ಮುಂಬಯಿ: ಹಿರಿಯ ವೇಗಿ ಮರಿಜಾನ್ ಕಾಪ್(Marizanne Kapp) ಅವರ ಘಾತಕ ಬೌಲಿಂಗ್ ದಾಳಿಗೆ ಕಂಗಾಲಾದ ಗುಜರಾತ್ ಜೈಂಟ್ಸ್ ತಂಡ 105 ರನ್ ಗಳಿಸಿದೆ. ಡೆಲ್ಲಿ ಕ್ಯಾಪಿಟಲ್ಸ್ ಗೆಲುವಿಗೆ 106 ರನ್ ಬಾರಿಸಬೇಕಿದೆ.
ಮುಂಬಯಿಯ ಡಿವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಮಹಿಳಾ ಪ್ರೀಮಿಯರ್ ಲೀಗ್ನ(WPL 2023) ಶನಿವಾರದ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್ ಜೈಂಟ್ಸ್ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ಗೆ 105 ರನ್ ಬಾರಿಸಿ ಸವಾಲೊಡ್ಡಿದೆ.
ಇನಿಂಗ್ಸ್ ಆರಂಭಿಸಿದ ಗುಜರಾತ್ ಜೈಂಟ್ಸ್ ಸ್ಥಿತಿ ಆರಂಭದಿಂದಲೇ ಶೋಚನೀಯವಾಗಿತ್ತು. ಖಾತೆ ತೆರೆಯುವ ಮುನ್ನವೇ ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿತು. ತಂಡದ ಮೊತ್ತ 20 ರನ್ ದಾಟುವ ವೇಳೆ ಪ್ರಮುಖ 4 ವಿಕೆಟ್ ಕಳೆದುಕೊಂಡು ಇನ್ನೇನು 50 ರನ್ ಆಗುವಷ್ಟರಲ್ಲಿ ಗಂಟುಮೂಟೆ ಕಟ್ಟುತ್ತದೆ ಎಂದು ಭಾವಿಸಲಾಗಿತ್ತು. ಮರಿಜಾನ್ ಪಾಕ್ ಒಂದರ ಹಿಂದೆ ಒಂದರಂತೆ ವಿಕೆಟ್ ಕೀಳುತ್ತಲೇ ಸಾಗಿದರು.
ಆರ್ಸಿಬಿ ವಿರುದ್ಧದ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಸೋಫಿಯಾ ಡಂಕ್ಲಿ ಅವರನ್ನು ಈ ಪಂದ್ಯದಿಂದ ಹೊರಗಿಟ್ಟು ಪ್ರಯೋಗ ನಡೆಸಿದ ಗುಜರಾತ್ ಕೈ ಸುಟ್ಟುಕೊಂಡಿತು. ಬೆತ್ ಮೂನಿ ಅವರ ಬದಲು ತಂಡಕ್ಕೆ ಸೇರ್ಪಡೆಯಾಗ ದಕ್ಷಿಣ ಆಫಿಕಾದ ಹಾರ್ಡ್ ಹಿಟ್ಟರ್ ಲಾರಾ ವೊಲ್ವಾರ್ಡ್ಟ್ ಕೇವಲ 1 ರನ್ಗೆ ಸೀಮಿತಗೊಂಡು ನಿರಾಸೆ ಅನುಭವಿಸಿದರು. ಹರ್ಲೀನ್ ಡಿಯೋಲ್ ಕೂಡ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸಲು ವಿಫಲವಾದದ್ದು ತಂಡದ ಬೃಹತ್ ಮೊತ್ತಕ್ಕೆ ಹಿನ್ನಡೆಯಾಯಿತು. ಡಿಯೋಲ್ 20 ರನ್ ಗಳಿಸಿದರು.
ಕೆಳ ಕ್ರಮಾಂಕದಲ್ಲಿ ಕಿಮ್ ಗಾರ್ತ್(ಅಜೇಯ 32) ಮತ್ತು ಜಾರ್ಜಿಯಾ(22) ಅವರು ಸಣ್ಣ ಮಟ್ಟದ ಹೋರಾಟವೊಂದನ್ನು ನಡೆಸಿದ ಕಾರಣ ತಂಡ ನೂರರ ಗಟಿ ದಾಟಿತು. ಡೆಲ್ಲಿ ಪರ ಮರಿಜಾನ್ ಕಾಪ್ 4 ಓವರ್ ಬೌಲಿಂಗ್ ನಡೆಸಿ 15 ರನ್ ವೆಚ್ಚದಲ್ಲಿ ಪ್ರಮುಖ 5 ವಿಕೆಟ್ ಕಿತ್ತು ಮಿಂಚಿದರು. ಹಿರಿಯ ಬೌಲರ್ ಶಿಖಾ ಪಾಂಡೆ 26ಕ್ಕೆ ಮೂರು, ರಾಧಾ ಯಾದವ್ 19ಕ್ಕೆ 1 ವಿಕೆಟ್ ಉರುಳಿಸಿದರು.
ಇದನ್ನೂ ಓದಿ WPL 2023 : ಆರ್ಸಿಬಿಯದ್ದು ಅದೇ ರಾಗ, ಯುಪಿ ವಿರುದ್ಧ ಮೊದಲು ಬ್ಯಾಟ್ ಮಾಡಿ 138 ರನ್ಗಳಿಗೆ ಆಲ್ಔಟ್
ಸಂಕ್ಷಿಪ್ತ ಸ್ಕೋರ್: ಗುಜರಾತ್ ಜೈಂಟ್ಸ್; 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 105. (ಕಿಮ್ ಗಾರ್ತ್ ಅಜೇಯ 32, ಜಾರ್ಜಿಯಾ 22, ಮರಿಜಾನ್ ಕಾಪ್ 15ಕ್ಕೆ 5, ಶಿಖಾ ಪಾಂಡೆ 26ಕ್ಕೆ 3.