ನವದೆಹಲಿ: ಭಾರತ ಕ್ರಿಕೆಟ್‌ ತಂಡದ ಆಟಗಾರ ವಿರಾಟ್ ಕೊಹ್ಲಿ ಮತ್ತು ಬಾಲಿವುಡ್‌ ನಟಿ ಅನುಷ್ಕಾ ಶರ್ಮ ದಂಪತಿಯ (Virat-Anushka)6ನೇ ವಿವಾಹ ವಾರ್ಷಿಕೋತ್ಸವ ಸೋಮವಾರ (ಡಿಸೆಂಬರ್‌ 11) ನಡೆಯಿತು. ಈ ಜೋಡಿಗೆ ಅಭಿಮಾನಿಗಳು ಮತ್ತು ಮಿತ್ರರು ಶುಭ ಕೋರಿದರು. ಈ ಜೋಡಿ ಲಂಡನ್‌ನಲ್ಲಿ ತಮ್ಮ ಸ್ನೇಹಿತರು ಮತ್ತು ಕುಟುಂಬದ ಸದಸ್ಯರ ಜತೆ ಕೇಕ್‌ ಕಟ್‌ ಮಾಡಿ ವಾರ್ಷಿಕೋತ್ಸವ ಆಚರಿಸಿಕೊಂಡಿತು.
ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮ ಈ ಸಂಭ್ರಮದ ಕ್ಷಣಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಅನುಷ್ಕಾ ತಮ್ಮನ್ನು ಹಿಂದಿನಿಂದ ತಬ್ಬಿಕೊಂಡಿರುವ ಚಿತ್ರವನ್ನು ವಿರಾಟ್ ಕೊಹ್ಲಿ ಪೋಸ್ಟ್‌ ಮಾಡಿದ್ದಾರೆ.
ಇತ್ತ ಅನುಷ್ಕಾ ಕೂಡ ತಮ್ಮಿಬ್ಬರ ಫೋಟೊ ಶೇರ್‌ ಮಾಡಿ ʼಪ್ರೀತಿ ತುಂಬಿದ, ಸ್ನೇಹಿತರು ಮತ್ತು ಕುಟುಂಬದೊಂದಿಗಿನ ದಿನʼ ಎಂದು ಬರೆದುಕೊಂಡಿದ್ದಾರೆ. ಇಬ್ಬರೂ ಕಪ್ಪು ಬಟ್ಟೆಯಲ್ಲಿ ಆಕರ್ಷಕವಾಗಿ ಕಂಡು ಬಂದಿದ್ದಾರೆ.
ಇಬ್ಬರೂ ಸೇರಿ ಕೇಕ್‌ ಕಟ್‌ ಮಾಡಿದ್ದಾರೆ. ಅನುಷ್ಕಾ ಅವರ ಸಹೋದರ, ನಿರ್ಮಾಪಕ ಕರ್ಣೇಶ್ ಶರ್ಮಾ, ನಟಿ ಸಾಗರಿಕಾ ಘಾಟ್ಗೆ ಮತ್ತು ಸ್ಟ್ಯಾಂಡ್-ಅಪ್ ಕಾಮಡಿಯನ್‌ ಅಭಿಷೇಕ್ ಉಪಮನ್ಯು ಮತ್ತಿತರರು ಉಪಸ್ಥಿತರಿದ್ದರು.
ಅನುಷ್ಕಾ ಕೇಕ್‌ ತಿನ್ನಿಸುವಾಗ ಕೊಹ್ಲಿ ನಾಲಿಗೆ ಹೊರ ಚಾಚಿ ತಮಾಷೆಯಾಗಿ ಫೋಸ್‌ ಕೊಟ್ಟಿದ್ದಾರೆ. ಇದಕ್ಕೆ ಹಲವರು ಕಮೆಂಟ್‌ ಮೂಲಕ ಕಾಲೆಳೆದಿದ್ದಾರೆ.
“ಜಸ್ಟ್ ಲುಕ್ ಲೈಕ್ ಎ ವಾವ್” ಎಂದು ಹಲವರು ಕಮೆಂಟ್‌ ಮೂಲಕ ವಿರುಷ್ಕಾ ಜೋಡಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಕೊಹ್ಲಿ ಮತ್ತು ಅನುಷ್ಕಾ 2017 ಡಿ. 11ರಂದು ದಾಂಪತ್ಯ ಜೀವನಕ್ಕೆ ಕಾಲಿರಿಸಿದ್ದರು. ಈ ಜೋಡಿಯ ವಿವಾಹ ಇಟಲಿಯ ಐತಿಹಾಸಿಕ ರೋಮ್‌ ನಗರದ ಟಸ್ಕನಿ ಎಂಬ ಹಳ್ಳಿಯ ಬೋರ್ಗೋ ಫಿನೊಶಿಯೆಟೊ ಎಂಬ ರೆಸಾರ್ಟ್‌ನಲ್ಲಿ ಖಾಸಗಿಯಾಗಿ ನಡೆದಿತ್ತು.
2021ರ ಜನವರಿಯಲ್ಲಿ ಅನುಷ್ಕಾ ಮೊದಲ ಮಗುವಿಗೆ ಜನ್ಮ ನೀಡಿದ್ದರು. ಈ ಹೆಣ್ಣು ಮಗುವಿಗೆ ವಮಿಕಾ ಎಂದು ಹೆಸರಿಡಲಾಗಿದೆ.
ಇದನ್ನೂ ಓದಿ: Virat-Anushka: ವಿವಾಹ ವಾರ್ಷಿಕೋತ್ಸವ ಸಂಭ್ರಮದಲ್ಲಿ ಕೊಹ್ಲಿ-ಅನುಷ್ಕಾ ಜೋಡಿ