ಮುಂಬಯಿ: ಉದ್ಘಾಟನಾ ಆವೃತ್ತಿಯ ಮಹಿಳೆಯರ ಪ್ರೀಮಿಯರ್ ಲೀಗ್ನ (WPL 2023) ಆರಂಭದಿಂದಲೂ ಕಳಪೆ ಪ್ರದರ್ಶನ ನೀಡುತ್ತಾ ಬಂದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮತ್ತೆ ತನ್ನ ಚಾಳಿ ಮುಂದುವರಿಸಿತು. ಹೀಗಾಗಿ ಯುಪಿ ವಾರಿಯರ್ಸ್ ವಿರುದ್ಧದ ಪಂದ್ಯದಲ್ಲಿ 10 ವಿಕೆಟ್ಗಳ ಹೀನಾಯ ಸೋಲಿಗೆ ಒಳಗಾಯಿತು. ಸ್ಮೃತಿ ಮಂಧಾನಾ ನೇತೃತ್ವದ ತಂಡಕ್ಕೆ ಟೂರ್ನಿಯಲ್ಲಿ ಇದು ನಾಲ್ಕನೇ ಸತತ ನಾಲ್ಕನೇ ಸೋಲು ಹಾಗೂ ಗೆಲುವಿನ ಖಾತೆ ತೆರೆಯಲು ಇನ್ನೂ ಸಾಧ್ಯವಾಗಲಿಲ್ಲ. ಅಲ್ಲದೆ ಅಂಕಪಟ್ಟಿಯಲ್ಲಿ ಕೊನೇ ಸ್ಥಾನವನ್ನೇ ನೆಚ್ಚಿಕೊಂಡಿತು.
ಇಲ್ಲಿನ ಬ್ರಬೋರ್ನ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಆರ್ಸಿಬಿ ತಂಡ 19.3 ಓವರ್ಗಳಲ್ಲಿ 138 ರನ್ಗಳಿಗೆ ಆಲ್ಔಟ್ ಆಯಿತು. ಸಾಧಾರಣ ಗುರಿ ಬೆನ್ನಟ್ಟಿದ ಯುಪಿ ವಾರಿಯರ್ಸ್ ಬಳಗ 13 ಓವರ್ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 139 ರನ್ ಬಾರಿಸಿತು. ಯುಪಿ ತಂಡದ ನಾಯಕಿ ಅಲಿಸಾ ಹೀಲಿ 47 ಎಸೆತಗಳಲ್ಲಿ ಅಜೇಯ 96 ಬಾರಿಸಿ ಗೆಲವಿನ ರೂವಾರಿ ಎನಿಸಿಕೊಂಡರು. ಆದರೆ, ನಾಲ್ಕು ರನ್ಗಳ ಕೊರತೆಯಿಂದ ಡಬ್ಲ್ಯುಪಿಎಲ್ನ ಮೊದಲ ಶತಕಧಾರಿ ಎಂಬ ಸಾಧನೆ ಮಾಡುವ ಅವಕಾಶದಿಂದ ವಂಚಿತರಾದರು. ಅವರಿಗೆ ಉತ್ತಮ ನೆರವು ಕೊಟ್ಟ ದೇವಿಕಾ ವೈದ್ಯ 36 ರನ್ ಬಾರಿಸಿದರು.
ಇಲ್ಲಿನ ಬ್ರಬೊರ್ನ್ ಕ್ರಿಕೆಟ್ ಸ್ಟೇಡಿಯಮ್ನಲ್ಲಿ ಟಾಸ್ ಗೆದ್ದ ಆರ್ಸಿಬಿ ನಾಯಕಿ ಸ್ಮೃತಿ ಮಂಧಾನಾ ದೊಡ್ಡ ಮೊತ್ತ ಪೇರಿಸುವ ವಿಶ್ವಾಸ ವ್ಯಕ್ತಪಡಿಸಿದ್ದರು. ಆದರೆ, ಅವರ ಯೋಜನೆ ಉಲ್ಟಾ ಹೊಡೆಯಿತು. 19.3 ಓವರ್ಗಳಲ್ಲಿ 138 ರನ್ಗಳಿಗೆ ಆಲ್ಔಟ್ ಆಯಿತು. 12.4 ಓವರ್ಗಳಲ್ಲಿ 100 ರನ್ ಬಾರಿಸಿದ್ದ ಆರ್ಸಿಬಿ ಬಳಿಕ ಏಕಾಏಕಿ ಕುಸಿತ ಕಂಡಿತು. ಯುಪಿ ವಾರಿಯರ್ಸ್ ಬಳಗ ಶಿಸ್ತಿನ ಬೌಲಿಂಗ್ ದಾಳಿ ಸಂಘಟಿಸಿ ದುರ್ಬಲ ಆರ್ಸಿಬಿ ಬ್ಯಾಟಿಂಗ್ ಪಡೆಯನ್ನು ಹಿಮ್ಮೆಟ್ಟಿಸಿತು. ಯುಪಿ ತಂಡ ಒಂದೇ ಒಂದು ಇತರ ರನ್ ನೀಡದಿರುವುದು ಅವರ ಬೌಲಿಂಗ್ ಶಿಸ್ತಿಗೆ ಸಾಕ್ಷಿ ಎನಿಸಿಕೊಂಡಿತು. ಎಲಿಸ್ ಪೆರಿ (52) ಅರ್ಧ ಶತಕ ಬಾರಿಸಿದ್ದೇ ಆರ್ಸಿಬಿ ಅಭಿಮಾನಿಗಳ ಪಾಲಿಗೆ ಸಮಾಧಾನಕರ ಸಂಗತಿ.
