ಲಖನೌ: ಎಲೆಕ್ಟ್ರಿಕ್ ವಾಹನಗಳ (EV Vehicles) ಬಳಕೆ ಹೆಚ್ಚಿಸಲು ಕೇಂದ್ರ ಸರಕಾರ ಉತ್ತೇಜನ ನೀಡುತ್ತಿರುವ ನಡುವೆ ಉತ್ತರ ಪ್ರದೇಶ ಸರಕಾರ ಈ ನಿಟ್ಟಿನಲ್ಲಿ ದೊಡ್ಡ ನಿರ್ಧಾರವೊಂದನ್ನು ಕೈಗೊಂಡಿದೆ. ಮುಂದಿನ ಐದು ವರ್ಷಗಳ ಕಾಲ ಉತ್ತರ ಪ್ರದೇಶದಲ್ಲಿ ಉತ್ಪಾದನೆಯಾದ ಯಾವುದೇ ಇವಿ ವಾಹನಗಳನ್ನು ಖರೀದಿಸಿದರೆ ರೋಡ್ ಟ್ಯಾಕ್ಸ್ ಹಾಗೂ ನೋಂದಣಿ ಶುಲ್ಕದಿಂದ ವಿನಾಯಿತಿ ನೀಡಲು ಮುಂದಾಗಿದೆ. ಕಳೆದ ವರ್ಷದ ಅಕ್ಟೋಬರ್ನಿಂದ ಈ ಯೋಜನೆ ಜಾರಿಗೆ ಬಂದಿದ್ದು, ಎಲ್ಲ ಆರ್ಟಿಒ ಕಚೇರಿಗಳಿಗೆ ಕ್ರಮಕೈಗೊಳ್ಳುವಂತೆ ಸೂಚನೆ ನೀಡಿದೆ.
ಯೋಗಿ ಆದಿತ್ಯನಾಥ್ ನೇತೃತ್ವದ ಉತ್ತರ ಪ್ರದೇಶ ಸರಕಾರ ಈ ಕುರಿತು ಸಂಪೂರ್ಣ ಮಾಹಿತಿ ನೀಡಿದ್ದು, ಬ್ಯಾಟರಿ ಪವರ್ ಬಳಸಿ ಚಾಲನೆ ಪಡೆಯುವ ಎಲೆಕ್ಟ್ರಾನಿಕ್ ಮೋಟಾರ್ ಹೊಂದಿರುವ ಎಲ್ಲ ವಾಹನಗಳಿಗೆ ಈ ಸಬ್ಸಿಡಿ ಅನ್ವಯವಾಗಲಿದೆ ಎಂದು ಹೇಳಿದೆ. ದ್ವಿ ಚಕ್ರ, ಮೂರು ಚಕ್ರದ ವಾಹನ, ನಾಲ್ಕು ಚಕ್ರದ ವಾಹನಗಳು, ಸ್ಟ್ರಾಂಗ್ ಹೈಬ್ರಿಡ್, ಪ್ಲಗ್ ಇನ್ ಹೈಬ್ರಿಡ್ ವೆಹಿಕಲ್, ಬ್ಯಾಟರಿ ಎಲೆಕ್ಟ್ರಿಕ್ ವೆಹಿಕಲ್, ಫ್ಯುಯಲ್ ಸೆಲ್ ಎಲೆಕ್ಟ್ರಿಕ್ ವೆಹಿಕಲ್ಗಳು ಶುಲ್ಕ ವಿನಾಯಿತಿ ಪಡೆಯಲಿವೆ.
ಇದನ್ನೂ ಓದಿ : Tata Nexon EV : ನಾಲ್ಕು ದಿನದಲ್ಲಿ 4000 ಕಿ. ಮೀ ಪ್ರಯಾಣ, ಟಾಟಾ ನೆಕ್ಸಾನ್ ಇವಿ ಕಾರಿನ ದಾಖಲೆ
ಉತ್ತರ ಪ್ರದೇಶ ಸರಕಾರದ ಈ ನಿರ್ಧಾರದಿಂದಾಗಿ ಆಗ್ರಾದಲ್ಲಿ ಈಗಾಗಲೇ 3997 ಎಲೆಕ್ಟ್ರಿಕ್ ವಾಹನಗಳನ್ನು ಖರೀದಿ ಮಾಡಿರುವ ಮಾಲೀಕರಿಗೆ ಸಬ್ಸಿಡಿ ಲಾಭ ಸಿಗಲಿದೆ. ಇದರಲ್ಲಿ 437 ಇ ರಿಕ್ಷಾ, 30ಕಾರುಗಳು ಹಾಗೂ ಉಳಿದವು ದ್ವಿಚಕ್ರ ವಾಹನಗಳಾಗಿವೆ.
ಹೆಚ್ಚುವರಿಯಾಗಿ ಕೇಂದ್ರ ಸರಕಾರವೂ ಸಬ್ಸಿಡಿ ನೀಡುತ್ತಿದ್ದು, ಇವೆಲ್ಲವೂ ಒಟ್ಟು ಸೇರಿದರೆ ದ್ವಿ ಚಕ್ರವಾಹನಗಳ ಬೆಲೆ 10ರಿಂದ 20 ಸಾವಿರ ರೂಪಾಯಿ ಕಡಿಮೆಯಾಗಿದೆ. ಕಾರುಗಳು ದರ 1 ಲಕ್ಷ ರೂಪಾಯಿ ಇಳಿಕೆಯಾಗಲಿದೆ.