ರಾಂಚಿ : ನ್ಯೂಜಿಲ್ಯಾಂಡ್ ವಿರುದ್ಧದ ಟಿ20 ಸರಣಿಯ (INDvsNZ T20) ಮೊದಲ ಪಂದ್ಯದಲ್ಲಿ ವಿಕೆಟ್ಕೀಪರ್ ಬ್ಯಾಟರ್ ಇಶಾನ್ ಕಿಶನ್ ಅವಕಾಶ ಪಡೆದುಕೊಂಡಿದ್ದಾರೆ. ಈ ಮೂಲಕ ಅವರು ಭಾರತ ತಂಡದ ಪರ ಇನಿಂಗ್ಸ್ ಆರಂಭಿಸಲಿದ್ದಾರೆ. ಅತ್ತ ಉತ್ತಮ ಫಾರ್ಮ್ನಲ್ಲಿರುವ ಶುಭ್ಮನ್ ಗಿಲ್ ಕೂಡ ಆರಂಭಿಕರಾಗಿ ಬ್ಯಾಟ್ ಮಾಡುತ್ತಾರೆ ಎಂಬುದಾಗಿ ನಾಯಕ ಹಾರ್ದಿಕ್ ಪಾಂಡ್ಯ ಘೋಷಿಸಿದ್ದಾರೆ. ಈ ಮೂಲಕ ಭಾರತ ತಂಡದ ಪರ ಏಕ ದಿನ ಮಾದರಿಯಲ್ಲಿ ದ್ವಿ ಶತಕದ ಸಾಧನೆ ಮಾಡಿದ ಇಬ್ಬರು ಇನಿಂಗ್ಸ್ ಆರಂಭಿಸಿದಂತಾಗುತ್ತದೆ.
ಇಶಾನ್ ಕಿಶನ್ ಬಾಂಗ್ಲಾದೇಶ ಪ್ರವಾಸದಲ್ಲಿ 131 ಎಸೆತಗಳಲ್ಲಿ 210 ರನ್ ಬಾರಿಸಿದ್ದರು. ಶುಬ್ಮನ್ ಗಿಲ್ ನ್ಯೂಜಿಲ್ಯಾಂಡ್ ವಿರುದ್ಧದ ಏಕ ದಿನ ಸರಣಿಯಲ್ಲಿ 208 ರನ್ ಬಾರಿಸಿದ್ದಾರೆ. ಇಬ್ಬರೂ ಉತ್ತಮ ಫಾರ್ಮ್ನಲ್ಲಿ ಇರುವ ಕಾರಣ ಅವರಿಗೆ ಆರಂಭಿಕರಾಗಿ ಬ್ಯಾಟ್ ಮಾಡಲು ಅವಕಾಶ ನೀಡಲಾಗಿದೆ. ಆದರೆ, ಇಶಾನ್ ಕಿಶನ್ ಸೇರ್ಪಡೆಯಿಂದಾಗಿ ಅವಕಾಶಕ್ಕಾಗಿ ಕಾಯುತ್ತಿದ್ದ ಪೃಥ್ವಿ ಶಾ ಅವರಿಗೆ ನಿರಾಸೆಯಾಗಿದೆ. ಇಶಾನ್ಗೆ ಅವಕಾಶ ನೀಡದೇ ಹೋಗಿದ್ದರೆ ಪೃಥ್ವಿ ಶಾ ತಂಡಕ್ಕೆ ಸೇರ್ಪಡೆಯಾಗುತ್ತಿದ್ದರು.
ಜಾರ್ಖಂಡ್ ಇಶಾನ್ ಕಿಶನ್ ಅವರ ತವರೂರು. ಧೋನಿಯಂತೆ ಅವರು ಕೂಡ ಜೆಎಸ್ಸಿಎ ಇಂಟರ್ನ್ಯಾಷನಲ್ ಸ್ಟೇಡಿಯಮ್ ಕಾಂಪ್ಲೆಕ್ಸ್ನಲ್ಲಿ ಆಡಿದವರು. ತವರಿನಲ್ಲಿ ಅವರಿಗೆ ಮಿಂಚುವ ಅವಕಾಶ ಇರುವ ಕಾರಣ ಆಡುವ 11ರ ಬಳಗದಲ್ಲಿ ಸ್ಥಾನ ಕಲ್ಪಿಸಲಾಗಿದೆ.
ಇದನ್ನೂ ಓದಿ : IND VS NZ | ಇದು ಕ್ರಿಕೆಟ್ ಅಲ್ಲ, ಇಶಾನ್ ಕಿಶನ್ಗೆ ಸುನೀಲ್ ಗವಾಸ್ಕರ್ ಎಚ್ಚರಿಕೆ ನೀಡಿದ್ದು ಏಕೆ?
ಭಾರತ ತಂಡದ ಪರವಾಗಿ ದ್ವಿ ಶತಕದ ಸಾಧಕರು ಇನಿಂಗ್ಸ್ ಆರಂಭ ಮಾಡುವುದು ಇದೇ ಮೊದಲಲ್ಲ. ಏಕ ದಿನ ಸರಣಿ ಪಂದ್ಯಗಳಲ್ಲಿ ರೋಹಿತ್ ಶರ್ಮ ಹಾಗೂ ಶುಬ್ಮನ್ ಗಿಲ್ ಇನಿಂಗ್ಸ್ ಆರಂಭ ಮಾಡಿದಾಗಲೂ ಇದೇ ದಾಖಲೆ ಸೃಷ್ಟಿಯಾಗಿತ್ತು.