ಮುಂಬೈ: ಇತ್ತೀಚೆಗೆ ಸರಗಳ್ಳತನ ಹೆಚ್ಚಾಗಿದೆ. ಹೆಣ್ಣು ಮಕ್ಕಳು ಸರ ಧರಿಸಿ ಹೊರಗಡೆ ಓಡಾಡುತ್ತಿದ್ದರೆ ಬೈಕ್‌ನಲ್ಲಿ ಬರುವ ಕಳ್ಳರು ಕೆಲವೇ ಕ್ಷಣಗಳಲ್ಲಿ ಆ ಸರವನ್ನು ಕದ್ದೋಡಿರುತ್ತಾರೆ. ಇದೇ ರೀತಿ ಮಹಾರಾಷ್ಟ್ರದ ಪುಣೆಯಲ್ಲಿ ಇತ್ತೀಚೆಗೆ ಸರಗಳ್ಳತನವೊಂದು ನಡೆಯುವುದರಲ್ಲಿತ್ತು. ಆದರೆ ಬಾಲಕಿಯ ಸಮಯಪ್ರಜ್ಞೆಯಿಂದ ಅಜ್ಜಿಯ ಸರ ಉಳಿದುಕೊಂಡಿದೆ. ಈ ವಿಚಾರ ಎಲ್ಲೆಡೆ ಸುದ್ದಿಯಾಗಿದ್ದು, ವೈರಲ್ (Viral News) ಆಗಿದೆ.
ಇದನ್ನೂ ಓದಿ: Viral Video : ಸಿಂಹಿಣಿಯನ್ನು ಹೆದರಿಸಿ ಓಡಿಸಿದ ಆನೆಯ ವಿಡಿಯೊ ಭಾರೀ ವೈರಲ್
ಪುಣೆಯ ಶಿವಾಜಿನಗರ ನಿವಾಸಿಯಾಗಿರುವ ಲತಾ ಘಾಗ್‌(60) ಇತ್ತೀಚೆಗೆ ತಮ್ಮ ಮೊಮ್ಮಗಳು ರುತ್ವಿ(10)ಯೊಂದಿಗೆ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದರು. ರಾತ್ರಿ ಸುಮಾರು 8 ಗಂಟೆ ಸಮಯವಾಗಿತ್ತು. ಈ ವೇಳೆ ಅವರ ಬಳಿ ಸ್ಕೂಟರ್‌ನಲ್ಲಿ ಬರುವ ವ್ಯಕ್ತಿಯೊಬ್ಬ, ವಿಳಾಸ ಕೇಳುವ ನೆಪದಲ್ಲಿ ಅವರ ಎದುರು ಸ್ಕೂಟರ್‌ ನಿಲ್ಲಿಸುತ್ತಾನೆ. ಕೆಲವೇ ಸೆಕೆಂಡುಗಳಲ್ಲಿ ಲತಾ ಅವರ ಕೊರಳಿಗೆ ಕೈ ಹಾಕಿ, ಸರ ಕದಿಯಲು ಯತ್ನಿಸುತ್ತಾನೆ. ತಕ್ಷಣ ರುತ್ವಿ ಕೈನಲ್ಲಿದ್ದ ಬ್ಯಾಗ್‌ನಲ್ಲೇ ಆ ಸರಗಳ್ಳನ ಮುಖಕ್ಕೆ ಹೊಡೆಯಲಾರಂಭಿಸುತ್ತಾಳೆ. ಲತಾ ಕೂಡ ಮೊಮ್ಮಗಳೊಂದಿಗೆ ಸೇರಿಕೊಂಡು ಕಳ್ಳನಿಗೆ ಹೊಡೆಯುತ್ತಾಳೆ.
ಹೊಡೆತ ತಾಳಲಾರದೆ ಸರಗಳ್ಳ ಅಲ್ಲಿಂದ ಕಾಲ್ಕೀಳುತ್ತಾನೆ. ಈ ದೃಶ್ಯ ಸಿಸಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲೂ ಹರಿದಾಡಿದ್ದು, ನೆಟ್ಟಿಗರು ಬಾಲಕಿಗೆ “ಧೈರ್ಯವಂತ ಬಾಲಕಿ” ಎಂದು ಕರೆಯಲಾರಂಭಿಸಿದ್ದಾರೆ.
ಇದನ್ನೂ ಓದಿ: Viral News : 14 ಕೋಟಿ ರೂ. ಮೌಲ್ಯದ 45 ವೈನ್‌ ಬಾಟಲ್‌ ಕದ್ದಿದ್ದ ಜೋಡಿಗೆ ಜೈಲು ಶಿಕ್ಷೆ