ಬೆಂಗಳೂರು : ಮಾರುತಿ ಸುಜುಕಿ ಕಂಪನಿಯ ನೂತನ ಬಲೆನೊ ಕಾರುಗಳಲ್ಲಿ ಎಚ್ಯುಡಿ ಡಿಸ್ಪ್ಲೇ ಫೀಚರ್ ಕೊಡಲಾಗಿದೆ. ಗ್ರಾಹಕರು ಈ ಫೀಚರ್ ಬಗ್ಗೆ ಅತ್ಯಾಸಕ್ತಿ ತೋರಿಸುತ್ತಿದ್ದಾರೆ. ಹಿಂದೆಲ್ಲ ಈ ಫೀಚರ್ಗಳು ಐಷಾರಾಮಿ ಕಾರುಗಳಲ್ಲಿ ಮಾತ್ರ ಲಭ್ಯವಿರುತ್ತಿತ್ತು. ಆದರೀಗ ಸಣ್ಣಪುಟ್ಟ ಕಾರುಗಳಲ್ಲೂ ಈ ಫೀಚರ್ ಲಭ್ಯವಾಗುತ್ತಿದೆ. ಹಾಗಾದರೆ ಎಚ್ಯುಡಿ ಡಿಸ್ಪ್ಲೇ ಎಂದರೇನ? ಅದು ಜನಪ್ರಿಯತೆ ಪಡೆಯಲು ಕಾರಣವೇನು ಎಂಬುದನ್ನು ನೋಡೋಣ.
ವಿಂಡ್ಸ್ಟ್ರೀನ್ ಅಥವಾ ಇನ್ಯಾವುದೇ ಪಾರದರ್ಶಕ ಡಿಸ್ಪ್ಲೇ ಮೂಲಕ ಡ್ರೈವರ್ಗೆ ಪ್ರಮುಖ ಮಾಹಿತಿಯನ್ನು ತೋರಿಸುವ ತಾಂತ್ರಿಕತೆಯನ್ನು ಎಚ್ಯುಡಿ ಡಿಸ್ಪ್ಲೇ ಎಂದು ಕರೆಯಲಾಗುತ್ತದೆ. ಅಂದರೆ ಚಾಲಕರು ರಸ್ತೆಯಿಂದ ತಮ್ಮ ತಮ್ಮ ನೋಟವನ್ನು ಬದಲಿಸದೇ ಎದುರಿಗೆ ಇರುವ ಕನ್ನಡಿಯಲ್ಲೇ ಅಗತ್ಯ ಮಾಹಿತಿ ನೋಡುವುದಕ್ಕೆ ಸಾಧ್ಯವಿದೆ. ಸದ್ಯದ ಪರಿಸ್ಥಿತಿಯಲ್ಲಿ ಇದು ಅಗತ್ಯ ಸುರಕ್ಷತಾ ಫೀಚರ್ ಎಂದೇ ಪರಿಗಣಿಸಲಾಗಿದೆ.
ಎಲ್ಲಿಂದ ಬಂತು ಟೆಕ್ನಾಲಜಿ?
ಎಚ್ಯುಡಿ ಡಿಸ್ಪ್ಲೆ ಆರಂಭದಲ್ಲಿ ಯುದ್ಧ ವಿಮಾನಗಳಲ್ಲಿ ಬಳಕೆಯಾಗುತ್ತಿತ್ತು. ಫೈಟರ್ಜೆಟ್ಗಳ ಪೈಲೆಟ್ಗಳಿಗೆ ದೃಷ್ಟಿ ಬದಲಿಸಲು ಅವಕಾಶ ಇಲ್ಲದ ಕಾರಣ ಇದರ ಆವಿಷ್ಕಾರ ಅನಿವಾರ್ಯವಾಯಿತು. ಏವಿಯೇಷನ್ ಹಾಗೂ ಆಟೋಮೊಬೈಲ್ ಕ್ಷೇತ್ರವು ಪರಸ್ಪರ ಸಂಬಂಧ ಹೊಂದಿರುವ ಕಾರಣ ಅಲ್ಲಿನ ತಾಂತ್ರಿಕತೆ ಬಹುಬೇಗ ವಾಹನಗಳಲ್ಲೂ ಕಾಣಿಸಿಕೊಳ್ಳುತ್ತವೆ. ಅಂತೆಯೇ ಎಚ್ಯುಡಿ ಡಿಸ್ಪ್ಲೇ ಕೂಡ ಕಾರುಗಳಲ್ಲಿ ಕಾಣಿಸಿಕೊಂಡಿತು. ಮೊದಲಿಗೆ ಐಷಾರಾಮಿ ಕಾರುಗಳಲ್ಲಿ ಮಾತ್ರ ಎಚ್ಯುಡಿ ಡಿಸ್ಪ್ಲೇ ನೀಡಲಾಗುತ್ತಿತ್ತು. ಈ ತಂತ್ರಜ್ಞಾನ ಲಭ್ಯತೆ ಹೆಚ್ಚಾದ ಹಾಗೆ ಎಲ್ಲ ಸಣ್ಣಪುಟ್ಟ ಕಾರುಗಳಲ್ಲಿಯೂ ಲಭ್ಯವಾಗತೊಡಗಿತು.
