ತಂದೆಯ ದಾಖಲೆ ಸರಿಗಟ್ಟಿದ ನೆದರ್ಲೆಂಡ್ಸ್‌ನ ​ಬಾಸ್ ಡಿ ಲೀಡೆ; ಇದು ವಿಶ್ವಕಪ್​ನ ಮೊದಲ ನಿದರ್ಶನ

ಹೈದರಾಬಾದ್​: ಪಾಕಿಸ್ತಾನ(Pakistan vs Netherlands) ವಿರುದ್ಧ ಶುಕ್ರವಾರ ನಡೆದ ಪಂದ್ಯದಲ್ಲಿ ಬ್ಯಾಟಿಂಗ್​ ಮತ್ತು ಬೌಲಿಂಗ್​ನಲ್ಲಿ ಆಲ್​ರೌಂಡರ್​ ಪ್ರದರ್ಶನ ತೋರಿದ ನೆದರ್ಲೆಂಡ್ಸ್‌ನ ಆಲ್​ರೌಂಡರ್​ ಬಾಸ್ ಡಿ ಲೀಡೆ(bas de leede) ಅವರು ತಮ್ಮ ತಂದೆಯ(Tim and Bas de Leede) ದಾಖಲೆಯೊಂದನ್ನು ಸರಿಗಟ್ಟಿದ್ದಾರೆ. ತಂದೆ ಮಗನ ಈ ಸಾಧನೆ ವಿಶ್ವಕಪ್​ನ(icc world cup 2023) ಮೊದಲ ನಿದರ್ಶನವಾಗಿದೆ.

ಬಾಸ್ ಡಿ ಲೀಡೆ ಅವರು ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ 9 ಓವರ್ ಎಸೆದು ಕೇವಲ 62 ರನ್​ ವೆಚ್ಚದಲ್ಲಿ 4 ವಿಕೆಟ್​ ಪಡೆದರು. ಇದೇ ವೇಳೆ ಇನಿಂಗ್ಸ್​ ಒಂದರಲ್ಲಿ ನಾಲ್ಕು ವಿಕೆಟ್‌ಗಳನ್ನು ಪಡೆದ ನೆದರ್ಲೆಂಡ್ಸ್‌ನ ನಾಲ್ಕನೇ ಬೌಲರ್​ ಎನಿಸಿಕೊಂಡರು. ಈ ಮೂಲಕ ತಮ್ಮ ತಂದೆ ಟಿಮ್​ ಡಿ ಲೀಡೆ(Tim de Leede) ಅವರು 2003ರ ವಿಶ್ವಕಪ್​ನಲ್ಲಿ ನಿರ್ಮಿಸಿದ್ದ ದಾಖಲೆಯನ್ನು ಸರಿಗಟ್ಟಿದರು.

ಭಾರತ ವಿರುದ್ಧ ಸಾಧನೆ ತೋರಿದ್ದ ತಂದೆ

2003 ಏಕದಿನ ವಿಶ್ವಕಪ್‌ನಲ್ಲಿ ಟಿಮ್​ ಡಿ ಲೀಡೆ ಅವರು ಭಾರತದ ವಿರುದ್ಧ 35 ರನ್‌ಗಳಿಗೆ ನಾಲ್ಕು ವಿಕೆಟ್‌ಗಳನ್ನು ಕಿತ್ತಿದ್ದರು. ಇದೀಗ ಪಾಕ್​ ವಿರುದ್ಧ ಬಾಸ್ ಡಿ ಲೀಡೆ ನಾಲ್ಕು ವಿಕೆಟ್​ ಕೀಳುವ ಮೂಲಕ ತಂದೆಯ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಇದು ವಿಶ್ವಕಪ್ ಪಂದ್ಯವೊಂದರಲ್ಲಿ ತಂದೆ-ಮಗ ಜೋಡಿ ಒಂದೇ ಸಂಖ್ಯೆಯ ವಿಕೆಟ್‌ಗಳನ್ನು ಪಡೆದ ಮೊದಲ ನಿದರ್ಶನವಾಗಿದೆ. ವಿಕೆಟ್​ ಪಡೆದ ಬಳಿಕ ತಂದೆಯ ಶೈಲಿಯಲ್ಲೇ ಮಗ ಕೂಡ ಸಂಭ್ರಮಾಚರಣೆ ಮಾಡಿ ಗಮನ ಸೆಳೆದರು. ಇದಕ್ಕೆ ನೆಟ್ಟಿಗರು ತಂದೆಗೆ ತಕ್ಕ ಮಗ ಎಂದು ಕಮೆಂಟ್​ ಮಾಡಿದ್ದಾರೆ.

