ಹುಲಿ-ಸಿಂಹಗಳೆಲ್ಲ ತಮಗಿಂತ ಚಿಕ್ಕ ಪ್ರಾಣಿಯನ್ನು ಕೊಂದು ತಿಂದು ತಮ್ಮ ಉದರ ತುಂಬಿಸಿಕೊಳ್ಳುತ್ತವೆ. ಹಾಗೇ, ಇಲ್ಲೊಂದು ಸಿಂಹಿಣಿ (ಹೆಣ್ಣು ಸಿಂಹ) ಜಿರಾಫೆ ಮರಿಯನ್ನು ಹಿಡಿದು, ಕುತ್ತಿಗೆಗೆ ಬಾಯಿ ಹಾಕಿತ್ತು. ಇನ್ನೇನು, ಜಿರಾಫೆ ಮರಿಯ ಕತ್ತು ಸೀಳಿ, ಅದರ ಮಾಂಸ ತಿಂದೇಬಿಡುತ್ತದೆ ಎಂಬಷ್ಟರಲ್ಲಿ ಊಹಿಸಲೂ ಸಾಧ್ಯವಾಗದ ತಿರುವು ಸಿಕ್ಕಿದೆ. ಈ ದೃಶ್ಯ ಸೋಷಿಯಲ್ ಮೀಡಿಯಾಗಳಲ್ಲಿ ಸಖತ್ ವೈರಲ್ ಆಗಿದೆ.
ಪುಟಾಣಿ ಜಿರಾಫೆ ಮರಿ ಮಲಗಿತ್ತು. ತುಸು ದೂರದಿಂದ ಓಡಿಬಂದ ಹೆಣ್ಣು ಸಿಂಹ ಅದನ್ನು ಹಿಡಿದು, ಕುತ್ತಿಗೆಗೆ ಬಾಯಿ ಹಾಕಿತು. ಆ ಜಿರಾಫೆ ಮರಿ ತಪ್ಪಿಸಿಕೊಳ್ಳಲು ಪ್ರಯತ್ನ ಮಾಡಿದರೂ ಸಾಧ್ಯವಾಗಿರಲಿಲ್ಲ. ಅದನ್ನು ಮಲಗಿಸಿಕೊಂಡು, ಕತ್ತು ಮುರಿದು ಹಾಕುವ ಪ್ರಯತ್ನವನ್ನು ಮುಂದುವರಿಸಿತ್ತು. ಆದರೆ ಅಷ್ಟರಲ್ಲಿ ತಾಯಿ ಜಿರಾಫೆ ಅಲ್ಲಿಗೆ ಬಂದಿದೆ. ಮಾರುದ್ದ ಕುತ್ತಿಗೆ, ತನಗಿಂತ ಎತ್ತರದ ಶರೀರ ಹೊಂದಿರುವ ಜಿರಾಫೆಯನ್ನು ನೋಡುತ್ತಿದ್ದಂತೆ ಸಿಂಹಿಣಿ ದಿಗಿಲುಗೊಂಡಿದೆ. ತಾನು ಕಚ್ಚಿ ಹಿಡಿದಿದ್ದ, ಮರಿಯನ್ನು ಬಿಟ್ಟು ಅಲ್ಲಿಂದ ಪರಾರಿಯಾಗಿದೆ. ಸದ್ಯ ವಿಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟೆ ವೈರಲ್ ಆಗಿದೆ. ನೆಟ್ಟಿಗರು ವಿಧವಿಧದ ಕಮೆಂಟ್ ಹಾಕುತ್ತಿದ್ದಾರೆ. ಜಿರಾಫೆಗೆ ಹೆಣ್ಣು ಸಿಂಹ ಹೆದರಿದ್ದನ್ನು ನೋಡಿ ಅಚ್ಚರಿಯನ್ನೂ ವ್ಯಕ್ತಪಡಿಸಿದ್ದಾರೆ.