ್‌ ಮರಳಿದ ಸ್ಟಾರ್‌ ಬ್ಯಾಟರ್‌ ವಿರಾಟ್‌ ಕೊಹ್ಲಿ ೩೬ ಎಸೆತಗಳಲ್ಲಿ ಅರ್ಧ ಶತಕ ಬಾರಿಸಿದರಲ್ಲದೆ,44 ಎಸೆತಗಳಲ್ಲಿ 1 ಸಿಕ್ಸರ್ 4 ಫೋರ್‌ಗಳ ಸಮೇತ 60 ರನ್ ಬಾರಿಸಿದರು. ಅಲ್ಲದೆ, ಸಿಕ್ಸರ್ ಮೂಲಕ ಅರ್ಧ ಶತಕ ಬಾರಿಸಿ ತಮ್ಮ ಬ್ಯಾಟಿಂಗ್‌ ಖದರ್‌ ತೋರಿದರು. ಹಾಲಿ ಏಷ್ಯಾ ಕಪ್‌ನಲ್ಲಿ ಇದು ಅವರ ಎರಡನೇ ಅರ್ಧ ಶತಕವಾಗಿದೆ. ಹಾಂಕಾಂಗ್‌ ವಿರುದ್ಧವೂ ಅವರು ಅರ್ಧ ಶತಕ (೫೯*) ಬಾರಿಸಿದ್ದರು. ಅಂತೆಯೇ ಪಾಕಿಸ್ತಾನ ವಿರುದ್ಧದ ಈ ಹಿಂದಿನ ಪಂದ್ಯದಲ್ಲಿ ೩೫ ರನ್ ಬಾರಿಸಿದ್ದರು.
ಹಾರ್ದಿಕ್ ಫೇಲ್‌
ಬಳಿಕ ರಿಷಭ್‌ ಪಂತ್‌ (೧೪) ಸ್ವಲ್ಪ ಹೊತ್ತು ಬ್ಯಾಟಿಂಗ್‌ ಮಾಡಿ ಅನಗತ್ಯವಾಗಿ ವಿಕೆಟ್ ಒಪ್ಪಿಸಿದರು. ಅಂತೆಯೇ ಪಾಕಿಸ್ತಾನ ವಿರುದ್ಧದ ಹಿಂದಿನ ಪಂದ್ಯದಲ್ಲಿ ಆಲ್‌ರೌಂಡ್‌ ಆಟ ಪ್ರದರ್ಶಿಸಿದ್ದ ಹಾರ್ದಿಕ್ ಪಾಂಡ್ಯ ಶೂನ್ಯಕ್ಕೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಬಳಿಕ ಬಂದ ದೀಪಕ್‌ ಹೂಡ ೧೬ ರನ್‌ಗಳ ಕೊಡುಗೆ ಕೊಟ್ಟರು.
ಸ್ಕೋರ್‌ ವಿವರ
ಭಾರತ: ೨೦ ಓವರ್‌ಗಳಲ್ಲಿ ೭ ವಿಕೆಟ್‌ಗೆ ೧೮೧ (ವಿರಾಟ್‌ ಕೊಹ್ಲಿ ೬೦, ಕೆ.ಎಲ್‌ ರಾಹುಲ್‌ ೨೮, ರೋಹಿತ್ ಶರ್ಮ 28, ಸೂರ್ಯಕುಮಾರ್‌ ಯಾದವ್‌ ೧೩, ರಿಷಭ್‌ ಪಂತ್‌ ೧೪, ದೀಪಕ್‌ ಹೂಡ ೧೬; ಶದಬ್‌ ಖಾನ್‌ ೩೧ಕ್ಕೆ೨).
ಪಾಕಿಸ್ತಾನ : 19.5 ಓವರ್‌ಗಳಲ್ಲಿ 5 ವಿಕೆಟ್‌ಗೆ 182 (ಮೊಹಮ್ಮದ್ ರಿಜ್ವಾನ್‌ 71 , ಮೊಹಮ್ಮದ್ ನವಾಜ್‌ ೪೨, ರವಿ ಬಿಷ್ಣೋಯಿ ೨೬ಕ್ಕೆ೧).