ಮುಂಬಯಿ: ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ಪ್ರತಾಪ ತೋರಿದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಗುಜರಾತ್ ಜೈಂಟ್ಸ್ ವಿರುದ್ಧ 10 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲಿಸಿದೆ.
ಮುಂಬಯಿಯ ಡಿವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಶನಿವಾರ ನಡೆದ ಮಹಿಳಾ ಪ್ರೀಮಿಯರ್ ಲೀಗ್ನ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್ ಜೈಂಟ್ಸ್ 20 ಓವರ್ಗಳಲ್ಲಿ 9 ವಿಕೆಟ್ಗೆ 105 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಡೆಲ್ಲಿ 7.1 ಓವರ್ನಲ್ಲಿ ವಿಕೆಟ್ ನಷ್ಟವಿಲ್ಲದೆ 107 ರನ್ ಬಾರಿಸಿ ಗೆಲುವಿನ ನಗೆ ಬೀರಿತು.
ಸಣ್ಣ ಮೊತ್ತವನ್ನು ಬೆನ್ನಟ್ಟಿದ ಡೆಲ್ಲಿ ಪರ ಲೇಡಿ ಸೆಹವಾಗ್ ಖ್ಯಾತಿಯ ಶಫಾಲಿ ವರ್ಮಾ ಸ್ಫೋಟಕ ಬ್ಯಾಟಿಂಗ್ ಮೂಲಕ ಗುಜರಾತ್ ಜೈಂಟ್ಸ್ ಬೌಲರ್ಗಳ ಬೆವರಿಳಿಸಿದರು. ಮೈದಾನದ ಮೂಲೆ ಮೂಲೆಗೆ ಚೆಂಡನ್ನು ಬಡಿದಟ್ಟಿ ಕೇವಲ 19 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿ ಮಿಂಚಿದರು. ತಂಡದ ಅರ್ಧದಷ್ಟು ಮೊತ್ತ ಶಫಾಲಿ ಅವರದ್ದೇ ಆಗಿತ್ತು. ಶಫಾಲಿ ಬ್ಯಾಟಿಂಗ್ ಆರ್ಭಟ ಕಂಡ ಪ್ರೇಕ್ಷಕರು ಒಂದು ಕ್ಷಣ ದಂಗಾದರು. ಒಟ್ಟು 28 ಎಸೆತ ಎದುರಿಸಿದ ಅವರು ಬರೋಬ್ಬರಿ 10 ಬೌಂಡರಿ ಮತ್ತು 5 ಮನಮೋಹಕ ಸಿಕ್ಸರ್ ನೆರವಿನಿಂದ ಅಜೇಯ 76 ರನ್ ಬಾರಿಸಿದರು. ನಾಯಕಿ ಮೆಗ್ ಲ್ಯಾನಿಂಗ್ ಮೂರು ಬೌಂಡರಿ ನೆರವಿನಿಂದ ಅಜೇಯ 21 ರನ್ ಗಳಿಸಿದರು.
ಇದಕ್ಕೂ ಮುನ್ನ ಬ್ಯಾಟಿಂಗ್ ನಡೆಸಿದ ಗುಜರಾತ್ ತಂಡಕ್ಕೆ ಮರಿಜಾನ್ ಕಾಪ್ ಘಾತಕ ಬೌಲಿಂಗ್ ಮೂಲಕ ಆಘಾತ ನೀಡಿದರು. 4 ಓವರ್ ಬೌಲಿಂಗ್ ನಡೆಸಿ 15 ರನ್ ವೆಚ್ಚದಲ್ಲಿ ಪ್ರಮುಖ 5 ವಿಕೆಟ್ ಕಿತ್ತು ಮಿಂಚಿದರು. ಹಿರಿಯ ಬೌಲರ್ ಶಿಖಾ ಪಾಂಡೆ 26ಕ್ಕೆ ಮೂರು, ರಾಧಾ ಯಾದವ್ 19ಕ್ಕೆ 1 ವಿಕೆಟ್ ಉರುಳಿಸಿದರು.
