ಬೆಂಗಳೂರು: ದೇಶದ ಮೂಲೆ ಮೂಲೆಯಲ್ಲೂ ಇಂದು ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸಲಾಗುತ್ತಿದೆ. ಎಲ್ಲರ ಮೊಬೈಲ್‌ಗಳಲ್ಲೂ ಸ್ವಾತಂತ್ರ್ಯ ದಿನಾಚರಣೆಯದ್ದೇ ಸ್ಟೇಟಸ್‌ಗಳು. ಅಷ್ಟೇ ಏಕೆ ಎಲ್ಲರದ್ದೂ ದೇಶಭಕ್ತಿಯ ರೀಲ್ಸ್‌ಗಳು. ಹೀಗಿರುವಾಗ ಮಧ್ಯಪ್ರದೇಶದ ಯುವತಿಯೊಬ್ಬರು ಐ ಲವ್‌ ಮೈ ಇಂಡಿಯಾ ಹಾಡಿಗೆ ಹೆಜ್ಜೆ ಹಾಕಿದ್ದಾರೆ. ಮಾಮೂಲಿ ನೃತ್ಯ ಮಾಡದೆ ಸೈಕಲ್‌ ಓಡಿಸುತ್ತ, ಅದರ ಮೇಲೇ ನೃತ್ಯ ಮಾಡಿರುವ ಯುವತಿಯ ವಿಡಿಯೊ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡಿದ್ದು, ವಿಡಿಯೊ ಭಾರೀ ವೈರಲ್‌ (Viral Video) ಆಗಿದೆ.
ಮಧ್ಯಪ್ರದೇಶದ ಭೋಪಾಲ್‌ನವರಾಗಿರುವ ನೃತ್ಯ ಕಲಾವಿದೆ ಬುಶ್ರಾ ಈ ವಿಡಿಯೊವನ್ನು ಹಂಚಿಕೊಂಡಿದ್ದಾರೆ. ಸ್ವಾತಂತ್ರ್ಯ ದಿನಾಚರಣೆಗೆಂದೇ ವಿಶೇಷ ರೀತಿಯಲ್ಲಿ ತ್ರಿವರ್ಣದ ಗೌನ್‌ ಅನ್ನು ವಿನ್ಯಾಸ ಮಾಡಿಸಿಕೊಂಡಿರುವ ಅವರು ಅದನ್ನು ತೊಟ್ಟುಕೊಂಡು ಸೈಕಲ್‌ ಹೊಡೆಯುತ್ತಿದ್ದಾರೆ. ಸೈಕಲ್‌ನ ಹ್ಯಾಂಡೆಲ್‌ ಅನ್ನು ಹಿಡಿದುಕೊಳ್ಳದೆಯೇ ಐ ಲವ್‌ ಮೈ ಇಂಡಿಯಾ ಹಾಡಿಗೆ ಕೈನಲ್ಲೇ ನೃತ್ಯ ಮಾಡಿದ್ದಾರೆ. ಕೊನೆಗೆ ರಾಷ್ಟ್ರ ಧ್ವಜವನ್ನು ತೆಗೆದು ದೇಶಕ್ಕೆ ಗೌರವ ಸೂಚಿಸಿದ್ದಾರೆ.
ಇದನ್ನೂ ಓದಿ: Viral Video : ಸಮುದ್ರದ ಆಳದಲ್ಲಿ ಧ್ವಜ ಹಾರಿಸಿದ ಕರಾವಳಿ ರಕ್ಷಣಾ ಪಡೆ! ಹೆಮ್ಮೆ ಎನಿಸುತ್ತದೆ ಈ ವಿಡಿಯೊ
ಈ ವಿಡಿಯೊವನ್ನು ಬುಶ್ರಾ ಅವರ ಇನ್‌ಸ್ಟಾಗ್ರಾಂ ಪೇಜ್‌ನಲ್ಲಿ ಸ್ವಾತಂತ್ರ್ಯ ದಿನಾಚರಣೆಗೆ ನಾಲ್ಕು ದಿನಗಳ ಮೊದಲು ಹಂಚಿಕೊಳ್ಳಲಾಗಿದೆ. ವಿಡಿಯೊ ಜತೆಯಲ್ಲಿ ಐ ಲವ್‌ ಮೈ ಇಂಡಿಯಾ ಎನ್ನುವ ಕ್ಯಾಪ್ಶನ್‌ ಕೊಡಲಾಗಿದೆ. ವಿಡಿಯೊ ಅಂದಿನಿಂದ ಇಂದಿನವರೆಗೆ 6.9 ಕೋಟಿಗೂ ಅಧಿಕ ಮಂದಿಯಿಂದ ವೀಕ್ಷಣೆಗೊಂಡಿದೆ. 72 ಲಕ್ಷಕ್ಕೂ ಅಧಿಕ ಮಂದಿ ವಿಡಿಯೊವನ್ನು ಲೈಕ್‌ ಮಾಡಿದ್ದಾರೆ. ಸಾವಿರಾರು ಮಂದಿ ವಿಡಿಯೊವನ್ನು ತಮ್ಮ ಸ್ನೇಹಿತರು ಮತ್ತು ಕುಟುಂಬಸ್ಥರೊಂದಿಗೆ ಹಂಚಿಕೊಂಡಿದ್ದಾರೆ. 45 ಸಾವಿರಕ್ಕೂ ಅಧಿಕ ಮಂದಿ ವಿಡಿಯೊಗೆ ಕಾಮೆಂಟ್‌ಗಳನ್ನು ಮಾಡಿದ್ದು, ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ.
