ಬೆಂಗಳೂರು: ಜರ್ಮನ್ ರಾಯಭಾರಿ ಕಚೇರಿಯ ಇಬ್ಬರು ಅಧಿಕಾರಿಗಳು ಬೆಂಗಳೂರಿನ ಹೋಟೆಲ್ವೊಂದಕ್ಕೆ ಬಂದು, ಕನ್ನಡದಲ್ಲೇ ಮಸಾಲೆ ದೋಸೆ ಆರ್ಡರ್ ಮಾಡಿ, ಬಿಸಿಬಿಸಿ ದೋಸೆಯನ್ನು ಸವಿದು ಹೋಗಿದ್ದಾರೆ. ಭಾರತದಲ್ಲಿ ಕರ್ನಾಟಕ ಮತ್ತು ಕೇರಳ ರಾಜ್ಯಗಳ ಜರ್ಮನಿ ರಾಯಭಾರಿ ಅಚಿಮ್ ಬರ್ಕಾರ್ಟ್ ಅವರು ಈ ವಿಡಿಯೋ ಶೇರ್ ಮಾಡಿಕೊಂಡಿದ್ದಾರೆ. ಅವರ ಇಬ್ಬರು ಸಹೋದ್ಯೋಗಿಗಳು ಲಾಲ್ ಬಾಗ್ ಬಳಿಯ ಎಂಟಿಆರ್ ಹೋಟೆಲ್ಗೆ ಹೋದ ವಿಡಿಯೋವನ್ನು ಟ್ವಿಟರ್ನಲ್ಲಿ ಪೋಸ್ಟ್ ಮಾಡಿ, ‘ನನ್ನಿಬ್ಬರು ಸಹೋದ್ಯೋಗಿಗಳು ಎಂಟಿಆರ್ಗೆ ಹೋಗಿ, ಕನ್ನಡದಲ್ಲೇ ತಿಂಡಿ ಆರ್ಡರ್ ಮಾಡಿದ್ದಾರೆ. ಈ ಬಗ್ಗೆ ನಿಮಗೆಲ್ಲ ಏನೆನ್ನಿಸಿತು?’ ಎಂದು ಪ್ರಶ್ನಿಸಿದ್ದಾರೆ.
ಇಬ್ಬರು ಅಧಿಕಾರಿಗಳು ಮಾವಳ್ಳಿ ಟಿಫಿನ್ ರೂಮ್ಸ್ (MTR)ಗೆ ಹೋಗುತ್ತಾರೆ. ಅದರಲ್ಲೊಬ್ಬರು ವೇಟರ್ ಬಳಿ ಕನ್ನಡದಲ್ಲೇ, ‘ನಮಸ್ಕಾರ, ಎಂಟಿಆರ್ ಸ್ಪೆಶಲ್ ಏನು?’ ಎಂದು ಕೇಳುತ್ತಾರೆ. ಅದಕ್ಕೆ ಆತ ಉತ್ತರಿಸಿ ‘ಎಂಟಿಆರ್ ರವಾ ಇಡ್ಲಿ, ಮಸಾಲದೋಸಾ’ ಎನ್ನುತ್ತಾನೆ. ಆಗ ಇನ್ನೊಬ್ಬ ಜರ್ಮನ್ ಅಧಿಕಾರಿ ‘ನನಗೆ ಒಂದು ಮಸಾಲೆ ದೋಸೆ ಕೊಡಿ‘ ಎಂದು ಸ್ಪಷ್ಟವಾಗಿಯೇ ಹೇಳುತ್ತಾರೆ. ಮತ್ತೊಬ್ಬರು ‘ಆಮೇಲೆ ಒಂದು ಬಾಟಲಿ ನೀರು’ ಎನ್ನುತ್ತಾರೆ. ಬಳಿಕ ದೋಸೆಯ ಒಂದು ತುತ್ತು ಬಾಯಿಗಿಟ್ಟು ‘ಸಖತ್ತಾಗಿದೆ’ ಎನ್ನುತ್ತಾರೆ.
ಕರ್ನಾಟಕದ ಫೇಮಸ್ ಫುಡ್ ಬ್ರ್ಯಾಂಡ್ ಮಾವಳ್ಳಿ ಟಿಫಿನ್ ರೂಮ್ಸ್ (MTR) ದೇಶಾದ್ಯಂತ ಹೆಸರು ಮಾಡಿದೆ. ಬೆಂಗಳೂರಿನಲ್ಲೇ 10ಕ್ಕೂ ಹೆಚ್ಚು ಹೋಟೆಲ್ಗಳಿವೆ. ಅದರಾಚೆ ರಾಜ್ಯದ ಉಡುಪಿ, ಮೈಸೂರುಗಳಿಗೂ ವಿಸ್ತರಣೆಯಾಗಿದೆ. ಅಷ್ಟೇ ಅಲ್ಲ, ಸಿಂಗಾಪುರ, ಮಲೇಷಿಯಾದ ಕೌಲಾಲಂಪುರ್, ಲಂಡನ್ ಮತ್ತು ದುಬೈನಲ್ಲೂ ಕೂಡ ಎಂಟಿಆರ್ ಕಾಣಸಿಗುತ್ತದೆ. ಈಗ ಜರ್ಮನಿಯ ಇಬ್ಬರು ಅಧಿಕಾರಿಗಳು ಟಿಫಿನ್ ಸೆಂಟರ್ಗೆ ಬಂದು ಕನ್ನಡದಲ್ಲೇ ಆರ್ಡರ್ ಮಾಡಿದ್ದು ಕನ್ನಡಿಗರ ಮೆಚ್ಚುಗೆಗೆ ಪಾತ್ರವಾಗಿದೆ.
ಇದನ್ನೂ ಓದಿ: Viral Video | ಪಂಜರದಲ್ಲಿರುವ ಮನುಷ್ಯರನ್ನು ನೋಡಲು ಬಂದು ನಿಲ್ಲುವ ಕಾಡು ಪ್ರಾಣಿಗಳು !