ಮುಂಬಯಿ: ತಾವು ಜನರ ಗಮನ ಸೆಳೆಯಬೇಕು, ಸೋಷಿಯಲ್ ಮೀಡಿಯಾದಲ್ಲಿ ಟ್ರೆಂಡ್ ಆಗಬೇಕು ಎಂಬ ಕಾರಣಕ್ಕೆ ಅನೇಕರು ವಿವಿಧ ಮಾರ್ಗವನ್ನು ಅನುಸರಿಸುತ್ತಾರೆ. ಅದರಲ್ಲಿ ಈ ಬೈಕ್ ಸ್ಟಂಟ್ (Bike Stunt) ಮಾಡುವವರದ್ದೂ ಒಂದು ವರ್ಗ. ವಾಹನ ಸಂಚಾರ ಜಾಸ್ತಿ ಇರುವ ರಸ್ತೆಗಳಲ್ಲೂ ಬೈಕ್ ವೀಲ್ಹಿಂಗ್, ಅಪಾಯಕಾರಿ ಸಾಹಸಗಳನ್ನು ಮಾಡುವ ಮೂಲಕ ಹುಚ್ಚಾಟ ಆಡುತ್ತಾರೆ. ವೃತ್ತಿಪರರು ಅಲ್ಲದವರು, ಹೀಗೆ ಬ್ಯೂಸಿ ರೋಡ್ನಲ್ಲಿ ಬೈಕ್ ಸ್ಟಂಟ್ ಮಾಡುವುದು ಅಪರಾಧವಾಗಿದ್ದರೂ ಒಂದಷ್ಟು ಯುವಕರು ಡೋಂಟ್ ಕೇರ್ ಮನಸ್ಥಿತಿಯಲ್ಲಿ ಇರುತ್ತಾರೆ. ಹೀಗೆ ಬೈಕ್ ಸಾಹಸದ ಹತ್ತು ಹಲವು ವಿಡಿಯೊಗಳನ್ನು ನಾವು ಈಗಾಗಲೇ ನೋಡಿದ್ದೇವೆ.
ಮುಂಬಯಿಯ ಈ ಯುವಕ ಇನ್ನೂ ಅತಿರೇಕ ಅನ್ನಿಸುವಂಥ ಸಾಹಸ ಮಾಡಿದ್ದಾನೆ. ಇಬ್ಬರು ಯುವತಿಯರನ್ನು ಬೈಕ್ ಮೇಲೆ ಕೂರಿಸಿಕೊಂಡು, ವ್ಹೀಲಿಂಗ್ ಮಾಡಿದ್ದಾನೆ. ಅದರಲ್ಲೂ ಆ ಯುವತಿಯರು ಸರಿಯಾಗಿ ಕುಳಿತಿಲ್ಲ. ಹುಡುಗ ಬೈಕ್ನ ಮಧ್ಯೆ ಕುಳಿತಿದ್ದರೆ, ಒಬ್ಬಳು ಯುವತಿ ಆತನ ಮುಂಭಾಗದಲ್ಲಿ, ಎದೆಗೆ ಆತುಕೊಂಡು ಕುಳಿತಿದ್ದಾಳೆ. ಇನ್ನೊಬ್ಬಳು ಹಿಂಭಾಗದಲ್ಲಿ ಬೆನ್ನಿಗೆ ಆತು ಕುಳಿತಿದ್ದಾಳೆ. ಈ ಯುವಕ ಬೈಕ್ನ ಮುಂದಿನ ಚಕ್ರವನ್ನು ಮೇಲಕ್ಕೆತ್ತಿ ರೈಡ್ ಮಾಡಿದ್ದಾನೆ. ಮೂವರೂ ಹೆಲ್ಮೆಟ್ ಧರಿಸಿಲ್ಲ. ಅದೂ ಕೂಡ ನಗರದ ಮಧ್ಯದಲ್ಲಿರುವ ರಸ್ತೆಯಂತೆ ಕಾಣುತ್ತಿದೆ. ಹುಡುಗಿಯರಂತೂ ಫುಲ್ ಎಂಜಾಯ್ ಮಾಡುತ್ತ ಕುಳಿತಿದ್ದನ್ನು ವಿಡಿಯೊದಲ್ಲಿ ನೋಡಬಹುದು. ವಿಡಿಯೊ ವೈರಲ್ ಆಗುತ್ತಿದ್ದಂತೆ ಪೊಲೀಸರು ಮೂವರ ವಿರುದ್ಧವೂ ಕೇಸ್ ದಾಖಲಿಸಿದ್ದಾರೆ.
