ನವ ದೆಹಲಿ: ಕಳೆದ ಜನವರಿಯಲ್ಲಿ ಗ್ರೇಟರ್ ನೋಯ್ಡಾದಲ್ಲಿ ನಡೆದ ಆಟೋ ಎಕ್ಸ್ಪೋದಲ್ಲಿ ಮಾರುತಿ ಸುಜುಕಿ ಕಂಪನಿ ಜಿಮ್ನಿ ಕಾರನ್ನು ಅನಾವರಣ ಮಾಡಿತ್ತು. ಈಗಾಗಲೇ ಕಾರಿನ ಬುಕಿಂಗ್ ಆರಂಭಗೊಂಡಿದೆ. ಭಾರತದ ಜನಪ್ರಿಯ ಆಫ್ರೋಡಿಂಗ್ ಕಾರು ಥಾರ್ಗೆ ಪೈಪೋಟಿ ನೀಡುವ ಉದ್ದೇಶದಿಂದ ಈ ಕಾರನ್ನು ಮಾರುತಿ ಸುಜುಕಿ ರಸ್ತೆಗಿಳಿಸಿತ್ತು. ಇದರಿಂದ ತಕ್ಷಣವೇ ಎಚ್ಚೆತ್ತುಕೊಂಡಿರುವ ಮಹಿಂದ್ರಾ ಕಂಪನಿಯೂ 5 ಡೋರ್ಗಳ ಥಾರ್ (Mahindra Thar) ಕಾರನ್ನು ರಸ್ತೆಗೆ ಇಳಿಸಲು ಮುಂದಾಗಿದ್ದು, ಅದರ ಪರೀಕ್ಷೆ ನಡೆಯುತ್ತಿದೆ.
ಮಹೀಂದ್ರಾ ಕಂಪನಿ 2020ರಲ್ಲಿ ಬಿಡುಗಡೆ ಮಾಡಿರುವ ಥಾರ್ ಸಿಕ್ಕಾಪಟ್ಟೆ ಜನಪ್ರಿಯತೆ ಪಡೆದುಕೊಂಡಿತ್ತು. ಅದಕ್ಕೆ ದೊಡ್ಡ ಮಟ್ಟದ ಬೇಡಿಕೆಯೂ ಸೃಷ್ಟಿಯಾಗಿತ್ತು. ದೀರ್ಘ ಅವಧಿಯ ವೇಟಿಂಗ್ ಪಿರಿಯೆಡ್ (ಕಾಯುವಿಕೆ ಅವಧಿ) ಡಿಮ್ಯಾಂಡ್ ಎಷ್ಟಿದೆ ಎಂಬುದಕ್ಕೆ ಸಾಕ್ಷಿ. ಈ ಸೆಗ್ಮೆಂಟ್ಗೆ ಬೇಡಿಕೆ ಹೆಚ್ಚಾಗಿರುವುದನ್ನು ಅರಿತಿರುವ ಸುಜುಕಿಯೂ ಜಿಮ್ನಿಯನ್ನು ರಸ್ತೆಗೆ ಇಳಿಸಿತ್ತು. ಅದೂ ಐದು ಡೋರ್ಗಳಲ್ಲಿ. ಈ ಮೂಲಕ ತನ್ನ ಜನಪ್ರಿಯ ಬ್ರಾಂಡ್ಗೆ ಸಡ್ಡು ಹೊಡೆಯಲು ಮುಂದಾದ ಸುಜುಕಿಗೆ ಪೈಪೋಟಿ ಕೊಡುವುದಕ್ಕೆ ಮಹೀಂದ್ರಾ ಮುಂದಾಗಿದೆ.
3 ಡೋರ್ನ ಥಾರ್ ಆಗಸ್ಟ್ 15ರಂದು ಬಿಡುಗಡೆ ಮಾಡಿ, ತಕ್ಷಣವೇ ಬುಕಿಂಗ್ ಓಪನ್ ಮಾಡಲಾಗಿತ್ತು. ಅದೇ ರೀತಿಯಲ್ಲಿ 5 ಡೋರ್ನ ಥಾರ್ ಕೂಡ ಮುಂದಿನ ಆಗಸ್ಟ್ನಲ್ಲೇ ಬಿಡುಗಡೆಯಾಗಬಹುದು ಎನ್ನಲಾಗಿದೆ.
ಇದನ್ನೂ ಓದಿ : Auto Expo 2023 | ಮಾರುತಿಯ ಬಹುನಿರೀಕ್ಷಿತ ಜಿಮ್ನಿ ಅನಾವರಣ, ಬುಕಿಂಗ್ ಆರಂಭ
ಕೆಲವು ವಾರಗಳ ಹಿಂದೆ ಮಹೀಂದ್ರಾ ರಿಯರ್ ವಿಲ್ ಡ್ರೈವ್ ಆವೃತ್ತಿಯ ಥಾರ್ ಕಾರನ್ನು ಬಿಡುಗಡೆ ಮಾಡಿತ್ತು. ಕಾರಿನ ಟ್ಯಾಕ್ಸ್ ಕಡಿಮೆ ಮಾಡುವ ಮೂಲಕ ಕಡಿಮೆ ಬೆಲೆಗೆ ನೀಡುವುದೇ ಅವರ ಉದ್ದೇಶವಾಗಿತ್ತು. ಈ ಕಾರಿನ ಬೆಲೆ 9.99 ಲಕ್ಷ ರೂಪಾಯಿಗೆ ಆರಂಭಗೊಳ್ಳುತ್ತದೆ. 5 ಡೋರ್ನ ಮಹೀಂದ್ರಾ ಕಾರು ಕೂಡ ರಿಯರ್ ವೀಲ್ ಡ್ರೈವ್ ಆವೃತ್ತಿಯಲ್ಲೇ ಲಭ್ಯವಾಗಲಿದೆ.