ಪೋರ್ಟ್‌ ಆಫ್‌ ಸ್ಪೇನ್‌: ಭಾರತ ಹಾಗೂ ವೆಸ್ಟ್ ಇಂಡೀಸ್‌ (Ind vs WI ODI) ನಡುವಿನ ಎರಡನೇ ಏಕದಿನ ಪಂದ್ಯ ಭಾನುವಾರ ರಾತ್ರಿ ನಡೆಯಲಿದ್ದು, ಸರಣಿ ಗೆಲುವಿನ ತವಕದೊಂದಿಗೆ ಶಿಖರ್‌ ಧವನ್‌ ಬಳಗ ಕಣಕ್ಕಿಳಿಯಲಿದೆ.
ಕ್ವೀನ್ಸ್‌ ಪಾರ್ಕ್‌ ಓವಲ್‌ ಸ್ಟೇಡಿಯಮ್‌ನಲ್ಲಿ ಪಂದ್ಯ ನಡೆಯಲಿದ್ದು, ಮತ್ತೊಂದು ಬಾರಿ ರನ್‌ ಹೊಳೆ ಹರಿಯುವ ಸಾಧ್ಯತೆಗಳಿವೆ. ಮೊದಲ ಪಂದ್ಯದಲ್ಲಿ ೩ ರನ್‌ಗಳಿಂದ ರೋಚಕ ಜಯ ಸಾಧಿಸಿರುವ ಭಾರತ ತಂಡ ಸರಣಿಯಲ್ಲಿ ೨-೧ ಮುನ್ನಡೆ ಪಡೆದುಕೊಂಡಿದ್ದು ಒಂದು ವೇಳೆ ಈ ಪಂದ್ಯವನ್ನೂ ಗೆದ್ದರೆ ಸರಣಿ ಕೈವಶವಾಗಲಿದೆ. ಈ ಸರಣಿ ಭಾರತದ ಕೈವಶವಾದರೆ ಐತಿಹಾಸಿಕ ದಾಖಲೆಯೊಂದು ಸೃಷ್ಟಿಯಾಗಲಿದ್ದು, ಸತತ ೧೨ ಏಕದಿನ ಸರಣಿಗಳನ್ನು ಗೆದ್ದ ತಂಡವೆಂಬ ಖ್ಯಾತಿ ಪಡೆಯಲಿದೆ.
ಭರ್ಜರಿ ಬ್ಯಾಟಿಂಗ್
ಭಾರತ ತಂಡ ಮೊದಲ ಪಂದ್ಯದಲ್ಲಿ ಉತ್ತಮ ರೀತಿಯಲ್ಲಿ ಬ್ಯಾಟಿಂಗ್ ಮಾಡಿತ್ತು. ಶಿಖರ್‌ ಧವನ್‌ ೯೭ ರನ್‌ಗಳಿಂದ ಶತಕ ವಂಚಿತರಾದರೆ, ಶುಬ್ಮನ್‌ ಗಿಲ್‌ ಹಾಗೂ ಶ್ರೇಯಸ್‌ ಅಯ್ಯರ್‌ ಅರ್ಧ ಶತಕ ಬಾರಿಸಿದ್ದರು. ಅದೇ ಮಾದರಿಯಲ್ಲಿ ಭಾರತ ತಂಡ ಬ್ಯಾಟಿಂಗ್ ಮಾಡಬೇಕಾಗಿದೆ. ಆದರೆ, ಹಿಂದಿನ ಪಂದ್ಯದಲ್ಲಿ ಭಾರತ ಬೌಲಿಂಗ್‌ ವಿಭಾಗ ಸಾಕಷ್ಟು ಎಡವಟ್ಟುಗಳನ್ನು ಮಾಡಿಕೊಂಡಿತ್ತು. ಈ ಬಾರಿ ಅಂಥ ತಪ್ಪುಗಳಿಗೆ ಅವಕಾಶ ನೀಡಬಾರದು.