@PotholeWarriors Foundation ಎಂಬ ಟ್ವಿಟರ್ ಅಕೌಂಟ್ನಲ್ಲಿ ಮೊದಲು ಈ ವಿಡಿಯೊ ಶೇರ್ ಮಾಡಿಕೊಂಡು, ‘ಇದು ನಿಜಕ್ಕೂ ಅಪಾಯಕಾರಿ ಸಾಹಸ’ ಎಂದು ಕ್ಯಾಪ್ಷನ್ ಬರೆಯಲಾಗಿತ್ತು. ಹಾಗೇ, ಬೈಕ್ ನಂಬರ್ (Mh01DH5987)ನ್ನೂ ಕೊಟ್ಟು, ಈತನನ್ನು ಹಿಡಿಯಿರಿ ಎಂದು ಹೇಳಿ ‘ಮುಂಬಯಿ ಟ್ರಾಫಿಕ್ ಪೊಲೀಸ್’ ಟ್ಟಿಟರ್ ಅಕೌಂಟ್ನ್ನು ಟ್ಯಾಗ್ ಮಾಡಲಾಗಿತ್ತು. ಬಳಿಕ ವಿಡಿಯೊವನ್ನು ಮುಂಬಯಿ ಸಂಚಾರಿ ಪೊಲೀಸರು ರೀಶೇರ್ ಮಾಡಿಕೊಂಡಿದ್ದಾರೆ. ‘ಈ ಮೂವರ ವಿರುದ್ಧವೂ ಬಿಕೆಎಸ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಮೂವರನ್ನು ಪತ್ತೆ ಹಚ್ಚುವ ಸಂಬಂಧ ತನಿಖೆ ನಡೆಯುತ್ತಿದೆ. ಯಾರಿಗಾದರೂ ಈ ಮೂವರ ಬಗ್ಗೆ ಮಾಹಿತಿ ಇದ್ದಲ್ಲಿ, ನಮಗೆ ತಿಳಿಸಿ’ ಎಂದು ಹೇಳಿದ್ದಾರೆ. ‘ಈ ಮೂವರಿಗೆ ಬರೀ ದಂಡ ವಿಧಿಸಿ ಬಿಡುವುದಿಲ್ಲ. ಇವರು ಕಾನೂನು ಕ್ರಮ ಎದುರಿಸಬೇಕಾಗುತ್ತದೆ’ ಎಂದಿದ್ದಾರೆ.
ಜನವರಿಯಲ್ಲಿ ಲಖನೌದಿಂದ ಇಂಥದ್ದೇ ಒಂದು ವಿಡಿಯೊ ವೈರಲ್ ಆಗಿತ್ತು. ಅಲ್ಲಿನ ಹಜ್ರತ್ಗಂಜ್ ಏರಿಯಾದಲ್ಲಿ ಜೋಡಿಯೊಂದು ಚಲಿಸುವ ಸ್ಕೂಟಿ ಮೇಲೆ ರೊಮ್ಯಾನ್ಸ್ ಮಾಡಿತ್ತು. ಆ ಹುಡುಗಿ ಅಪ್ರಾಪ್ತೆ ಆಗಿದ್ದಳು. ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೊ ವೈರಲ್ ಆದ ಬೆನ್ನಲ್ಲೇ ಪೊಲೀಸರು ಕ್ರಮ ಕೈಗೊಂಡಿದ್ದರು. ಬೈಕ್ ಅಸಂಬದ್ಧ ಚಾಲನೆ ಮತ್ತು ಸಾರ್ವಜನಿಕರಿಗೆ ತೊಂದರೆ ಕೊಟ್ಟ ಆರೋಪದಡಿ ಹುಡುಗನನ್ನು ಅರೆಸ್ಟ್ ಮಾಡಿ, ಹುಡುಗಿಗೆ ಎಚ್ಚರಿಕೆ ಕೊಟ್ಟು ಕಳಿಸಲಾಗಿತ್ತು.