ನವ ದೆಹಲಿ: ಹ್ಯುಂಡೈ ಕಂಪನಿಯು ಜುಲೈ 10ರಂದು ತನ್ನ ಬಹುನಿರಿಕ್ಷಿತ ಸಬ್ಕಾಂಪಾಕ್ಟ್ ಎಸ್ಯುವಿ ಎಕ್ಸ್ಟೆರ್ (Hyundai Exter) ಬಿಡುಗಡೆ ಮಾಡಲಿದೆ. ಅದಕ್ಕಿಂತ ಮೊದಲು ಒಂದೊಂದಾಗಿ ಅದರ ವಿವರಗಳನ್ನು ಬಹಿರಂಗ ಮಾಡುತ್ತಿದೆ. ಮೊದಲಿಗೆ ಕೇವಲ ಟೀಸರ್ ಬಿಟ್ಟಿದ್ದ ಕಂಪನಿ ನಂತರ ಮೂಲಕ ವಿನ್ಯಾಸ ತೋರಿಸಿತ್ತು. ಬಳಿಕ ಹಿಂದೆ ಮುಂದೆ ಹಾಗೂ ಸೈಡ್ ಪ್ರೊಫೈಲ್ ಚಿತ್ರವನ್ನು ಅನಾವರಣ ಮಾಡಿಕೊಂಡಿತ್ತು. ಇದೀಗ ಅದರ ಹಿಂಬದಿ ಚಿತ್ರವನ್ನು ಬಿಡುಗಡೆ ಮಾಡಿದೆ. ಈ ಚಿತ್ರಗಳು ಈ ಹಿಂದೆಯೇ ಆನ್ಲೈನ್ನಲ್ಲಿ ಸೋರಿಕೆಯಾಗಿದ್ದವು. ಇದೀಗ ಸಂಪೂರ್ಣ ಮಾಹಿತಿ ಲಭ್ಯವಾಗಿದೆ.
ಎಕ್ಸ್ಟೆರ್ನ ಸ್ಟೀರಿಂಗ್ ವೀಲ್ ಮತ್ತು ಡ್ಯಾಶ್ ಬೋರ್ಡ್ ವಿನ್ಯಾಸವು ಗ್ರ್ಯಾಂಡ್ ಐ 10 ನಿಯೋಸ್ ಮತ್ತು ಔರಾದಂತಿದೆ. ಆದಾಗ್ಯೂ, ಕೆಲವು ವಿಶಿಷ್ಟ ಅಂಶಗಳನ್ನು ಗುರುತಿಸಬಹುದಾಗಿದೆ. ಮೊದಲನೆಯದಾಗಿ, ನಿಯೋಸ್ ಮತ್ತು ಔರಾದಲ್ಲಿ ಕಂಡುಬರುವ ಬೂದು/ ಕಪ್ಪು ಅಥವಾ ಕಂಚು/ ಕಪ್ಪು ಒಳಾಂಗಣದ ಬದಲು ಇಂಟೀರಿಯರ್ ಆಲ್-ಬ್ಲ್ಯಾಕ್ ಬಣ್ಣವನ್ನು ಹೊಂದಿದೆ. ಎಕ್ಸ್ಟರ್ 4.2 ಇಂಚಿನ ಎಂಐಡಿ ಪೂರ್ಣ ಪ್ರಮಾಣದ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಹೊಂದಿದೆ. ಇದು ಹ್ಯುಂಡೈನ ದುಬಾರಿ ಕಾರುಗಳಾದ ಇದು ಐ 20 ಮತ್ತು ವೆರ್ನಾದಲ್ಲಿ ಲಭ್ಯವಿದೆ.
ಟಾಪ್ ವೇರಿಯೆಂಟ್ ಕಾರಿನಲ್ಲಿ 8.0-ಇಂಚಿನ ಟಚ್ ಸ್ಕ್ರೀನ್ ಇನ್ಫೋಟೈನ್ ಮೆಂಟ್ ನೀಡಲಾಗಿದೆ. ಡ್ಯಾಶ್ಬೋರ್ಡ್ ಮತ್ತು ಗೇರ್ ಲಿವರ್ ಸುತ್ತಲೂ ಪ್ಯಾಟರ್ನ್ ಎಫೆಕ್ಟ್ ನೀಡಲಾಗಿದೆ. ಇದು ಎರಡೂ ತುದಿಗಳಲ್ಲಿ ವೃತ್ತಾಕಾರದ ಎಸಿ ವೆಂಟ್ಗಳನ್ನು ಮತ್ತು ಆಲಿವ್ ಹಸಿರು ಬಣ್ಣವನ್ನು ಹೊಂದಿರುವ ಅರೆ-ಲೆದರ್ಲೆಟ್ ಸೀಟ್ ಅಪ್ ಹೋಲ್ಸ್ಟ್ರಿಯನ್ನು ಪಡೆದುಕೊಂಡಿದೆ. ಎಕ್ಸ್ಟೆರ್ ಕಾರಿನ ಹಿಂಭಾಗದ ಮೂರು ಪ್ರಯಾಣಿಕರಿಗೆ ಮೂರು-ಪಾಯಿಂಟ್ ಸೀಟ್ ಬೆಲ್ಟ್ ಗಳನ್ನು ಮತ್ತು ಎರಡನೇ ಸಾಲಿಗೆ ಎಸಿ ವೆಂಟ್ ನೀಡಲಾಗಿದೆ. ಆದರೆ ಇದು ಹಿಂಭಾಗದ ಪ್ರಯಾಣಿಕರಿಗೆ ಅರ್ಮ್ರೆಸ್ಟ್ ನೀಡಲಾಗಿಲ್ಲ.
