ಬೆಂಗಳೂರು: ಟೊಯೋಟಾ ಕಂಪನಿಯ ಬಹುಬೇಡಿಕೆಯ ಎಂಪಿವಿ ಇನ್ನೋವಾ ಹೈಕ್ರಾಸ್ (Innova Hycross) 2022ರ ನವೆಂಬರ್ನಲ್ಲಿ ಬಿಡುಗಡೆಯಾಗಿತ್ತು. ಮೊದಲೇ ಭಾರತದಲ್ಲಿ ಇನ್ನೋವಾ ಕಾರುಗಳಿಗೆ ಭಯಂಕರ ಬೇಡಿಕೆ. ಇನ್ನು ಹೈಬ್ರಿಡ್ ಎಂಜಿನ್ ಎಂದರೆ ಕೇಳಬೇಕೆ. ಸಿಕ್ಕಾಪಟ್ಟೆ ಬೇಡಿಕೆ ಬಂದಿದೆ. ಬೇಡಿಕೆ ಹೆಚ್ಚಾಗುತ್ತಿರುವ ಕಾರಣ ಉತ್ಪಾದನೆ ಹಾಗೂ ಪೂರೈಕೆಯಲ್ಲಿ ತೊಂದರೆ ಎದುರಾಗುತ್ತದೆ ಎಂಬ ಕಾರಣಕ್ಕೆ ಟಾಪ್ ಎಂಡ್ ಕಾರುಗಳ ಬುಕಿಂಗ್ ಅನ್ನು ತಾತ್ಕಾಲಿಕವಾಗಿ ನಿಲ್ಲಿಸಲು ಕಂಪನಿ ಮುಂದಾಗಿದೆ.
ಹೈಕ್ರಾಸ್ ಬಿಡುಗಡೆಗೊಂಡ ಬಳಿಕ ಏಕಾಏಕಿ ಬೇಡಿಕೆ ಹೆಚ್ಚಾಗಿದೆ. ಕಾಯುವಿಕೆಯ ಅವಧಿ (ವೇಟಿಂಗ್ ಪಿರಿಯೆಡ್) 24ರಿಂದ 30 ತಿಂಗಳ ತನಕ ಮುಂದುವರಿದಿದೆ. ಗ್ರಾಹಕರಿಗೆ ತೊಂದರೆಯಾಗಬಾರದು ಎಂಬ ಕಾರಣಕ್ಕೆ ಹೈಬ್ರಿಡ್ ಕಾರುಗಳ ಬುಕಿಂಗ್ ಕೂಡ ಸ್ಥಗಿತಗೊಳಿಸಿದೆ.
ಕಾರಣವೇನು?
ಹೈಬ್ರಿಡ್ ಕಾರುಗಳು ಹಲವಾರು ಹೊಸ ಫೀಚರ್ಗಳನ್ನು ಹೊಂದಿವೆ. ಈ ಫೀಚರ್ಗಳನ್ನು ನೀಡಬೇಕಾದರೆ ಕಾರುಗಳ ನಿರ್ಮಾಣದಲ್ಲಿ ಸೆಮಿ ಕಂಡಕ್ಟರ್ಗಳ ಬಳಕೆ ಹೆಚ್ಚಿದೆ. ಆದರೆ ಕಳೆದ ಎರಡು ವರ್ಷಗಳಿಂದ ಭಾರತದ ಆಟೋಮೊಬೈಲ್ ಕ್ಷೇತ್ರ ಸೆಮಿ ಕಂಡಕ್ಟರ್ಗಳ ಕೊರತೆಯಿಂದ ನಲುಗಿದೆ. ಇದರಿಂದಾಗಿ ಹೈಕ್ರಾಸ್ ಕಾರುಗಳು ನಿರ್ಮಾಣಕ್ಕೆ ತೊಂದರೆ ಉಂಟಾಗಿದೆ. ಇದರಿಂದಾಗಿ ಕಾಯುವಿಕೆಯ ಅವಧಿಯೂ ಹೆಚ್ಚಳವಾಗಿದೆ. ಇದು ಮುಂದುವರಿದರೆ ಬ್ರಾಂಡ್ ಮೇಲೆ ಪರಿಣಾಮ ಬೀರುವ ಸಾಧ್ಯತೆಗಳು ಇರುವ ಕಾರಣ ಬುಕಿಂಗ್ ಸ್ಥಗಿತಗೊಳಿಸಲಾಗಿದೆ.
ಇನೋವಾ ಹೈಕ್ರಾಸ್ ಎಕ್ಸ್ಜಡ್ ಹಾಗೂ ಎಕ್ಸ್ಜಡ್ (ಒ) ಕಾರುಗಳಲ್ಲಿ ಗರಿಷ್ಠ ಫೀಚರ್ಗಳಿವೆ. ವೆಂಟಿಲೇಟೆಡ್ ಸೀಟ್ಗಳು, ಪವರ್ಡ್ ಟೈಲ್ಗೇಟ್, 8ವೇ ಪವರ್ಡ್ ಡ್ರೈವರ್ ಸೀಟ್, ಅಡಾಸ್ ಫೀಚರ್ಗಳಿವೆ. ಇದಕ್ಕೆಲ್ಲ ಹೆಚ್ಚುವರಿ ಸೆಮಿ ಕಂಡಕ್ಟರ್ಗಳು ಬೇಕಾಗುತ್ತವೆ. ಹೀಗಾಗಿ ಇದರ ಬುಕಿಂಗ್ ನಿಲ್ಲಿಸಲಾಗಿದೆ.
