ನಾಯಿಗಳು ಮನುಷ್ಯನಿಗೆ ಹೆಚ್ಚು ಆಪ್ತವಾಗುವ ಪ್ರಾಣಿಗಳು. ಮನೆಯಲ್ಲಿ ಸಾಕುವ ನಾಯಿಗಳನ್ನು ಬೇಕಾದಂತೆ ಪಳಗಿಸಿಕೊಳ್ಳಬಹುದು. ಅದು ಮಾತು ಕೇಳುವ, ನಂಬಿಕಸ್ಥ ಪ್ರಾಣಿ ಎಂದೇ ಹೇಳಲಾಗುತ್ತದೆ. ಇಂಥ ಶ್ವಾನಕ್ಕೆ ಸಂಬಂಧಪಟ್ಟ ಹಲವು ವಿಡಿಯೊಗಳನ್ನು ನಾವು ಇಂಟರ್ನೆಟ್ನಲ್ಲಿ ನೋಡುತ್ತೇವೆ. ನಾಯಿಯ ಆಟ-ಮನುಷ್ಯರೊಂದಿಗೆ ಅದು ಹೊಂದಿಕೊಳ್ಳುವ ಪರಿ ನೋಡಿ ಆಶ್ಚರ್ಯ ವ್ಯಕ್ತಪಡಿಸಿದ್ದೂ ಇದೆ. ಅಂಥದ್ದೇ ಒಂದು ಅಚ್ಚರಿ ಹುಟ್ಟಿಸುವ ವಿಡಿಯೊ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಅದರಲ್ಲಿ ವ್ಯಕ್ತಿಯೊಬ್ಬ ಗಣಪತಿ ದೇವಸ್ಥಾನದಲ್ಲಿ ನಿಂತು, ಗಣಪತಿಗೆ ಕೈಮುಗಿಯುತ್ತ, ಪ್ರಾರ್ಥನೆ ಸಲ್ಲಿಸುವುದನ್ನು ಮತ್ತು ಅವರ ಪಕ್ಕದಲ್ಲಿ ಶ್ವಾನವೊಂದು ತನ್ನ ಎರಡೂ ಕಾಲುಗಳನ್ನು ಮಡಚಿ, ಮುಖವನ್ನೂ ನೆಲಕ್ಕೆ ಇಟ್ಟುಕೊಂಡು ಗಣಪತಿಗೆ ನಮಸ್ಕಾರ ಮಾಡುವುದನ್ನು ನೋಡಬಹುದು. ತನ್ನ ಯಜಮಾನ ದೇವರಿಗೆ ಭಕ್ತಿಯಿಂದ ನಮಿಸುವುದನ್ನು ನೋಡಿದ, ಈ ಶ್ವಾನವೂ ದೇವರಿಗೆ ಭಕ್ತಿಯಿಂದ ವಂದಿಸಿದೆ.
ಈ ವಿಡಿಯೊ ಸಿಕ್ಕಾಪಟೆ ವೈರಲ್ ಆಗುತ್ತಿದೆ. ಶ್ವಾನದ ಭಕ್ತಿ ನೋಡಿ ನೆಟ್ಟಿಗರು ಫುಲ್ ಖುಷಿ ವ್ಯಕ್ತಪಡಿಸಿದ್ದಾರೆ. ಇನ್ನು ವಿಡಿಯೊ ನೋಡಿದವರು ಒಬ್ಬರು, ‘ಈ ವ್ಯಕ್ತಿ ಹೆಸರು ವಿಶಾಲ್ ಎಂದು. ಪುಣೆಯವರು. ಅಲ್ಲೇ ದೇವಸ್ಥಾನದ ಪಕ್ಕದಲ್ಲೇ ಅವರ ಮನೆಯಿದೆ’ ಎಂದು ಕಮೆಂಟ್ ಮಾಡಿದ್ದಾರೆ.
ಇದನ್ನೂ ಓದಿ: Viral news | ಲೋಕಲ್‌ ರೈಲಿನಲ್ಲಿ ಸೀಟು ಗಿಟ್ಟಿಸಿಕೊಳ್ಳುವ ಭಾರತದ ಸ್ಪೈಡರ್‌ ಮ್ಯಾನ್!