ಬೆಂಗಳೂರು: ಭಾರತೀಯ ಸಂಪ್ರದಾಯ ನಮ್ಮ ಹೆಮ್ಮೆ. ಎಷ್ಟೋ ವಿದೇಶಿ ಜನರು ಕೂಡ ನಮ್ಮ ಭಾರತದ ಮಣ್ಣಿಗೆ ಬಂದು ವಿವಾಹ ಮಾಡಿಕೊಂಡಿದ್ದನ್ನು ನೀವು ಕೇಳಿರುತ್ತೀರ, ನೋಡಿರುತ್ತೀರ. ಇದೀಗ ಟ್ವಿಟರ್ ಮಾಲೀಕ, ವಿಶ್ವದ ಪ್ರಸಿದ್ಧ ಉದ್ಯಮಿ ಎಲಾನ್‌ ಮಸ್ಕ್‌ ಅವರೇ ಭಾರತಕ್ಕೆ ಬಂದು ಮದುವೆಯಾಗಿದ್ದಾರಂತೆ! ಭಾರತೀಯ ಸಂಪ್ರದಾಯದ ಮದುಮಗನಾಗಿ ಅವರ ಮಿಂಚಿರುವ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಕತ್‌ ವೈರಲ್ (Viral News) ಆಗುತ್ತಿವೆ.
ಹೌದು. ಎಲಾನ್‌ ಮಸ್ಕ್‌ ಅವರು ಮದುಮಗನಾಗಿ ಸಂಬಂಧಿಕರ ಮಧ್ಯೆ ಮಿಂಚುತ್ತಿರುವುದು, ಕುದುರೆ ಏರಿ ಬರುತ್ತಿರುವುದು, ಕ್ಯಾಮೆರಾಗೆ ಫೋಸ್‌ ಕೊಡುತ್ತಿರುವ ಹಲವಾರು ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಿಸಿಕೊಂಡಿವೆ. ಅಂದ ಹಾಗೆ ಇದ್ಯಾವುದೂ ನಿಜವಾದ ಫೋಟೋಗಳಲ್ಲ. ಇವೆಲ್ಲವೂ ಆರ್ಟಿಫಿಶಿಯಲ್‌ ಇಂಟೆಲಿಜೆನ್ಸ್‌ ಸಹಾಯದಿಂದ ರಚಿಸಿರುವಂತಹ ಫೋಟೋಗಳಾಗಿವೆ.
ಇದನ್ನೂ ಓದಿ: Viral News : ಇವರು ಭಲೇ ಸ್ಟೂಡೆಂಟ್ಸ್, ಶಾಲೆಯನ್ನೇ ಮಾರಾಟಕ್ಕೆ ಇಟ್ಟಿದ್ದಾರೆ ನೋಡಿ!
ರೋಲಿಂಗ್‌ ಕ್ಯಾನ್ವಾಸ್‌ ಹೆಸರಿನ ಇನ್‌ಸ್ಟಾಗ್ರಾಂ ಪೇಜ್‌ನಲ್ಲಿ ಈ ಫೋಟೋಗಳನ್ನು ಹಂಚಿಕೊಳ್ಳಲಾಗಿದೆ. “ಎಲಾನ್‌ ಮಸ್ಕ್‌ ಭಾರತದಲ್ಲಿ ಮದುವೆಯಾದರೆ- ಇದು ನನ್ನ ಊಹೆ” ಎಂದು ಫೋಟೋಗಳ ಜತೆ ಕ್ಯಾಪ್ಶನ್‌ ಅನ್ನು ಕೊಡಲಾಗಿದೆ. ಫೋಟೋಗಳಂತೂ ಯಾರೂ ಊಹಿಸದಷ್ಟು ನೈಜವಾಗಿದ್ದು, ನೆಟ್ಟಿಗರ ಮನಸ್ಸು ಕದಿಯುವಲ್ಲಿ ಯಶಸ್ವಿಯಾಗಿದೆ. ಮಿಡ್‌ಜರ್ನಿ ಹೆಸರಿನ ಟೂಲ್‌ ಬಳಸಿಕೊಂಡು ಈ ಫೋಟೋಗಳನ್ನು ರಚಿಸಲಾಗಿದೆ.
ಈ ಪೋಸ್ಟ್‌ ಅನ್ನು ಮೂರು ದಿನಗಳ ಹಿಂದೆ ಹಂಚಿಕೊಳ್ಳಲಾಗಿದೆ. ಅಂದಿನಿಂದ ಇಂದಿನವರೆಗೆ ಪೋಸ್ಟ್‌ ಸಾಕಷ್ಟು ಜನರಿಂದ ಲೈಕ್‌ಗಳನ್ನು ಪಡೆದುಕೊಂಡಿದೆ. ಹಾಗೆಯೇ ನೂರಾರು ಮಂದಿ ಈ ಪೋಸ್ಟ್‌ ಅನ್ನು ತಮ್ಮ ಸ್ನೇಹಿತರೊಂದಿಗೆ ಹಂಚಿಕೊಂಡಿದ್ದಾರೆ ಕೂಡ. “ಒಂದು ಕ್ಷಣಕ್ಕೆ ನಾನಿದನ್ನು ನಿಜ ಎಂದೇ ತಿಳಿದುಕೊಂಡುಬಿಟ್ಟೆ. ನಿಮ್ಮ ಕ್ಯಾಪ್ಶನ್‌ ನೋಡಿದ ಮೇಲೇ ಇದು ಎಐ ಫೋಟೋ ಎಂದು ತಿಳಿದುಬಂದಿದ್ದು”, “ಮಸ್ಕ್‌ ಹಿಂದಿರುವವರಂತೂ ನಿಜವಾಗಿಯೂ ಸಾಮಾನ್ಯ ಫೋಟೋದಲ್ಲಿರುವವರಂತೆಯೇ ಕಾಣುತ್ತಿದ್ದಾರೆ. ನೀವು ಎಐ ಫೋಟೋದೊಂದಿಗೆ ನಿಜವಾದ ಫೋಟೋವನ್ನು ಮರ್ಜ್‌ ಮಾಡಿದ್ದೀರಾ?” ಎನ್ನುವಂತಹ ಹಲವಾರು ಕಾಮೆಂಟ್‌ಗಳು ಫೋಟೋಗಳಿಗೆ ಬಂದಿವೆ.