ವಿಸ್ತಾರ ನ್ಯೂಸ್, ಬೆಂಗಳೂರು: ಸಿಟ್ರಯೊನ್ ಕಂಪನಿಯ ಕಾರಿನ ಅಭಿಮಾನಿಗಳಿಗೆ ಸಂತಸದ ಸುದ್ದಿಯೊಂದಿದೆ. ಈ ತಿಂಗಳಾಂತ್ಯಕ್ಕೆ ಸಿಟ್ರಯೊನ್ ಸಿ3 ಏರ್ಕ್ರಾಸ್ (Citroen C3 Aircross) ಕಾರಿನ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಅವೃತ್ತಿಯು ರಸ್ತೆಗೆ ಇಳಿಯಲಿದೆ. ಈ ಕಾರು ಕೊಳ್ಳಲು ಬಯಸಿದ್ದವರಿಗೆ ಇದೊಂದು ದೊಡ್ಡ ಕೊರತೆಯಾಗಿತ್ತು. ಅದನ್ನು ನೀಗಿಸಲು ಕಂಪನಿ ಮುಂದಾಗಿದೆ. ಅದೇ ರೀತಿ ಬೆಲೆಯೂ ಇತರ ಕಾರಿಗೆ ಹೋಲಿಸಿದರೆ ಇನ್ನಷ್ಟು ಕಡಿಮೆ ಇರಬಹುದು ಎಂದು ಅಂದಾಜಿಸಲಾಗಿದೆ.
ಸಿಟ್ರನ್ ಈಗಾಗಲೇ ಇಂಡೋನೇಷ್ಯಾದ ಸಿ 3 ಏರ್ ಕ್ರಾಸ್ ನಲ್ಲಿ 6-ಸ್ಪೀಡ್ ಟಾರ್ಕ್ ಕನ್ವರ್ಟರ್ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ ಅನ್ನು ನೀಡುತ್ತಿದೆ. ಇದನ್ನು ಜಪಾನಿನ ಗೇರ್ಬಾಕ್ಸ್ ತಯಾರಕ ಕಂಪನಿ AISIN ನಿಂದ ಪಡೆದುಕೊಳ್ಳಲಾಗಿದೆ. ಇದೇ ಗೇರ್ಬಾಕ್ಸ್ ಭಾರತಕ್ಕೂ ಬರುವ ಸಾಧ್ಯತೆ ಇದೆ ಎನ್ನಲಾಗಿದೆ. ಸಿಟ್ರಯೊನ್ ಯುರೋಪಿಯನ್-ಸ್ಪೆಕ್ ಸಿ 3 ಹ್ಯಾಚ್ ಬ್ಯಾಕ್ ನಲ್ಲಿ ಈ ಐಸಿನ್ 6-ಸ್ಪೀಡ್ ಎಟಿ ಗೇರ್ ಬಾಕ್ಸ್ ಬಳಸಲಾಗುತ್ತಿದೆ.
ಹೊಸ ಗೇರ್ಬಾಕ್ಸ್ ಸ್ಕೋಡಾ ಕುಶಾಕ್ ಮತ್ತು ಸ್ಲಾವಿಯಾ, ಮತ್ತು ಫೋಕ್ಸ್ ವ್ಯಾಗನ್ ಟೈಗುನ್ ಮತ್ತು ವಿರ್ಟಸ್ ತಮ್ಮ 1.0-ಲೀಟರ್ ಟಿಎಸ್ ಐ ಎಂಜಿನ್ ಗಳಿಗಾಗಿ ಮತ್ತು ಎಂಜಿ ಆಸ್ಟರ್ ತನ್ನ 1.3-ಲೀಟರ್ ಟರ್ಬೊ-ಪೆಟ್ರೋಲ್ ಎಂಜಿನ್ ನಲ್ಲಿ ಬಳಸಲಾಗುವ ಗೇರ್ ಬಾಕ್ಸ್ ಗಳ ಅದೇ ಕುಟುಂಬಕ್ಕೆ ಸೇರಿದೆ. ಮಧ್ಯಮ ಗಾತ್ರದ ಎಸ್ ಯುವಿ ವಿಭಾಗದಲ್ಲಿ ಟಾರ್ಕ್ ಕನ್ವರ್ಟರ್ ಗಳು ಪ್ರಮುಖವಾಗಿದೆ. ಈ ಸೆಗ್ಮೆಂಟಿನ ಅತ್ಯಂತ ಜನಪ್ರಿಯ ಆಟೊಮ್ಯಾಟಿಕ್ ಗೇರ್ಬಾಕ್ಸ್ ಸಿವಿಟಿಯಾಗಿದೆ. ಕೆಲವು ಮಾಡೆಲ್ಗಳಲ್ಲಿ ಡಿಸಿಟಿಗಳು ಕೂಡ ಇವೆ.