1940ರಲ್ಲಿ ಮೊದಲ ಬಾರಿಗೆ ಬ್ರಿಟಿಷ್ ರಾಯಲ್ ಏರ್ಫೋರ್ಸ್ ಎಚ್ಯುಡಿ ತಂತ್ರಜ್ಞಾನವನ್ನು ಮೊದಲ ಬಾರಿಗೆ ಜಾರಿಗೆ ತಂದಿತು. 1980 ಅವಧಿಯಲ್ಲಿ ಅದು ಇನ್ನಷ್ಟು ಜನಪ್ರಿಯವಾಯಿತು. ಓಲ್ಡ್ಸ್ಮೊಬೈಲ್ ಕಟ್ಲಾಸ್ ಕಾರಿನಲ್ಲಿ ಮೊದಲ ಬಾರಿಗೆ ಎಚ್ಯುಡಿ ಡಿಸ್ಪ್ಲೇ ಬಳಸಲಾಯಿತು. ಇಲ್ಲಿ ಕೇವಲ ಸ್ಪೀಡೋ ಮೀಟರ್ ಮಾತ್ರ ನೋಡುವ ಅವಕಾಶ ಇತ್ತು. ಇದಕ್ಕೆ ಅತ್ಯುತ್ತಮ ಪ್ರತಿಕ್ರಿಯೆ ದೊರಕಿದ ಬಳಿಕ ಜನರಲ್ ಮೋಟಾರ್ಸ್ ತನ್ನ ಕಾರುಗಳಲ್ಲಿ ಈ ತಂತ್ರಜ್ಞಾನ ಬಳಸಿಕೊಂಡಿತು. 1989ರಲ್ಲಿ ಜಪಾನ್ ಮೂಲದ ನಿಸ್ಸಾನ್ ಕಂಪನಿ ಎಚ್ಯುಡಿ ತಂತ್ರಜ್ಞಾನವನ್ನು ಅಳವಡಿಸಿಕೊಂಡಿತು. ಅಲ್ಲಿಂದ ಐಷಾರಾಮಿ ಹಾಗೂ ಮಧ್ಯಮ ಬಜೆಟ್ನ ಕಾರುಗಳಲ್ಲಿ ಇದು ಲಭ್ಯವಾಯಿತು.
ಎಚ್ಯುಡಿ ಬಗೆಗಳು
ಎರಡು ಬಗೆಯ ಎಚ್ಯುಡಿ ಡಿಸ್ಪ್ಲೇ ಪ್ರಸ್ತುತ ಲಭ್ಯವಿದೆ. ಒಂದು ಪ್ರೊಜೆಕ್ಷನ್ ಆಧಾರಿತ ಡಿಸ್ಪ್ಲೇ ಹಾಗೂ ಇನ್ನೊಂದು ರಿಫ್ಲೆಕ್ಷನ್ ಆಧಾರಿತ ಡಿಸ್ಪ್ಲೇ. ಪ್ರೊಜೆಕ್ಷನ್ನಲ್ಲಿ ಎಲ್ಇಡಿ ಅಥವಾ ಲೇಸರ್ ಲೇಸರ್ ಲೈಟ್ಗಳನ್ನು ಬಳಸಿಕೊಂಡು ಡ್ರೈವಿಂಗ್ ಮಾಹಿತಿಯನ್ನು ನೀಡಲಾಗುತ್ತದೆ. ಇದರಿಂದ ಡಿಸ್ಪ್ಲೇ ಹೆಚ್ಚು ಬ್ರೈಟ್ ಆಗಿರುತ್ತದೆ ಹಾಗೂ ಚಾಲಕನಿಗೆ ಯಾವುದೇ ತೊಂದರೆ ಆಗುವುದಿಲ್ಲ. ಇದು ಅತ್ಯಂತ ದುಬಾರಿ ಹಾಗೂ ಐಷಾರಾಮಿ ಕಾರುಗಳಲ್ಲಿ ಮಾತ್ರ ಲಭ್ಯವಿರುತ್ತದೆ.
