ಮನುಷ್ಯ ತಾನೇ ಬುದ್ಧಿವಂತ ಎಂದು ಅಂದುಕೊಂಡರೆ, ಇಲ್ಲೊಂದು ಕುದುರೆ ಮನುಷ್ಯ ಮಾಡಿಸುವ ಕೆಲಸದಿಂದ ತಪ್ಪಿಸಿಕೊಳ್ಳಲು ನಿದ್ರೆ ಬಂದಂತೆ ನಟಿಸಲೂ ಕಲಿತಿದೆ! ಆ ಮೂಲಕ ನೀವು ಚಾಪೆ ಕೆಳಗೆ ನುಸುಳಿದರೆ, ನನಗೆ ರಂಗೋಲಿ ಕೆಳಗೆ ನುಸುಳುವುದು ಗೊತ್ತು ಎಂಬ ಗಾದೆಯನ್ನು ಮನುಷ್ಯನಿಗೆ ಪರೋಕ್ಷವಾಗಿ ದಾಟಿಸಿದೆ.
ಹೌದು. ಇದ್ಯಾವುದೋ ಪಂಚತಂತ್ರದ ಕಥೆ ಎಂದು ಭಾವಿಸಬೇಡಿ. ಶುಗರ್‌ ಎಂಬ ಹೆಸರಿನ ಕುದುರೆಯೊಂದು ನಿದ್ರಿಸಿದಂತೆ ನಟಿಸುವ ಚಿತ್ರವೊಂದು ಸಾಮಾಜಿಕ ಜಾಲತಾಣದಲ್ಲಿ, ಗಂಟೆಗಳಲ್ಲಿ ವೈರಲ್‌ ಆಗಿದೆ. ಜಿಮ್‌ ರೋಲ್‌ ಎಂಬಾತ ತನ್ನ ಶುಗರ್‌ ಎಂಬ ಹೆಸರಿನ ಈ ಕುದುರೆಯನ್ನು ಸಾಕಿದ್ದು, ಈ ಕುದುರೆ, ಕೆಲಸ ಮಾಡಲು ಮೈಗಳ್ಳತನ ತೋರುವಾಗಲೆಲ್ಲ ಹೀಗೆ ನಿದ್ರೆ ಬಂದಂತೆ ನಟಿಸುತ್ತಾಳೆ ಎಂದು ಎಂದು ತನ್ನ ಟ್ವಿಟರ್‌ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.
ಈ ಕುದುರೆ ಎಷ್ಟು ಜಾಣೆ ಎಂದರೆ, ತನಗೆ ಕೆಲಸ ಮಾಡಲು ಇಷ್ಟವಿಲ್ಲದಿದ್ದರೆ, ಹೀಗೆ ಕಣ್ಣು ಮುಚ್ಚಿ ಅಂಗಾತ ಮಲಗಿಕೊಳ್ಳುತ್ತಾಳೆ. ಈಕೆ ಕಣ್ಣು ಬಿಟ್ಟಾಳೆಂದು ಈಕೆಯ ಬೆನ್ನ ಮೇಲೇರಿ ಸವಾರಿ ಮಾಡಲು ಬಯಸಿದವರು ಕಾದು ಕಾದು ಸೋತು ಸುಣ್ಣವಾಗಿ ಕೊನೆಗೆ ಅಲ್ಲಿಂದ ಪಲಾಯನ ಮಾಡಿದ ಮೇಲಷ್ಟೇ ಈಕೆ ಕಣ್ಣು ಬಿಟ್ಟು ಬಿಟ್ಟು ಏಳುತ್ತಾಳಂತೆ. ಅಷ್ಟರವರೆಗೆ ಯಾರು ಎಷ್ಟೇ ಪ್ರಯತ್ನಿಸಿದರೂ, ಜಪ್ಪಯ್ಯ ಎಂದರೂ ಅಲ್ಲಿಂದ ಕದಲುವುದಿಲ್ಲವಂತೆ.
ಇದನ್ನೂ ಓದಿ: ಸೈಕಲ್‌ ಓಡಿಸುತ್ತಿದ್ದ ಗೋರಿಲ್ಲಾ ಕೆಳಗೆ ಬಿದ್ದ ಬಳಿಕ ಮಾಡಿದ್ದೇನು?-ನಗು ತರಿಸುವ ವಿಡಿಯೋ ವೈರಲ್‌
ಈ ಪೋಸ್ಟ್‌ಗೆ ಸಾವಿರಾರು ಪ್ರತಿಕ್ರಿಯೆಗಳು ಬಂದಿದ್ದು, ಜನರು ಈ ಕುದುರೆಯ ಈ ನಡತೆಯನ್ನು ತಮಾಷೆಯಾಗಿಯೂ, ಗಂಭೀರವಾಗಿಯೂ ಚರ್ಚೆ ಮಾಡಿದ್ದಾರೆ. ʻಶುಗರ್‌ ನನ್ನಂತೆಯೇ! ಇವಳು ನನ್ನ ಆಫೀಸಿನಲ್ಲಿ ಕೆಲಸ ಮಾಡಬೇಕಾಗಿತ್ತುʼ ಎಂದು ಹಲವರು ನಗೆಯಾಡಿದ್ದರೆ, ಇನ್ನೂ ಕೆಲವರು ʻಜಾಣ ಕುದುರೆʼ ಎಂದಿದ್ದಾರೆ. ಹಲವರು ಇದೊಂದು ʻಸ್ಪೂರ್ತಿ ತುಂಬುವ ಕುದುರೆʼ ಎಂದೂ ವ್ಯಾಖ್ಯಾನಿಸಿದ್ದಾರೆ. ಇನ್ನೂ ಕೆಲವರು, ಇದನ್ನು ಗಂಭೀರವಾಗಿ ಪರಿಗಣಿಸಿ, ಕುದುರೆಗಳು ನಿಜವಾಗಿಯೂ ಭಯಂಕರ ಸುಸ್ತಾಗದ ಹೊರತು, ಸಾಮಾನ್ಯವಾಗಿ ಹೀಗೆ ಮಲಗಿಕೊಂಡಿರಲು ಬಯಸುವುದಿಲ್ಲ ಎಂದಿದ್ದಾರೆ.
ಇದನ್ನೂ ಓದಿ: ಫ್ರೀಜರ್‌ನಲ್ಲಿ ಮಲಗಿದ ಮುದ್ದುಮುಖದ ಆಲೂಗಡ್ಡೆಗೆ ಐದು ವರ್ಷ! ಇನ್ನೂ ಮುಗಿದಿಲ್ಲ ಅದರ ಬದುಕು!