ಟಿಮ್​ ಡಿ ಲೀಡೆ ಅವರು ಸಚಿನ್ ತೆಂಡೂಲ್ಕರ್, ರಾಹುಲ್ ದ್ರಾವಿಡ್, ಹರ್ಭಜನ್ ಸಿಂಗ್ ಮತ್ತು ಜಹೀರ್ ಖಾನ್ ಅವರ ವಿಕೆಟ್​ ಕಿತ್ತು ಈ ಸಾಧನೆ ಮಾಡಿದ್ದರು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್​ ನಡೆಸಿದ್ದ ಭಾರತ 204 ರನ್​ಗೆ ಆಲೌಟ್​ ಆಗಿತ್ತು. ಗುರಿ ಬೆನ್ನಟ್ಟಿದ ನೆದರ್ಲೆಂಡ್ಸ್‌ 136 ರನ್​ಗೆ ಸರ್ವಪತನ ಕಂಡು 68 ರನ್​ಗಳ ಸೋಲು ಕಂಡಿತ್ತು. ಜಾವಗಲ್ ಶ್ರೀನಾಥ್ ಮತ್ತು ಅನಿಲ್ ಕುಂಬ್ಳೆ ತಲಾ ನಾಲ್ಕು ವಿಕೆಟ್‌ ಕಿತ್ತು ಡಚ್ಚರ ಹಡೆಮುರಿ ಕಟ್ಟಿದ್ದರು.

ಇದನ್ನೂ ಓದಿ ICC World Cup 2023 : ಏಕ ದಿನ ಕ್ರಿಕೆಟ್ ಮಾದರಿ ಯುಗಾಂತ್ಯ? ಮೈದಾನಗಳು ಯಾಕೆ ಖಾಲಿ ಖಾಲಿ?

ರಾವುಫ್​ಗೆ ಕಣ್ಣು ಹೊಡೆದ ಲೀಡೆ

ಇದೇ ಪಂದ್ಯದಲ್ಲಿ ನೆದರ್ಲೆಂಡ್ಸ್‌ನ ಆಲ್​ರೌಂಡರ್​ ಬಾಸ್ ಡಿ ಲೀಡೆ(Bas de Leede) ಅವರು ಹ್ಯಾರಿಸ್‌ ರವೂಫ್ ಎಸೆತಕ್ಕೆ ಸಿಕ್ಸರ್​ ಬಾರಿಸಿ ಕಣ್ಣು ಹೊಡೆದ ವಿಡಿಯೊ ವೈರಲ್​ ಆಗಿದೆ. ಈ ವಿಡಿಯೊವನ್ನು ಐಸಿಸಿ ತನ್ನ ಅಧಿಕೃತ ಟ್ವಿಟರ್​ ಮತ್ತು ಇನ್​ಸ್ಟಾಗ್ರಾಮ್​ ಖಾತೆಯಲ್ಲಿ ಹಂಚಿಕೊಂಡಿದೆ.

ಹ್ಯಾರಿಸ್ ರವೂಫ್ ಅವರು 29ನೇ ಓವರ್‌ನ ನಾಲ್ಕನೇ ಎಸೆತವನ್ನು ಬೌನ್ಸರ್​ ಎಸೆದರು. ಕ್ರೀಸ್​ನಲ್ಲಿದ್ದ ಬಾಸ್ ಡಿ ಲೀಡೆ ಚೆಂಡನ್ನು ಲೀಲಾಜಾಲವಾಗಿ ಸಿಕ್ಸರ್‌ಗೆ ಬಡಿದಟ್ಟಿದರು. ಸೊಗಸಾದ ಸಿಕ್ಸರ್​ ಬಾರಿಸಿದ ಸಂತಸದಲ್ಲಿ ಅವರು ರವೂಫ್​ಗೆ ಕಣ್ಣು ಹೊಡೆದು ನಗೆ ಬೀರಿದರು. ಇದೇ ವೇಳೆ ಕಾಮೆಂಟ್ರಿಯಲ್ಲಿದ್ದವರು ‘ಅಬ್ಬಾ ಎಂತದ ಹೊಡೆದ. ನಿಜಕ್ಕೂ ಅದ್ಭುತ ಸಿಕ್ಸರ್​’ ಎಂದು ಬಣ್ಣಿಸಿದರು. ಬ್ಯಾಟಿಂಗ್​ ಮತ್ತು ಬೌಲಿಂಗ್​ನಲ್ಲಿ ಆಲ್​ರೌಂಡರ್​ ಪ್ರದರ್ಶನ ತೋರಿದ ಬಾಸ್ ಡಿ ಲೀಡೆ 6 ಬೌಂಡರಿ ಮತ್ತು 2 ಸಿಕ್ಸರ್​ ನೆರವಿನಿಂದ 67 ರನ್​ ಬಾರಿಸಿದರು.