ಮುಂಬಯಿ: ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ಉತ್ಕೃಷ್ಟ ಮಟ್ಟದ ಪ್ರದರ್ಶನ ತೋರಿದ ಡೆಲ್ಲಿ ಕ್ಯಾಪಿಟಲ್ಸ್(Delhi Capitals) ತಂಡ ಆರ್ಸಿಬಿ(Royal Challengers Bangalore) ವಿರುದ್ಧ ಭರ್ಜರಿ 60 ರನ್ ಗೆಲುವು ದಾಖಲಿಸಿದೆ. ಈ ಮೂಲಕ ಟೂರ್ನಿಯಲ್ಲಿ ಗೆಲುವಿನ ಶುಭಾರಂಭ ಮಾಡಿದೆ.
ಮುಂಬಯಿಯ ಬ್ರಬೋರ್ನ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಡೆಲ್ಲಿ ಕ್ಯಾಪಿಟಲ್ಸ್ ಲೇಡಿ ಸೆಹವಾಗ್ ಖ್ಯಾತಿಯ ಡ್ಯಾಶಿಂಗ್ ಓಪನರ್ ಶಫಾಲಿ ವರ್ಮಾ(84) ಮತ್ತು ನಾಯಕಿ ಮೆಗ್ ಲ್ಯಾನಿಂಗ್(72) ಅವರ ಸ್ಫೋಟಕ ಬ್ಯಾಟಿಂಗ್ ಸಾಹಸದಿಂದ ನಿಗದಿತ 20 ಓವರ್ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 223 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಆರ್ಸಿಬಿ ತನ್ನ ಪಾಲಿನ ಓವರ್ನಲ್ಲಿ 8 ವಿಕೆಟ್ ಕಳೆದುಕೊಂಡು 163 ರನ್ ಗಳಿಸಿ ಶರಣಾಯಿತು.
ನಾಟಕೀಯ ಕುಸಿತ ಕಂಡ ಆರ್ಸಿಬಿ
ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಆರ್ಸಿಬಿ ಉತ್ತಮ ಆರಂಭ ಪಡೆಯಿತು. ನಾಯಕಿ ಸ್ಮೃತಿ ಮಂಧಾನಾ ಮತ್ತು ನ್ಯೂಜಿಲ್ಯಾಂಡ್ ತಂಡದ ಅನುಭವಿ ಆಟಗಾರ್ತಿ ಸೋಫಿ ಡಿವೈನ್‌ ಬಿರುಸಿನ ಬ್ಯಾಟಿಂಗ್ ಮೂಲಕ ಡೆಲ್ಲಿ ಬೌಲರ್ಗಳನ್ನು ಕಾಡಿದರು. 4 ಓವರ್ಗೆ 40 ರನ್ ಬಾರಿಸಿ ತಂಡಕ್ಕೆ ಉತ್ತಮ ಆರಂಭ ಒದಗಿಸಿದರು. ಇವರ ಆಟವನ್ನು ಗಮನಿಸುವಾಗ ಆರ್ಸಿಬಿ ಈ ದೊಡ್ಡ ಮೊತ್ತವನ್ನು ಸಲೀಸಾಗಿ ಚೇಸ್ ಮಾಡಬಹುದೆಂದು ನಿರೀಕ್ಷಿಸಲಾಗಿತ್ತು. ಆದರೆ ಉಭಯ ಆಟಗಾರ್ತಿಯರ ವಿಕೆಟ್ ಪತನದ ಬಳಿಕ ಆರ್ಸಿಬಿ ನಾಟಕೀಯ ಕುಸಿತ ಕಂಡು ಸೋಲು ಕಂಡಿತು.
ಸ್ಮೃತಿ ಮಂಧಾನಾ 23 ಎಸೆತ ಎದುರಿಸಿ 35 ರನ್ ಬಾರಿಸಿದರೆ, ಎಲ್ಲಿಸ್ ಪೆರಿ 31 ರನ್ ಗಳಿಸಿದರು. ಹಾರ್ಡ್ ಹಿಟ್ಟರ್ ಖ್ಯಾತಿಯ ರಿಚಾ ಘೋಷ್ ಕೇವಲ 2 ರನ್ಗೆ ಸೀಮಿತವಾಗಿ ನಿರಾಸೆ ಮೂಡಿಸಿದರು. ಅಂತಿಮವಾಗಿ ಏಕಾಂಗಿ ಹೋರಾಟ ನಡೆಸಿದ ಇಂಗ್ಲೆಂಡ್ ತಂಡದ ನಾಯಕಿ ಹೀತರ್ ನೇಟ್ 34 ರನ್ ಬಾರಿಸಿ ತಂಡದ ಸೋಲಿನ ಅಂತರವನ್ನು ತಗ್ಗಿಸಿದರು. ಡೆಲ್ಲಿ ಪರ ಘಾತಕ ಬೌಲಿಂಗ್ ದಾಳಿ ನಡೆಸಿದ ತಾರಾ ನೋರಿಸ್ 4 ಓವರ್ಗಳಲ್ಲಿ 29 ರನ್ ನೀಡಿ 5 ವಿಕೆಟ್ ಕಿತ್ತು ಮಿಂಚಿದರು. ಉಳಿದಂತೆ ಅಲೈಸ್‌ ಕ್ಯಾಪ್ಸಿ 2 ವಿಕೆಟ್ ಉರುಳಿಸಿದರು.
ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಡೆಲ್ಲಿ
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ ಡೆಲ್ಲಿ ಪರ ಶಫಾಲಿ ವರ್ಮಾ(Shafali Verma) ಮತ್ತು ಮೆಗ್ ಲ್ಯಾನಿಂಗ್(Meg Lanning) ಆರಂಭದಿಂದಲೇ ಸ್ಫೋಟಕ ಬ್ಯಾಟಿಂಗ್ ನಡೆಸಿ ಆರ್ಸಿಬಿ ಬೌಲರ್ಗಳ ಮೇಲೆ ಸವಾರಿ ನಡೆಸಿದರು. ಪ್ರತಿ ಓವರ್ನಲ್ಲಿಯೂ ಸಿಕ್ಸರ್ ಬೌಂಡರಿ ಬಾರಿಸಿ ಕಾಡಿದರು. ಓವರ್ಗೆ 10ರ ಸರಾಸರಿಯಲ್ಲಿ ರನ್ ರಾಶಿ ಹಾಕಿದರು.
ಜಿದ್ದಿಗೆ ಬಿದ್ದವರಂತೆ ಆಡಿದ ಉಭಯ ಆಟಗಾರ್ತಿಯರು ಅರ್ಧಶತಕ ಬಾರಿಸಿ ಮಿಂಚಿದರು. ಆದರೆ 72 ರನ್ ಗಳಿಸಿದ ವೇಳೆ ಮೆಗ್ ಲ್ಯಾನಿಂಗ್ ಅವರು ಹೀತರ್ ನೈಟ್ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆದರು. ಅವರು 43 ಎಸೆತ ಎದುರಿಸಿ 13 ಬೌಂಡರಿ ಬಾರಿಸಿದರು. ಈ ವಿಕೆಟ್ ಪತನದ ಬೆನ್ನಲೇ ಶಫಾಲಿ ವರ್ಮಾ ಕೂಡ ವಿಕೆಟ್ ಕೈಚೆಲ್ಲಿದರು. ಈ ಎರಡೂ ವಿಕೆಟ್ ಕೂಡ ಹೀತರ್ ನೈಟ್ ಪಾಲಾಯಿತು. ಶಫಾಲಿ ಮತ್ತು ಲ್ಯಾನಿಂಗ್ ಮೊದಲ ವಿಕೆಟ್ಗೆ 162 ರನ್ ಜತೆಯಾಟ ನಡೆಸಿದರು.
ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಶಫಾಲಿ ವರ್ಮಾ 45 ಎಸೆತ ಎದುರಿಸಿ 10 ಬೌಂಡರಿ ಮತ್ತು 4 ಸಿಕ್ಸರ್ ಸಹಿತ 84 ರನ್ ಬಾರಿಸಿ ಮಿಂಚಿದರು. ಅಂತಿಮವಾಗಿ ಜೆಮಿಮಾ ರೋಡ್ರಿಗಸ್(22), ಮರಿಜಾಯನ್ ಕಾಪ್(39) ಬಿರುಸಿನ ಬ್ಯಾಟಿಂಗ್ ನಡೆಸಿ ತಂಡದ ಬೃಹತ್ ಮೊತ್ತಕ್ಕೆ ಕಾರಣರಾದರು. ಮರಿಜಾಯನ್ ಕಾಪ್ 17 ಎಸೆತದಲ್ಲಿ ತಲಾ ಮೂರು ಸಿಕ್ಸರ್ ಮತ್ತು ಬೌಂಡರಿ ಬಾರಿಸಿ ಅಜೇಯ 39 ರನ್ ಬಾರಿಸಿದರು. ಆರ್ಸಿಬಿ ಪರ ಹೀತರ್ ನೈಟ್ 2 ವಿಕೆಟ್ ಕಿತ್ತರು.
ಇದನ್ನೂ ಓದಿ WPL 2023: ಗೆಲುವಿನ ಹಳಿ ಏರಿತೇ ಗುಜರಾತ್ ಜೈಂಟ್ಸ್?
ಸಂಕ್ಷಿಪ್ತ ಸ್ಕೋರ್: ಡೆಲ್ಲಿ ಕ್ಯಾಪಿಟಲ್ಸ್ 20 ಓವರ್ಗಳಲ್ಲಿ2 ವಿಕೆಟ್ಗೆ 223 (ಶಫಾಲಿ ವರ್ಮಾ 84, ಮೆಗ್ ಲ್ಯಾನಿಂಗ್ 72, ಮರಿಜಾಯನ್ ಅಜೇಯ 39, ಜೆಮಿಮಾ ರೋಡ್ರಿಗಸ್ ಅಜೇಯ 22, ಕಾಪ್ ಹೀತರ್ ನೈಟ್ 40ಕ್ಕೆ 2)
ಆರ್ಸಿಬಿ: 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 163 (ಸ್ಮೃತಿ ಮಂಧಾನಾ 35, ಹೀತರ್ ನೈಟ್ 34, ಎಲಿಸ್ ಪೆರಿ 31 ತಾರಾ ನೋರಿಸ್ 29ಕ್ಕೆ 5).