ಮಕ್ಕಳು ಪಾಕೆಟ್ ಮನಿ ಬಗ್ಗೆ ವಿಶೇಷ ಆಸಕ್ತಿ ಹೊಂದಿರುತ್ತಾರೆ. ಬಹುತೇಕ ಮನೆಗಳಲ್ಲಿ ಪಾಲಕರು ತಮ್ಮ ಮಕ್ಕಳಿಗೆ ತಿಂಗಳಿಗೆ ಇಷ್ಟೋ, ಅಷ್ಟೋ ಎಂದು ಹಣ ನೀಡುವ ಮತ್ತು ಆ ಮಕ್ಕಳು ಅದನ್ನು ತಮ್ಮ ಪಿಗ್ಗಿ ಬ್ಯಾಂಕ್ (Piggy Bank)ನಲ್ಲಿ ಕೂಡಿಡುವ ಪರಿಪಾಠ ಬೆಳೆದುಕೊಂಡು ಬಂದಿರುತ್ತದೆ. ಯಾವುದಾದರೂ ಒಂದು ಮಹತ್ವದ ಕಾರಣ ಇದ್ದ ಹೊರತು ಆ ಪಿಗ್ಗಿ ಬ್ಯಾಂಕ್ ಒಡೆಯುವುದಿಲ್ಲ. ಈಗ ಅದೇ ಪಿಗ್ಗಿ ಬ್ಯಾಂಕ್ ಮತ್ತು ಕೂಡಿಟ್ಟ ಹಣಕ್ಕೆ ಸಂಬಂಧಪಟ್ಟ ವಿಡಿಯೊವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ ಆಗುತ್ತಿದ್ದು (Viral Video), ಇಬ್ಬರು ಬಾಲಕಿಯರ ಪಿಗ್ಗಿ ಬ್ಯಾಂಕ್ನಲ್ಲಿದ್ದ ಕಂತೆಕಂತೆ ಹಣ ನೋಡಿ, ನೆಟ್ಟಿಗರಿಗೇ ಶಾಕ್ ಆಗಿದೆ. ‘ಐಟಿ ಅಧಿಕಾರಿಗಳನ್ನು ಕರೆಯಿರಿ’ ಎಂದು ಕಾಲೆಳೆಯುತ್ತಿದ್ದಾರೆ.
ಇಬ್ಬರು ಬಾಲಕಿಯರ ಪಿಗ್ಗಿ ಬ್ಯಾಂಕ್ ನೋಡೋಕೇನೋ ಸಖತ್ ಕ್ಯೂಟ್ ಆಗಿದೆ. 2000 ರೂಪಾಯಿ ನೋಟುಗಳ ಚಲಾವಣೆಯನ್ನು ಆರ್ಬಿಐ ಹಿಂತೆಗೆದುಕೊಂಡ ಬೆನ್ನಲ್ಲೇ ಅವರು ಅದನ್ನು ಒಡೆದಿದ್ದಾರೆ. ಅಂದರೆ ಪಿಗ್ಗಿ ಬ್ಯಾಂಕ್ನಲ್ಲಿ 2000 ರೂ.ನೋಟುಗಳೂ ಇರುವುದು ಗೊತ್ತಿದ್ದ ಕಾರಣ ಅದನ್ನು ತೆಗೆದು, ಬ್ಯಾಂಕ್ನಲ್ಲಿ ಡಿಪೋಸಿಟ್ ಇಡಬೇಕಿತ್ತು. ಆ ನೋಟುಗಳನ್ನು ತೆಗೆಯಬೇಕು ಎಂದರೆ ಪಿಗ್ಗಿ ಬ್ಯಾಂಕ್ ಒಡೆಯಲೇಬೇಕಿತ್ತು. ಹೀಗಾಗಿ ಬಾಲಕಿಯರ ಅಮ್ಮನೇ ಆ ಪಿಗ್ಗಿ ಬ್ಯಾಂಕ್ ಒಡೆದಿದ್ದಾರೆ. ಅದನ್ನು ಒಡೆದಾಗ ಕಂತೆಕಂತೆ ನೋಟುಗಳು ಬಿದ್ದಿವೆ. ಬರೀ ಐದುನೂರು, 2 ಸಾವಿರ ನೋಟುಗಳೇ ಅದರಲ್ಲಿದ್ದವು. ಪುಟ್ಟ ಹುಡುಗಿಯರಂತೂ ಅದನ್ನು ಆಟವಾಡಲೇ ಶುರು ಮಾಡಿದ್ದರು.
ಮೊದಲು ಈ ವಿಡಿಯೊ ಶೇರ್ ಆಗಿದ್ದು ವಾಸಿಮ್ ಮನ್ಸುರಿ ಎಂಬುವರು ಇನ್ಸ್ಟಾಗ್ರಾಂ ಅಕೌಂಟ್ನಲ್ಲಿ. ಇದೀಗ ಭರ್ಜರಿ ವೈರಲ್ ಆಗುತ್ತಿದೆ. ವಿಡಿಯೊಕ್ಕೆ 3.6 ಕೋಟಿ ವೀಕ್ಷಣೆ ಬಂದಿದೆ. ಆದರೆ ಯಾವ ಊರಲ್ಲಿ ನಡೆದಿದ್ದು ಎಂಬುದು ಗೊತ್ತಾಗಿಲ್ಲ. ವಿಡಿಯೊ ನೋಡಿದ ಜನ ಶಾಕ್ ವ್ಯಕ್ತಪಡಿಸಿ ಕಮೆಂಟ್ ಮಾಡುತ್ತಿದ್ದಾರೆ. ‘ಈ ಹುಡುಗಿಯರ ಪಿಗ್ಗಿ ಬ್ಯಾಂಕ್ನಲ್ಲಿ ಇದ್ದಷ್ಟು ಹಣ, ನನ್ನ ಬ್ಯಾಂಕ್ ಅಕೌಂಟ್ನಲ್ಲೂ ಇಲ್ಲ’ ಎಂದು ಒಬ್ಬರು ಕಮೆಂಟ್ ಮಾಡಿದ್ದಾರೆ. ‘ಅಯ್ಯೋ, ಪಿಗ್ಗಿ ಬ್ಯಾಂಕ್ನಲ್ಲಿ ಇಷ್ಟು ಹಣವಾ?’ ‘ಮೊದಲು ಆದಾಯ ತೆರಿಗೆ ಇಲಾಖೆಗೆ ಕರೆ ಮಾಡಿ’ ಎಂಬಿತ್ಯಾದಿ ಕಮೆಂಟ್ಗಳು ಬಂದಿವೆ.