ಬೆಕ್ಕುಗಳಿಗೆ ಮುದ್ದು, ಸೊಕ್ಕು-ತುಂಟಾಟ ಎಲ್ಲವೂ ಜಾಸ್ತಿ. ಮಡಿಲಲ್ಲಿ ಬಂದು ಬೆಚ್ಚಗೆ ಮಲಗುತ್ತವೆ. ನಮ್ಮ ಹಿಂದೆ-ಮುಂದೆ ಸುತ್ತುತ್ತ, ಆಟವಾಡುತ್ತಿರುತ್ತವೆ. ಸರಿಯಾದ ಟೈಮಿಗೆ ತಿಂಡಿ ಕೊಡದೆ ಇದ್ದರೆ ಮಿಯಾಂವ್ ಎಂದು ಕೂಗುತ್ತ ಬೆನ್ನುಬೀಳುತ್ತವೆ. ನಮ್ಮ ಮಾತುಗಳನ್ನು ಕೇಳಿ ಅರ್ಥ ಮಾಡಿಕೊಳ್ಳುತ್ತವೆ. ಎಲ್ಲಕ್ಕಿಂತ ಹೆಚ್ಚಾಗಿ ಬೆಕ್ಕುಗಳಿಗೆ ಕುತೂಹಲ ಜಾಸ್ತಿ. ಒಂದು ಕಿಂಡಿ ಕಂಡರೆ ಅದರಲ್ಲಿ ಮೂತಿ ತೂರಿಸುತ್ತದೆ, ಒಂದು ಬಾಲ್ ಸಿಕ್ಕರೆ, ಸುಮ್ಮನೆ ಅದನ್ನು ಕಾಲಿನಿಂದ ಒದ್ದು ನೋಡುತ್ತವೆ..ಹೀಗೆ ಮನೆಯಲ್ಲಿ ಬೆಕ್ಕುಗಳಿದ್ದರೆ ಅವುಗಳ ಆಟ-ಹಾವ-ಭಾವ-ವಿನೋದ-ನಮಗೆ ಸ್ಪಂದಿಸುವ ರೀತಿಯನ್ನು ನೋಡುವುದೇ ಒಂದು ಆನಂದ.
ಇಲ್ನೋಡಿ, ಇಲ್ಲೊಂದು ಬೆಕ್ಕು ಎಲ್ಲವನ್ನೂ ಬಿಟ್ಟು ತುಂಬ ಸೀರಿಯಸ್ ಆಗಿ ಎಲೆಕ್ಟ್ರಿಷಿಯನ್ (ವಿದ್ಯುತ್ ಕೆಲಸಗಾರ) ಕೆಲಸ ಮಾಡುತ್ತಿದೆ. Madeyousmile ಎಂಬ ಟ್ವಿಟರ್ ಅಕೌಂಟ್ನಲ್ಲಿ ವಿಡಿಯೊ ಶೇರ್ ಮಾಡಲಾಗಿದೆ. ಅದರಲ್ಲಿ ಎಲೆಕ್ಟ್ರಿಷಿಯನ್ವೊಬ್ಬ ಮನೆಯ ಸೀಲಿಂಗ್ಗೆ ಅದೇನೋ ವೈರ್ ಫಿಕ್ಸ್ ಮಾಡುತ್ತಿದ್ದರೆ, ಅವನ ಮುದ್ದಿನ ಬೆಕ್ಕು ಕೂಡ ತಾನೂ ಸಹಾಯಕ್ಕೆ ಮುಂದಾಗಿದೆ. ಮೊದಲು ಮುಂದಿನ ಎರಡು ಕಾಲನ್ನು ಮೇಲೆತ್ತಿ ಸೀಲಿಂಗ್ನ್ನು ನೋಡುತ್ತದೆ. ಬಳಿಕ ಮುಂದೆ ಬಾಗಿ, ಆ ವೈರ್ನ್ನು ತನ್ನ ಮುಂದಿನ ಕಾಲಲ್ಲಿ ನಾಜೂಕಾಗಿ ಮುಟ್ಟಿ, ಪರಿಶೀಲನೆ ಮಾಡುತ್ತದೆ. ಅದೆಷ್ಟು ಸೀರಿಯಸ್ ಆಗಿ ಈ ಕೆಲಸ ಮಾಡುತ್ತದೆ ಎಂಬುದನ್ನು ವಿಡಿಯೊದಲ್ಲಿಯೇ ನೋಡಬೇಕು.
ನವೆಂಬರ್ 25ರಂದು ಶೇರ್ ಆದ ವಿಡಿಯೊಕ್ಕೆ ಇಲ್ಲಿಯವರೆಗೆ 1.3 ಮಿಲಿಯನ್ ವೀವ್ಸ್ ಬಂದಿದೆ. ಲಕ್ಷಕ್ಕೂ ಅಧಿಕ ಮಂದಿ ಲೈಕ್ಸ್ ಮಾಡಿದ್ದಾರೆ. 20 ಸಾವಿರಕ್ಕೂ ಹೆಚ್ಚು ಬಾರಿ ರೀಟ್ವೀಟ್ ಮಾಡಲಾಗಿದೆ. ನೆಟ್ಟಿಗರಂತೂ ಸಖತ್ ಫನ್ನಿಯಾಗಿ ಕಮೆಂಟ್ ಮಾಡಿದ್ದಾರೆ. ‘ಬೆಕ್ಕು ತಾನು ನಿಜಕ್ಕೂ ಎಲೆಕ್ಟ್ರಿಷಿಯನ್ ಎಂದುಕೊಂಡಂತೆ ಇದೆ. ‘ಅದೆಷ್ಟು ಸೀರಿಯಸ್ ಆಗಿ ಕೆಲಸ ಮಾಡುತ್ತಿದೆ’ ‘ಆ ಬೆಕ್ಕನ್ನು ನೋಡೋಕೆ ಎಷ್ಟು ಖುಷಿಯಾಗತ್ತೆ’ ಎಂಬಿತ್ಯಾದಿ ಕಮೆಂಟ್ಗಳನ್ನು ಬರೆದಿದ್ದಾರೆ.
ಇದನ್ನೂ ಓದಿ: Viral Video| ಡ್ರೈವರ್ ಸೀಟ್ನಲ್ಲಿ ಕುಳಿತುಕೊಳ್ಳದೆ, 18 ಚಕ್ರದ ಬೃಹತ್ ಟ್ರಕ್ನ್ನು ಪಾರ್ಕ್ ಮಾಡಿದ ಚಾಲಕ!