ಅತ್ತ ವೆಸ್ಟ್ ಇಂಡೀಸ್‌ ತಂಡ ಸಾಕಷ್ಟು ಒತ್ತಡದಲ್ಲಿದೆ. ಬಾಂಗ್ಲಾದೇಶ ವಿರುದ್ಧವೇ ತವರಿನಲ್ಲಿ ಸರಣಿ ಸೋತಿರುವ ನಿಕೋಲಸ್‌ ಪೂರನ್ ಬಳಗಕ್ಕೆ ಈ ಸರಣಿಯನ್ನು ಗೆದ್ದು ಮರ್ಯಾದೆ ಉಳಿಸಿಕೊಳ್ಳುವ ಅನಿವಾರ್ಯತೆ ಎದುರಾಗಿದೆ. ವಿಂಡೀಸ್‌ ತಂಡದ ಬ್ಯಾಟಿಂಗ್ ವಿಭಾಗ ಹೆಚ್ಚು ಬಲಿಷ್ಠವಾಗಿದ್ದರೂ ಬ್ಯಾಟಿಂಗ್ ವಿಭಾಗ ನಿರೀಕ್ಷೆಯ ಮಟ್ಟದಲ್ಲಿ ಇಲ್ಲ. ಆದರೆ ಮೊದಲ ಪಂದ್ಯದಲ್ಲಿ ಭಾರತದ ಬೌಲರ್‌ಗಳಿಗೆ ಸಡ್ಡು ಹೊಡೆದಿದ್ದರು.
ತಂಡಗಳು
ಭಾರತ: ಶಿಖರ್‌ ಧವನ್‌ (ನಾಯಕ), ಶುಬ್ಮನ್‌ ಗಿಲ್‌, ಶ್ರೇಯಸ್‌ ಅಯ್ಯರ್‌, ಸೂರ್ಯಕುಮಾರ್‌ ಯಾದವ್‌, ಸಂಜು ಸ್ಯಾಮ್ಸನ್‌, ದೀಪಕ್‌ ಹೂಡ, ಅಕ್ಷರ್‌ ಪಟೇಲ್‌, ಶಾರ್ದುಲ್‌ ಠಾಕೂರ್‌, ಮೊಹಮ್ಮದ್‌ ಸಿರಾಜ್‌, ಯಜ್ವೇಂದ್ರ ಚಹಲ್‌ , ಪ್ರಸಿದ್ಧ್‌ ಕೃಷ್ಣ.
ವೆಸ್ಟ್ ಇಂಡೀಸ್‌
ಶಾಯ್‌ ಹೋಪ್‌, ಬ್ರೆಂಡನ್‌ ಕಿಂಗ್‌, ಶಮ್ರಾ ಬ್ರೂಕ್ಸ್‌, ಕೈಲ್‌ ಮೇಯರ್ಸ್‌, ನಿಕೋಲಸ್‌ ಪೂರನ್, ರೋವ್ಮನ್‌ ಪೊವೆಲ್‌, ರೊಮಾರಿಯೊ ಶೆಫರ್ಡ್‌, ಅಕೆಲ್‌ ಹೊಸೇನ್‌, ಗುಡ್ಕೇಶ್ ಮೋತಿ, ಅಲ್ಜಾರಿ ಜೋಸೆಫ್‌, ಜೇಡೆನ್‌ ಸೀಲ್ಸ್.
ಪಂದ್ಯದ ತಾಣ : ಕ್ವೀನ್ಸ್‌ ಪಾರ್ಕ್‌ ಓವಲ್‌, ಪೋರ್ಟ್‌ ಆಫ್‌ ಸ್ಪೇನ್‌
ಸಮಯ : ರಾತ್ರಿ ೭ರಿಂದ
ಇದನ್ನೂ ಓದಿ | India vs WI ODI| ವೆಸ್ಟ್ ಇಂಡೀಸ್‌ ವಿರುದ್ಧ ಭಾರತಕ್ಕೆ 3 ರನ್‌ಗಳ ರೋಚಕ ಗೆಲುವು