ಸ್ಮೃತಿ ಮಂಧಾನಾ ಮತ್ತೆ ಫೇಲ್
ಡಬ್ಲ್ಯುಪಿಎಲ್ನ (WPL 2023) ದುಬಾರಿ ಬೆಲೆಯ ಆಟಗಾರ್ತಿ ಸ್ಮೃತಿ ಮಂಧಾನಾ ಮತ್ತೆ ಬ್ಯಾಟಿಂಗ್ ವೈಫಲ್ಯ ಎದುರಿಸಿದರು. ಭಯದಿಂದಲೇ ಬ್ಯಾಟಿಂಗ್ ಆರಂಭಿಸಿದ ಅವರು 4 ರನ್ ಗಳಿಸಿ ಪೆವಿಲಿಯನ್ಗೆ ಮರಳಿದರು. 3.4 ಕೋಟಿ ರೂಪಾಯಿ ಪಡೆದಿದ್ದ ಅವರು ಈ ಪಂದ್ಯದಲ್ಲಾದರೂ ಉತ್ತಮ ಪ್ರದರ್ಶನ ನೀಡಬಹುದೆಂಬ ನಿರೀಕ್ಷೆ ಹುಸಿಯಾಯಿತು. ಮತ್ತೊಬ್ಬರು ಆರಂಭಿಕ ಬ್ಯಾಟರ್ ಸೋಫಿ ಡಿವೈನ್ 34 ರನ್ ಬಾರಿಸಿ ತಂಡಕ್ಕೆ ಸ್ವಲ್ಪ ಮಟ್ಟಿಗೆ ನೆರವಾದರು. ಸೋಫಿ ಮತ್ತು ಎಲಿಸ್ ಹೊರತುಪಡಿಸಿ ಉಳಿದ ಬ್ಯಾಟರ್ಗಳು ರನ್ ಗಳಿಸಲು ಪ್ರಯತ್ನವೇ ಪಡಲಿಲ್ಲ.
ಕನಿಕಾ ಅಹುಜಾ (8), ಹೇದರ್ ನೈಟ್ (2), ರಿಚಾ ಘೋಷ್ (1), ಕೋಮಲ್ ಜಂಜಾದ್ (5), ರೇಣುಕಾ ಸಿಂಗ್ (3) ಒಂದಂಕಿ ಮೊತ್ತಕ್ಕೆ ಸೀಮಿತಗೊಂಡರು. ಶ್ರೇಯಾಂಕಾ ಪಾಟೀಲ್ (15), ಎರಿನ್ ಬರ್ನ್ಸ್ (12) ಪ್ರಯತ್ನವೂ ಲೆಕ್ಕಕ್ಕೆ ಸಿಗಲಿಲ್ಲ. ಅನಗತ್ಯ ರನ್ಔಟ್, ಬೇಕಾಬಿಟ್ಟಿ ಹೊಡೆತಕ್ಕೆ ಆರ್ಸಿಬಿ ತಂಡ ಬೆಲೆ ತೆರಬೇಕಾಯಿತು.
ಯುಪಿ ವಾರಿಯರ್ಸ್ ತಂಡ ಪರ ಸೋಫಿಯಾ ಎಕ್ಲೆಸ್ಟೋನ್ 14 ರನ್ಗಳಿಗೆ 4 ವಿಕೆಟ್ ಉರುಳಿಸಿದರೆ ದೀಪ್ತಿ ಶರ್ಮಾ 26 ರನ್ಗಳಿಗೆ 3 ವಿಕೆಟ್ ಉರುಳಿಸಿದರು.