ನವ ದೆಹಲಿ : ಟಾಟಾ ಮೋಟಾರ್ಸ್ ತನ್ನ ಜನಪ್ರಿಯ ಎಸ್ಯುವಿ ಕಾರು ಹ್ಯಾರಿಯರ್ನ ಎಲೆಕ್ಟ್ರಾನಿಕ್ ಅವತಾರವನ್ನು ನವ ದೆಹಲಿಯಲ್ಲಿ ನಡೆಯುತ್ತಿರುವ ಆಟೋ ಎಕ್ಸ್ಪೋದಲ್ಲಿ (Auto Expo 2023) ಅನಾವರಣ ಮಾಡಿದೆ. ಈ ಕಾರು ಭಾರತೀಯ ಮಾರುಕಟ್ಟೆಗೆ 2024ರಲ್ಲಿ ಬರಲಿದೆ ಎಂದು ಕಂಪನಿಯ ಮೂಲಗಳು ತಿಳಿಸಿವೆ. ಟಾಟಾ ನೆಕ್ಸಾನ್ ಇವಿ ಯಶಸ್ಸಿನ ಬಳಿಕ ಟಾಟಾ ಮೋಟಾರ್ಸ್ನ ಎಲೆಕ್ಟ್ರಿಕ್ ವಿಭಾಗವು ಟಿಗೋರ್ ಹಾಗೂ ಟಿಯಾಗೊದ ಇವಿ ಆವೃತ್ತಿಯನ್ನು ಬಿಡುಗಡೆ ಮಾಡಿತ್ತು. ಇದೀಗ ಭಾರತೀಯ ಮಾರುಕಟ್ಟೆಯಲ್ಲಿ ಬ್ಯಾಟರಿ ಚಾಲಿತ ಎಸ್ಯುವಿಗಳಿಗೆ ಬೇಡಿಕೆ ಹೆಚ್ಚಾಗುತ್ತಿರುವ ಕಾರಣ ಹ್ಯಾರಿಯರ್ ಅನ್ನು ಮಾರುಕಟ್ಟೆಗೆ ಬಿಡಲು ಮುಂದಾಗಿದೆ.
ಸಫಾರಿ ಬಳಿಕ ಟಾಟಾ ಮೋಟಾರ್ಸ್ ರಸ್ತೆಗೆ ಇಳಿಸಿದ ಪೂರ್ಣ ಪ್ರಮಾಣದ ಎಸ್ಯುವಿ ಎಂದರೆ ಹ್ಯಾರಿಯರ್. ದೊಡ್ಡ ಗಾತ್ರ ಹಾಗೂ ಹೊಸ ವಿನ್ಯಾಸದ ಮೂಲಕ ಇದು ಜನಪ್ರಿಯತೆ ಗಳಿಸಿಕೊಂಡಿತ್ತು. ಅದರದ್ದೇ ಬ್ಯಾಟರಿ ಚಾಲಿತ ಆವೃತ್ತಿಯನ್ನು ಬಿಡುಗಡೆ ಮಾಡುವ ಮೂಲಕ ಇವಿ ಮಾರುಕಟ್ಟೆಯಲ್ಲಿ ಸ್ಥಾನ ಭದ್ರಗೊಳಿಸುವುದು ಟಾಟಾದ ಯೋಜನೆಯಾಗಿದೆ.
ಆಟೋ ಎಕ್ಸ್ಪೋದಲ್ಲಿ ಪ್ರದರ್ಶನಕ್ಕೆ ಇಡಲಾಗಿರುವ ಹ್ಯಾರಿಯರ್ ಕಾರು ದಹ್ಯ ಎಂಜಿನ್ ಹೊಂದಿರುವ ಕಾರಿಗಿಂತ ಭಿನ್ನವಾಗಿದೆ. ಮುಂಬದಿಯ ಪ್ಯಾನೆಲ್ ಮುಚ್ಚಿದಂತಿದ್ದು ಗ್ರಿಲ್ಗಳನ್ನು ತೆಗೆಯಲಾಗಿದೆ. ಎಲ್ಇಡಿ ಹೆಡ್ಲೈಟ್, ಡೆ ರನ್ನಿಂಗ್ ಲೈಟ್ ಭಿನ್ನ ರೀತಿಯಲ್ಲಿ ಕಾಣಿಡುತ್ತದೆ. ಕಾರಿನ ಬದಿಯ ನೋಟವೂ ವಿಶೇಷವಾಗಿದೆ. ಬಂಪರ್, ಸ್ಕಿಡ್ ಪ್ಲೇಟ್ ಹಾಗೂ ಹೆಚ್ಚು ಸ್ಪೋರ್ಟಿ ಲುಕ್ ಹೊಂದಿದೆ.
ಕ್ಯಾಬಿನ್ ಕೂಡ ಪ್ರೀಮಿಯಮ್ ಲುಕ್ ಹೊಂದಿದ್ದು, ವಿಭಿನ್ನ ತಾಂತ್ರಿಕತೆ ಹಾಗೂ ಫೀಚರ್ಗಳಿಂದ ತುಂಬಿಕೊಂಡಿದೆ. ಕಾರಿನ ಪವರ್ ಹಾಗೂ ರೇಂಜ್ ಕುರಿತು ಇನ್ನೂ ಮಾಹಿತಿ ಪ್ರಕಟಗೊಂಡಿಲ್ಲ.
ಇದನ್ನೂ ಓದಿ | Tata Motors | ಜೆಟ್ ಆವೃತ್ತಿಯ ಎಸ್ಯುವಿ ಕಾರುಗಳನ್ನು ಬಿಡುಗಡೆ ಮಾಡಿದ ಟಾಟಾ ಮೋಟಾರ್ಸ್