ಇನೋವಾ ಹೈಕ್ರಾಸ್ ಕಾರು ಒಟ್ಟು ಆರು ವೇರಿಯೆಂಟ್ಗಳಲ್ಲಿ ಲಭ್ಯವಿದೆ. ಜಿ. ಜಿಎಕ್ಸ್, ವಿಎಕ್ಸ್, ವಿಎಕ್ಸ್ (ಒ), ಜಡ್ ಎಕ್ಸ್, ಮತ್ತು ಜಡ್ಸ್ ಎಕ್ಸ್ (ಒ). ಇದರಲ್ಲಿ ಎರಡು ವೇರಿಯೆಂಟ್ಗಳ ಬುಕ್ಕಿಂಗ್ ಸದ್ಯಕ್ಕಿಲ್ಲ ಎಂದು ಕಂಪನಿ. ಮೊದಲೆರಡು ವೇರಿಯೆಂಟ್ಗಳು ಸಂಪೂರ್ಣವಾಗಿ ಪೆಟ್ರೋಲ್ ಎಂಜಿನ್ ಹೊಂದಿದ್ದರೆ, ವಿಎಕ್ಸ್ ವೇರಿಯೆಂಟ್ನಿಂದ ಹೈಬ್ರಿಡ್ ಎಂಜಿನ್ ಆರಂಭವಾಗುತ್ತದೆ. ಟಾಪ್ ಎಂಡ್ ವೇರಿಯೆಂಟ್ ಏಳು ಸೀಟ್ಗಳ ಆಯ್ಕೆಯಲ್ಲಿ ಮಾತ್ರ ದೊರಕಿದರೆ, ಉಳಿದ ವೇರಿಯೆಂಟ್ಗಳು ಅಥವಾ ಎಂಟು ಸೀಟ್ಗಳಲ್ಲಿ ದೊರಕುತ್ತವೆ.
ಹೈಕ್ರಾಸ್ ಎಂಜಿನ್ ಸಾಮರ್ಥ್ಯವೇನು?
ಇನ್ನೋವಾ ಹೈಕ್ರಾಸ್ ಕಾರಿನಲ್ಲಿ 2.0 ಲೀಟರ್ನ ಪೆಟ್ರೊಲ್ ಎಂಜಿನ್ ಇದೆ. ಪೆಟ್ರೊಲ್ ಎಂಜಿನ್ 172 ಬಿಎಚ್ಪಿ ಪವರ್ ಬಿಡುಗಡೆ ಮಾಡಿದರೆ, ಹೈಬ್ರಿಡ್ ಕಾರು 184 ಬಿಎಚ್ಪಿ ಪವರ್ ಬಿಡುಗಡೆ ಮಾಡುತ್ತದೆ. ಎರೂ ಎಂಜಿನ್ಗಳು ಆಟೋಮ್ಯಾಟಿಕ್ ಗೇರ್ಬಾಕ್ಸ್ ಆಯ್ಕೆಯಲ್ಲ ಮಾತ್ರ ನೀಡಲಾಗುತ್ತದೆ. ಅದೇ ರೀತಿ ಹೈಬ್ರಿಡ್ ಕಾರಿನಲ್ಲಿ ಇ ಡ್ರೈವ್ ಟ್ರಾನ್ಸ್ಮಿಷನ್ಗಳಿವೆ. ಈ ಕಾರಿನ ಹೈಬ್ರಿಡ್ ಎಂಜಿನ್ 23.24 ಕಿಲೋ ಮೀಟರ್ ಮೈಲೇಜ್ ನೀಡಿದರೆ, ನ್ಯಾಚುರಲ್ ಆಸ್ಪಿರೇಟೆಡ್ ಕಾರು 16.13 ಕಿಲೋ ಮೀಟರ್ ಮೈಲೇಜ್ ನೀಡುತ್ತದೆ. ಆರಂಭಿಕ ಎರಡು ವೇರಿಯೆಂಟ್ನ ಕಾರುಗಳ ಬೆಲೆ 18.55 ಲಕ್ಷ ರೂಪಾಯಿಂದ 19.45 ಲಕ್ಷ ರೂಪಾಯಿಗಳಾದರೆ, ಹೈಬ್ರಿಡ್ ವೇರಿಯೆಂಟ್ ಕಾರಿನ ಬೆಲೆ 24. 76 ಲಕ್ಷ ರೂಪಾಯಿಯಿಂದ 26.78 ಲಕ್ಷ ರೂಪಾಯಿ ತನಕ ಇದೆ.