ಸೋಷಿಯಲ್ ಮೀಡಿಯಾಗಳಲ್ಲಿ ವೈರಲ್ ಆಗುವ ಕೆಲವು ವಿಡಿಯೋಗಳು ಮನಸಿಗೆ ಹಿತ ಕೊಡುತ್ತವೆ. ಅದರಲ್ಲೂ ಪ್ರಾಣಿಗಳಿಗೆ ಸಂಬಂಧಪಟ್ಟ ವಿಡಿಯೋಗಳೆಲ್ಲ ಮತ್ತೆಮತ್ತೆ ನೋಡಬೇಕು ಎನ್ನಿಸುತ್ತವೆ. ಹಾಗೇ, ಈಗ ಹುಲಿಯ ವಿಡಿಯೋವೊಂದು ಭರ್ಜರಿ ವೈರಲ್ ಆಗುತ್ತಿದ್ದು, ಅದನ್ನು ನೋಡಿದರೆ ಎಷ್ಟು ಕ್ಯೂಟ್ ಅಲ್ಲವಾ? ಎನ್ನಿಸಿಬಿಡುತ್ತದೆ. ಹುಲಿ ಕಾಡುಪ್ರಾಣಿ. ಅದು ಸಾಕು ಪ್ರಾಣಿಗಳಂತೆ ಮನುಷ್ಯರ ಸಮೀಪ ಬರಲಾರದು. ಆತ್ಮೀಯತೆ ತೋರಲಾರದು. ಅಷ್ಟಕ್ಕೂ ಹುಲಿಯನ್ನು ಯಾರು ಅಷ್ಟು ಧೈರ್ಯದಿಂದ ಕರೆಯುತ್ತಾರೆ? ಹೇಳಿ !
ಆದರೆ ಇದೀಗ The Amazing Tigers ಎಂಬ ಇನ್ಸ್ಟಾಗ್ರಾಂನಲ್ಲಿ ಶೇರ್ ಆದ ಈ ವಿಡಿಯೋವನ್ನು ನೋಡಿದರೆ, ಹುಲಿಯೂ ಎಷ್ಟು ಕ್ಯೂಟ್ ಎನ್ನಿಸುತ್ತದೆ. ವಿಡಿಯೋ ಬರೋಬ್ಬರಿ 1.8 ಮಿಲಿಯನ್ ವೀವ್ಸ್ ಕಂಡಿದೆ. 33 ಸಾವಿರ ಲೈಕ್ಸ್ ಪಡೆದಿದೆ. ‘ಅದೊಂದು ವನ್ಯಜೀವಿ ಸಂರಕ್ಷಿತ ತಾಣ. ಅಲ್ಲಿನ ರಸ್ತೆಯಲ್ಲಿ ಸಫಾರಿ ವಾಹನವೊಂದು ಹೋಗುತ್ತಿದೆ. ರಸ್ತೆ ಬದಿಯಲ್ಲಿ ಹುಲಿಯೊಂದನ್ನು ನೋಡಿದ ಚಾಲಕ ಬಸ್ ನಿಲ್ಲಿಸುತ್ತಾನೆ. ಬಸ್ನ ಕಿಟಕಿಯ ಬಾಗಿಲು ತೆಗೆದು, ಮಾಂಸದ ಲಾಲಿಪಾಪ್ನಂತ ತಿಂಡಿಯನ್ನು ತೋರಿಸುತ್ತಾನೆ. ಹುಲಿ ಬಂದು, ವಾಹನಕ್ಕೆ ತನ್ನ ಮುಂದಿನ ಎರಡು ಕಾಲುಗಳನ್ನು ಕೊಟ್ಟು ನಿಂತು, ಚಾಲಕನ ಕೈಯಿಂದ ಮಾಂಸದ ತುಂಡಿಗೆ ಬಾಯಿ ಹಾಕಿ ತಿನ್ನುತ್ತದೆ. ಅಷ್ಟಾದ ಬಳಿಕ, ತನ್ನ ಮುಂದಿನ, ಬಲಭಾಗದ ಕಾಲಿನಿಂದ ಬಾಯಿಯನ್ನು ಒರೆಸಿಕೊಳ್ಳುತ್ತದೆ ’. ಈ ವಿಡಿಯೋವನ್ನೀಗ ನೆಟ್ಟಿಗರು ಸಿಕ್ಕಾಪಟೆ ಮೆಚ್ಚಿಕೊಂಡಿದ್ದಾರೆ.
ಹುಲಿ ಹೇಳಿಕೇಳಿ ಆಕ್ರಮಣಕಾರಿ ಪ್ರಾಣಿ. ಅದು ಚಾಲಕ ಕೊಟ್ಟ ಮಾಂಸದ ತುಂಡು ಸಾಕಾಗದೆ, ಇನ್ನಷ್ಟು ಬೇಕು ಎಂದುಕೊಂಡಿದ್ದರೆ ಆ ಚಾಲಕನ ಮೇಲೇ ದಾಳಿ ಮಾಡಬಹುದಿತ್ತು. ಆದರೆ ಅದು ಹಾಗೇನೂ ಮಾಡದೆ, ಶಾಂತವಾಗಿ ವಾಪಸ್ ಕಾಡಿಗೆ ಹೋಗಿದೆ. ಇತ್ತ ಚಾಲಕ ವಾಹನದ ಕಿಟಕಿಯನ್ನು ಹಾಕಿಕೊಂಡಿದ್ದಾನೆ. ‘ಹುಲಿಯ ವರ್ತನೆ ಬಗ್ಗೆ ಅಚ್ಚರಿಯಾಗುತ್ತಿದೆ’ ಎಂದು ಒಬ್ಬರು ಹೇಳಿದ್ದರೆ, ‘ನಿಜಕ್ಕೂ ಹುಲಿಯ ಸ್ವಭಾವ ಇದಲ್ಲ, ನಿಮ್ಮ ಅದೃಷ್ಟ ಚೆನ್ನಾಗಿತ್ತು’ ಎಂದು ಮತ್ತೊಬ್ಬರು ಕಮೆಂಟ್ ಮಾಡಿದ್ದಾರೆ. ಒಟ್ಟಿನಲ್ಲಿ ಈ ವಿಡಿಯೋ ನೋಡೋಕೆ ಸಖತ್ ಖುಷಿಕೊಡೋದಂತೂ ಸತ್ಯ.
ಇದನ್ನೂ ಓದಿ: Viral Video | ನೇರ ಪ್ರಸಾರದ ಚರ್ಚೆಯಲ್ಲಿ ಆವೇಶದಿಂದ ಉಗುಳಿದ ಮಾಜಿ ಸಚಿವ