ರಿಪ್ಲೆಕ್ಷನ್ ಆಧರಿತ ಎಚ್ಯುಡಿ ಇನ್ನೊಂದು ತಂತ್ರಜ್ಞಾನ. ಇದನ್ನು ಪಾರದರ್ಶಕ ಕನ್ನಡಿಯಲ್ಲಿ ಮಾಡಲಾಗುತ್ತದೆ. ಇದು ಪ್ರೊಜೆಕ್ಷನ್ ಆಧಾರಿತ ಎಚ್ಯುಡಿಯಷ್ಟು ಪರಿಣಾಮಕಾರಿಯಲ್ಲ. ಇದು ಹೆಚ್ಚುವರಿಗೆ ಲೈಟ್ ಬಿಡುಗಡೆ ಮಾಡುವ ಕಾರಣ ಚಾಲಕರ ಕಣ್ಣಿಗೆ ಕೊಂಚ ಅಡಚಣೆ ಉಂಟು ಮಾಡುತ್ತವೆ. ಆದರೆ ಇದು ಅಗ್ಗದ ದರದಲ್ಲಿ ಲಭ್ಯವಿರುವ ತಂತ್ರಜ್ಞಾನ ಆಗಿರುವ ಕಾರಣ ಮಧ್ಯಮ ಗಾತ್ರದ ಕಾರುಗಳಿಗೂ ಅಳವಡಿಸಲು ಸಾಧ್ಯವಾಗುತ್ತಿತ್ತು. ಇದನ್ನು ಪ್ಲಗ್ ಆಂಡ್ ಪ್ಲೇ ಮೂಲಕ ಅಳವಡಿಸಲು ಸಾಧ್ಯವಿರುವ ಕಾರಣ ಹೆಚ್ಚಿನ ಕ್ಯಾಲಿಬರೇಷನ್ಬೇಕಾಗಿಲ್ಲ.
ಲಾಭವೇನು?
ಇದು ಕಾರಿನಲ್ಲಿ ಬರುವ ಸುರಕ್ಷತಾ ಫೀಚರ್. ಚಾಲಕ ತನ್ನ ಕಣ್ಣನ್ನು ರಸ್ತೆಯಿಂದ ಹೊರಗೆ ಸರಿಸದೇ ಮಾಹಿತಿಯನ್ನು ನೋಡಲು ಈ ಡಿಸ್ಪ್ಲೇಯಿಂದ ಸಾಧ್ಯವಿದೆ. ಇದರಿಂದ ಸಂಭಾವ್ಯ ಅವಘಡಗಳನ್ನು ತಪ್ಪಿಸಬಹುದು ಎನ್ನಲಾಗುತ್ತದೆ. ಸುಧಾರಿತ ಎಚ್ಯುಡಿಯಲ್ಲಿ ನ್ಯಾವಿಗೇಷನ್, ವಾರ್ನಿಂಗ್ ಲೈಟ್, ಎಂಜಿನ್ ಸೇರಿದಂತೆ ಎಲ್ಲ ಮಾಹಿತಿಯನ್ನೂ ಇಲ್ಲಿ ನೋಡುವುದಕ್ಕೆ ಸಾಧ್ಯವಿದೆ.
ಭಾರತದಲ್ಲಿ ಎಚ್ಯುಡಿ ಇರುವ ಕಾರುಗಳು
ಭಾರತದಲ್ಲಿ 35ಕ್ಕೂ ಅಧಿಕ ಕಾರು ಬ್ರಾಂಡ್ಗಳಲ್ಲಿ ಎಚ್ಯುಡಿ ಫೀಚರ್ ಇದೆ. ಮರ್ಸಿಡೀಸ್ ಬೆಂಜ್, ಬಿಎಂಡಬ್ಲ್ಯು, ಔಡಿ, ಲೆಕ್ಸಸ್, ಜಾಗ್ವರ್, ಲ್ಯಾಂಡ್ ರೋವರ್, ವೋಲ್ವೊ ಮತ್ತು ಮಿನಿಯಂಥ ಐಷಾರಾಮಿ ಕಾರುಗಳಲ್ಲಿ ಇದು ಕಡ್ಡಾಯವಾಗಿದೆ. ಕಿಯಾ ಸೆಲ್ಟೋಸ್, ಟೊಯೊಟಾ ಕ್ಯಾಮ್ರಿ, ಮಾರುತಿ ಸುಜುಕಿ ಬಲೆನೊದಲ್ಲೂ ನೀಡಲಾಗಿದೆ.
ಇದನ್ನೂ ಓದಿ| Compact SUV’s | ಎಸ್ಯುವಿ ಅಭಿಮಾನಿಗಳಿಗೆ ಸಿಹಿ ಸುದ್ದಿ; ಶೀಘ್ರವೇ ಈ ಎಲ್ಲ ಕಾರುಗಳು ಬೆಲೆ ಇಳಿಕೆ?