ವಿಶೇಷವೆಂದರೆ ಈ ವಿಡಿಯೊಗೆ ಕೆಲವು ಸೆಲೆಬ್ರಿಟಿಗಳು ಕೂಡ ಲೈಕ್‌ ಮತ್ತು ಕಾಮೆಂಟ್‌ಗಳನ್ನು ಮಾಡಿದ್ದಾರೆ. ಪ್ರಸಿದ್ಧ ಯೂಟ್ಯೂಬರ್‌ ಆಗಿರುವ ಅರ್ಮಾನ್‌ ಮಲ್ಲಿಕ್‌ ಅವರೂ ಈ ವಿಡಿಯೊಗೆ ಫೈರ್‌ ಇಮೋಜಿಯನ್ನು ಕಾಮೆಂಟ್‌ ಮಾಡಿದ್ದಾರೆ.
“ಎಷ್ಟೊಳ್ಳೆ ರೀಲ್‌ ಅನ್ನು ನೀವು ಮಾಡಿದ್ದೀರಿ. ಅದಕ್ಕಾಗಿಯೇ ಕಾಮೆಂಟ್‌ ಸೆಕ್ಷನ್‌ ಮೆಚ್ಚುಗೆಯಿಂದ ತುಂಬಿ ತುಳುಕುತ್ತಿರುವುದು. ಐ ಲವ್‌ ಮೈ ಇಂಡಿಯಾ”, “ಭಾರತೀಯರಾಗಿರುವುದೇ ನಮ್ಮ ಹೆಮ್ಮೆ”, “ಅದ್ಭುತವಾಗಿದೆ. ನಿಮಗೆ ಸ್ವಾತಂತ್ರ್ಯ ದಿನಾಚರಣೆಯ ಶುಭಾಶಯಗಳು” ಎನ್ನುವಂತಹ ಕಾಮೆಂಟ್‌ಗಳನ್ನು ಮಾಡಿದ್ದಾರೆ. ಅದಷ್ಟೇ ಅಲ್ಲದೆ ಅನೇಕರು “ಅಮೇಜಿಂಗ್‌”, “ಸೂಪರ್‌”, “ಅದ್ಭುತ” ಎನ್ನುವಂತಹ ಕಾಮೆಂಟ್‌ಗಳನ್ನು ವಿಡಿಯೊಗೆ ಮಾಡಿದ್ದಾರೆ.
ಇದನ್ನೂ ಓದಿ: Viral Video: ರೇಸರ್ಗಳಂತೆ ರಾಂಚಿಯಲ್ಲಿ ಬೈಕ್ ಓಡಿಸಿದ ಧೋನಿ; ಬೈಕ್ ಬೆಲೆ ಎಷ್ಟು?
ಬುಶ್ರಾ ಅವರು ವಿಡಿಯೊ ಮಾಡುವುದರಲ್ಲಿ ಎತ್ತಿದ ಕೈ. ಈ ಹಿಂದೆ ಕೂಡ ಅವರು ಅನೇಕ ವಿಡಿಯೊಗಳನ್ನು ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದು, ಅದರಲ್ಲಿ ಅನೇಕ ವಿಡಿಯೊಗಳು ಹೆಚ್ಚು ಮೆಚ್ಚುಗೆ ಪಡೆದು, ವೈರಲ್‌ ಆಗಿದ್ದವು. ಸೈಕಲ್‌ ಮೇಲೆ ನೃತ್ಯ ಮಾಡುವ ಅನೇಕ ವಿಡಿಯೊಗಳನ್ನು ಕೂಡ ನೀವು ಅವರ ಪೇಜ್‌ನಲ್ಲಿ ನೋಡಬಹುದು. ಈ ರೀತಿಯ ವೈರಲ್‌ ವಿಡಿಯೊಗಳಿಂದಾಗಿಯೇ ಅವರು ಇನ್‌ಸ್ಟಾಗ್ರಾಂನಲ್ಲಿ ಸುಮಾರು 14 ಲಕ್ಷದಷ್ಟು ಹಿಂಬಾಲಕರನ್ನು ಹೊಂದಿದ್ದಾರೆ.