ಕೆಲವು ನಾಯಿಗಳಿಗೆ ಮನೆ ಹೊರಗೆ ಇಟ್ಟ ಚಪ್ಪಲಿಗಳನ್ನು ಎತ್ತಿಕೊಂಡು ಹೋಗುವ ಚಾಳಿ ಇರುತ್ತದೆ. ಅವು ಆ ಚಪ್ಪಲಿಗಳನ್ನು ಬಾಯಲ್ಲಿ ಕಚ್ಚಿ ಹರಿದು, ಬಳಿಕ ಎಲ್ಲೆಲ್ಲೋ ಬಿಸಾಕಿ ಹೋಗುತ್ತವೆ. ಆದರೆ ಹಾವುಗಳು ಚಪ್ಪಲಿಯನ್ನು ಬಾಯಲ್ಲಿ ಕಚ್ಚಿಕೊಂಡು ಹೋಗುವುದನ್ನು ಎಂದಾದರೂ ನೋಡಿದ್ದೀರಾ? ಅಷ್ಟಕ್ಕೂ ಹಾವುಗಳಿಗೆ ಯಾಕಾದರೂ ಬೇಕು ಈ ಚಪ್ಪಲಿ?
ಭಾರತೀಯ ಅರಣ್ಯ ಸೇವಾಧಿಕಾರಿ (IFS) ಪ್ರವೀಣ್ ಕಾಸ್ವಾನ್ ಅವರೊಂದು ವಿಡಿಯೊ ಶೇರ್ ಮಾಡಿದ್ದಾರೆ. ಆ ವಿಡಿಯೊದಲ್ಲಿ ಮಾರುದ್ದ ಹಾವೊಂದು ಮನೆಯೊಂದರ ಬಳಿ ಬಂದು, ಅಲ್ಲಿಯೇ ಇದ್ದ ಒಂದು ಜೊತೆ ಚಪ್ಪಲಿಗಳಲ್ಲಿ ಒಂದು ಚಪ್ಪಲಿಯನ್ನು ಬಾಯಲ್ಲಿ ಕಚ್ಚಿಕೊಂಡು ಸರಸರನೇ ಪೊದೆಯೊಳಗೆ ಹರಿದು ಹೋಗುವ ದೃಶ್ಯವನ್ನು ನೋಡಬಹುದು. ಹಾವನ್ನು ನೋಡಿ ಒಂದಷ್ಟು ಜನ ಕೂಗುವುದು ವಿಡಿಯೊದಲ್ಲಿ ಕೇಳಿಸುತ್ತದೆ. ಅದ್ಯಾಕೆ ಆ ಗುಲಾಬಿ ಬಣ್ಣದ ಚಪ್ಪಲಿ ಎತ್ತಿಕೊಂಡಿತು ಹೋಯಿತೋ ಗೊತ್ತಿಲ್ಲ. ಆದರೆ ಹಾವು ಚಪ್ಪಲಿ ತೆಗೆದುಕೊಂಡು ಹೋಗುವುದನ್ನು ನೋಡಿದರೆ ನಗು ಬಾರದೆ ಇರದು. ಈ ವಿಡಿಯೊ ಒಂದು ಲಕ್ಷಕ್ಕೂ ಅಧಿಕ ವೀಕ್ಷಣೆ ಕಂಡಿದೆ.
ಇದು ಬಿಹಾರದ ಆರಾರ್ ಎಂಬಲ್ಲಿ ನಡೆದ ಘಟನೆ ಎಂದು ಕೆಲವರು ಕಮೆಂಟ್ ಹಾಕಿದ್ದಾರೆ. ಅದರಾಚೆ ನೆಟ್ಟಿಗರಂತೂ ಫನ್ನಿಯಾದ ಕಮೆಂಟ್ಗಳನ್ನು ಬರೆದಿದ್ದಾರೆ. ‘ಚಪ್ಪಲಿ ಕಳ್ಳ’ ‘ಕಾಲಿಲ್ಲದ ಹಾವಿಗೇಕೆ ಚಪ್ಪಲಿ’ ಎಂದು ಒಂದಷ್ಟು ಜನ ಹೇಳಿದ್ದರೆ, ‘ಬಹುಶಃ ತನ್ನ ಮರಿಗಾಗಿ ತೆಗೆದುಕೊಂಡು ಹೋಗುತ್ತಿರಬೇಕು, ಈ ಹಾವು ಅಮ್ಮನಾಗಿರಬೇಕು’ ಎಂದೆಲ್ಲ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: Matrimonial Ad | ವರ ಬೇಕಾಗಿದ್ದಾನೆ, ಆದರೆ ಎಂಜಿನಿಯರ್‌ ಬೇಡ, ಸಾಫ್ಟ್‌ವೇರ್‌ಗಳಿಗೆ ಇದು ಹಾರ್ಡ್‌ ನ್ಯೂಸ್‌!