ಹ್ಯುಂಡೈ ಎಕ್ಸ್ಟೆರ್ ಕಾರು ಕನೆಕ್ಟೆಡ್ ಕಾರ್ ಟೆಕ್ ಹೊಂದಿದೆ. ಬಹು ಭಾಷೆಗಳಲ್ಲಿ ಧ್ವನಿ-ಸಕ್ರಿಯ ಆದೇಶಗಳು (ವಾಯ್ಸ್ ಆಕ್ಟಿವೇಟೆಡ್ ಕಮಾಂಡ್) ಮತ್ತು ಇನ್ಫೋಟೈನ್ಮೆಂಟ್ ಸಿಸ್ಟಮ್ ಮತ್ತು ನಕ್ಷೆಗಳಿಗಾಗಿ ಓವರ್-ದಿ-ಏರ್ (ಒಟಿಎ) ಅಪ್ಗ್ರೇಡ್ ಕೂಡ ನೀಡಲಾಗಿದೆ. ಟಾಪ್ ವೇರಿಯೆಂಟ್ಗಳಲ್ಲಿ ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್, ಆಪಲ್ ಕಾರ್ಪ್ಲೇ, ಆಂಡ್ರಾಯ್ಡ್ ಆಟೋ, ಇನ್-ಬಿಲ್ಟ್ ನ್ಯಾವಿಗೇಷನ್ ಮತ್ತು ಸನ್ ರೂಫ್ ಸೇರಿದಂತೆ ಹಲವು ವೈಶಿಷ್ಟ್ಯಗಳನ್ನು ಹೊಂದಿವೆ.
ಹ್ಯುಂಡೈ ಎಕ್ಸ್ಟರ್ ಪವರ್ ಟ್ರೇನ್
ಎಕ್ಸ್ಟೆರ್ ಕಾರಿನಲ್ಲಿ 1.2-ಲೀಟರ್ ನಾಲ್ಕು ಸಿಲಿಂಡರ್ ಪೆಟ್ರೋಲ್ ಎಂಜಿನ್ ಹೊಂದಿದೆ. ಇದು 83 ಬಿಎಚ್ಪಿ ಪವರ್ ಬಿಡುಗಡೆ ಮಾಡುತ್ತದೆ ಈ ಎಂಜಿನ್ ವೆನ್ಯೂ, ಮತ್ತು ನಿಯೋಸ್ನಲ್ಲಿದೆ. ಅದೇ ರೀತಿ ಫ್ಯಾಕ್ಟರಿ ಫಿಟೆಡ್ ಸಿಎನ್ ಜಿ ಕಿಟ್ ಅನ್ನು ಪಡೆಯುತ್ತದೆ. ಪೆಟ್ರೋಲ್ ಎಂಜಿನ್ 5-ಸ್ಪೀಡ್ ಮ್ಯಾನುವಲ್ ಅಥವಾ ಎಎಂಟಿ ಆಟೋಮ್ಯಾಟಿಕ್ ಟ್ರಾನ್ಸ್ಮಿಷನ್ ಜತೆ ಬರುತ್ತದೆ. ಸಿಎನ್ಜಿಯಲ್ಲಿ ಮ್ಯಾನುವಲ್ ಗೇರ್ ಬಾಕ್ಸ್ ಮಾತ್ರ ಇದೆ.
ಬುಕಿಂಗ್ ವಿವರ
ಎಕ್ಸ್ಟೆರ್ ಡೆಲಿವರಿಗಳು ಜುಲೈ ಮಧ್ಯದ ವೇಳೆಗೆ ಪ್ರಾರಂಭವಾಗುವ ಸಾಧ್ಯತೆಯಿದೆ. ಪ್ರಸ್ತುತ 11,000 ರೂ.ಗಳಿಗೆ ಬುಕಿಂಗ್ ನಡೆಯುತ್ತಿದೆ. ಬಿಡುಗಡೆಯಾದ ನಂತರ, ಎಕ್ಸ್ಟೆರ್ ಟಾಟಾ ಪಂಚ್, ಸಿಟ್ರೋಯೆನ್ ಸಿ3 ಮತ್ತು ಮಾರುತಿ ಇಗ್ನಿಸ್ ಪೈಪೋಟಿ ಒಡ್ಡಲಿದೆ.