ಹೊಸ ಆಟೋಮ್ಯಾಟಿಕ್ ಗೇರ್ ಬಾಕ್ಸ್ 1.2-ಲೀಟರ್ 3 ಸಿಲಿಂಡರ್ ಟರ್ಬೊ-ಪೆಟ್ರೋಲ್ ಎಂಜಿನ್ ಗೆ ಜೋಡಣೆಯಾಗಿದೆ. ಟಾಪ್ ಎಂಡ್ ಮತ್ತು ಮ್ಯಾಕ್ಸ್ ಟ್ರಿಮ್ ಗಳಲ್ಲಿ ಈ ಗೇರ್ಬಾಕ್ಸ್ಗಳನ್ನು ನೀಡಲಾಗಿದೆ. ಫೀಚರ್ಗಳು ಇನ್ನೂ ಖಾತರಿಯಾಗಿಲ್ಲ. ಆದರೆ, ಇಂಡೋನೇಷ್ಯಾದಲ್ಲಿರುವ ಸಿ3 ಏರ್ ಕ್ರಾಸ್ ಎಟಿ ಗೇರ್ ಬಾಕ್ಸ್ ಇರುವು ಎಂಜಿನ್ 190 ಬಿಹೆಚ್ ಪಿ ಮತ್ತು 205 ಎನ್ಎಂ ಟಾರ್ಕ್ ಬಿಡುಗಡೆ ಮಾಡುತ್ತದೆ. ಮ್ಯಾನುವಲ್ ಕಾರಿನಲ್ಲಿ ಪವರ್ ಬದಲಾಗದೆ ಉಳಿದಿದೆ. ಆದರೆ, ಟಾರ್ಕ್ 15 ಎನ್ಎಂ ಹೆಚ್ಚಿದೆ. ಗೇರ್ ಬಾಕ್ಸ್ ಮ್ಯಾನುವಲ್ ಮೋಡ್ ಅನ್ನು ಸಹ ಹೊಂದಿದೆ. ಆದರೆ ಪ್ಯಾಡಲ್ ಶಿಫ್ಟರ್ ಹೊಂದಿಲ್ಲ.
ಫೀಚರ್ಗಳ ಕೊರತೆಯ ಹೊರತಾಗಿಯೂ ಸಿ3 ಏರ್ ಕ್ರಾಸ್ ಉತ್ತಮ ಎಂಜಿನ್, ಅದ್ಭುತ ಸವಾರಿ ಗುಣಮಟ್ಟದೊಂದಿಗೆ ಅತ್ಯಂತ ದೃಢವಾದ ಮೆಕ್ಯಾನಿಕಲ್ ಪ್ಯಾಕೇಜ್ ಹೊಂದಿದೆ.
ಇನ್ನಷ್ಟು ಮಾಡೆಲ್ಗಳಿಗೆ ಲಭ್ಯ
ಸಿ 3 ಏರ್ ಕ್ರಾಸ್ ಬಳಿಕ ಅದೇ ಗೇರ್ ಬಾಕ್ಸ್ ಸಿ 3 ಹ್ಯಾಚ್ ಬ್ಯಾಕ್ ನಲ್ಲಿ ಸಿಗುವ ನಿರೀಕ್ಷೆಯಿದೆ. ಹೀಗಾಗಿ ಟಾರ್ಕ್ ಕನ್ವರ್ಟರ್ ಎಂಟ್ರಿ ಲೆವೆಲ್ ಸೆಗ್ ಮೆಂಟಿಗೆ ದುಬಾರಿಯಾಗಲಿದೆ. ಈ ಮೂಲಕ ಸಿ3 ಕಾರು ಹೆಚ್ಚು ಅತ್ಯಾಧುನಿಕ ಯಾಂತ್ರಿಕ ಪ್ಯಾಕೇಜ್ ಆಗಲು ಸಹಾಯ ಮಾಡುತ್ತದೆ. ಮುಂಬರುವ ಸಿ3 ಎಕ್ಸ್ ಕೂಪ್ -ಎಸ್ಯುವಿ 6-ಸ್ಪೀಡ್ ಗೇರ್ ಬಾಕ್ಸ್ ನೊಂದಿಗೆ ಬರುವ ನಿರೀಕ್ಷೆಯಿದೆ.