ಇನಿಂಗ್ಸ್ ಆರಂಭಿಸಿದ ಗುಜರಾತ್ ಜೈಂಟ್ಸ್ ಸ್ಥಿತಿ ಆರಂಭದಿಂದಲೇ ಶೋಚನೀಯವಾಗಿತ್ತು. ಖಾತೆ ತೆರೆಯುವ ಮುನ್ನವೇ ವಿಕೆಟ್ ಕಳೆದುಕೊಂಡು ಆರಂಭಿಕ ಆಘಾತ ಎದುರಿಸಿತು. ತಂಡದ ಮೊತ್ತ 20 ರನ್ ದಾಟುವ ವೇಳೆ ಪ್ರಮುಖ 4 ವಿಕೆಟ್ ಕಳೆದುಕೊಂಡು ಇನ್ನೇನು 50 ರನ್ ಆಗುವಷ್ಟರಲ್ಲಿ ಗಂಟುಮೂಟೆ ಕಟ್ಟುತ್ತದೆ ಎಂದು ಭಾವಿಸಲಾಗಿತ್ತು. ಮರಿಜಾನ್ ಪಾಕ್ ಒಂದರ ಹಿಂದೆ ಒಂದರಂತೆ ವಿಕೆಟ್ ಕೀಳುತ್ತಲೇ ಸಾಗಿದರು.
ಆರ್ಸಿಬಿ ವಿರುದ್ಧದ ಪಂದ್ಯದಲ್ಲಿ ಸ್ಫೋಟಕ ಬ್ಯಾಟಿಂಗ್ ನಡೆಸಿದ ಸೋಫಿಯಾ ಡಂಕ್ಲಿ ಅವರನ್ನು ಈ ಪಂದ್ಯದಿಂದ ಹೊರಗಿಟ್ಟು ಪ್ರಯೋಗ ನಡೆಸಿದ ಗುಜರಾತ್ ಕೈ ಸುಟ್ಟುಕೊಂಡಿತು. ಬೆತ್ ಮೂನಿ ಅವರ ಬದಲು ತಂಡಕ್ಕೆ ಸೇರ್ಪಡೆಯಾಗ ದಕ್ಷಿಣ ಆಫಿಕಾದ ಹಾರ್ಡ್ ಹಿಟ್ಟರ್ ಲಾರಾ ವೊಲ್ವಾರ್ಡ್ಟ್ ಕೇವಲ 1 ರನ್ಗೆ ಸೀಮಿತಗೊಂಡು ನಿರಾಸೆ ಅನುಭವಿಸಿದರು. ಹರ್ಲೀನ್ ಡಿಯೋಲ್ ಕೂಡ ಹೆಚ್ಚು ಹೊತ್ತು ಕ್ರೀಸ್ ಆಕ್ರಮಿಸಲು ವಿಫಲವಾದದ್ದು ತಂಡದ ಬೃಹತ್ ಮೊತ್ತಕ್ಕೆ ಹಿನ್ನಡೆಯಾಯಿತು. ಡಿಯೋಲ್ 20 ರನ್ ಗಳಿಸಿದರು. ಕೆಳ ಕ್ರಮಾಂಕದಲ್ಲಿ ಕಿಮ್ ಗಾರ್ತ್(ಅಜೇಯ 32) ಮತ್ತು ಜಾರ್ಜಿಯಾ(22) ಅವರು ಸಣ್ಣ ಮಟ್ಟದ ಹೋರಾಟವೊಂದನ್ನು ನಡೆಸಿದ ಕಾರಣ ತಂಡ ನೂರರ ಗಟಿ ದಾಟಿತು.
ಇದನ್ನೂ ಓದಿ WPL 2023 : ಆರ್ಸಿಬಿಗೆ ಮಗದೊಂದು ಹೀನಾಯ ಪರಾಜಯ, ಯುಪಿ ವಿರುದ್ಧ 10 ವಿಕೆಟ್ ಸೋಲು
ಸಂಕ್ಷಿಪ್ತ ಸ್ಕೋರ್: ಗುಜರಾತ್ ಜೈಂಟ್ಸ್; 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 105. (ಕಿಮ್ ಗಾರ್ತ್ ಅಜೇಯ 32, ಜಾರ್ಜಿಯಾ 22, ಮರಿಜಾನ್ ಕಾಪ್ 15ಕ್ಕೆ 5, ಶಿಖಾ ಪಾಂಡೆ 26ಕ್ಕೆ 3.
ಡೆಲ್ಲಿ ಕ್ಯಾಪಿಟಲ್ಸ್: 7.1 ಓವರ್ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 107(ಶಫಾಲಿ ವರ್ಮಾ ಅಜೇಯ 76, ಮೆಗ್ ಲ್ಯಾನಿಂಗ್ ಅಜೇಯ 21)