ವಾಷಿಂಗ್ಟನ್‌: ಕರಡಿಯೊಂದು ಬೇಕರಿಗೆ ನುಗ್ಗಿ ಅಲ್ಲಿನ ಕಪ್‌ಕೇಕ್‌ಗಳನ್ನು ಹಾಳು ಮಾಡಿರುವ ವಿಚಿತ್ರ ಘಟನೆ ಅಮೆರಿಕದಲ್ಲಿ ನಡೆದಿದೆ. ಈ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ಎಲ್ಲೆಡೆ ಭಾರೀ ಸದ್ದು (Viral News) ಮಾಡುತ್ತಿದೆ.
ಟೇಸ್ಟ್‌ ಬೈ ಸ್ಪೆಲ್‌ಬೌಂಡ್‌ ಹೆಸರಿನ ಬೇಕರಿಯಲ್ಲಿ ಕೆಲಸಗಾರರು ಕಪ್‌ಕೇಕ್‌ಗಳನ್ನು ಬೇರೊಂದು ಸ್ಥಳಕ್ಕೆ ಕೊಂಡೊಯ್ಯುವುದಕ್ಕಾಗಿ ವ್ಯಾನ್‌ ಒಳಗೆ ಲೋಡ್‌ ಮಾಡುತ್ತಿದ್ದರು. ಇನ್ನೇನು ಎಲ್ಲ ಕಪ್‌ಕೇಕ್‌ಗಳನ್ನು ಲೋಡ್‌ ಮಾಡಿದ್ದಾಯಿತು ಎನ್ನುವಷ್ಟರಲ್ಲಿ ಕರಡಿಯೊಂದು ಅಲ್ಲಿಗೆ ನುಗ್ಗಿದೆ. ಕರಡಿಯನ್ನು ನೋಡುತ್ತಿದ್ದಂತೆಯೇ ಸಿಬ್ಬಂದಿ ಬೇಕರಿಯತ್ತ ಓಡಿದ್ದು, ಬಾಗಿಲನ್ನು ಹಾಕಿದ್ದಾರೆ. ಅಲ್ಲೇ ಸಾಕಷ್ಟು ಸಮಯ ಕುಳಿತು ಕಾದಿದ್ದಾರೆ.
ಇದನ್ನೂ ಓದಿ: Viral Video: ಶಾಲಾ ಮಕ್ಕಳ ಎದುರೇ ಹೊಡೆದಾಡಿಕೊಂಡ ಪ್ರಿನ್ಸಿಪಾಲ್, ಟೀಚರ್! ಇಲ್ಲಿದೆ ನೋಡಿ ವಿಡಿಯೋ
ಕೆಲ ಕಾಲ ಅಲ್ಲಿಯೇ ಇದ್ದ ಕರಡಿ ಅಲ್ಲಿದ್ದ ಕೆಲವು ಕಪ್‌ ಕೇಕ್‌ ಬಾಕ್ಸ್‌ಗಳನ್ನು ಹಾಳುಗೆಡವಿದೆ. ನಂತರ ಅಲ್ಲಿಂದ ವಾಪಸು ಹೊರಟುಹೋಗಿದೆ. ಈ ವಿಚಾರವಾಗಿ ಟೇಸ್ಟ್‌ ಬೈ ಸ್ಪೆಲ್‌ಬೌಂಡ್‌ ಬೇಕರಿಯು ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ. ಹಾಗೆಯೇ ಕರಡಿ ಹಾಳುಗೆಡವಿದ ಕೆಲವು ಕಪ್‌ಕೇಕ್‌ಗಳ ಫೋಟೋಗಳನ್ನೂ ಸಹ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ.
ಬೇಕರಿಯ ಈ ಪೋಸ್ಟ್‌ ಸಾಮಾಜಿಕ ಜಾಲತಾಣಗಳಲ್ಲಿ ಸದ್ದು ಮಾಡುತ್ತಿದೆ. ಕಾಡು ಪ್ರಾಣಿಗಳು ಈ ರೀತಿಯಲ್ಲಿ ನಗರದೊಳಗೆ ನುಗ್ಗಿ ತೊಂದರೆ ಕೊಡುತ್ತಿರುವ ಬಗ್ಗೆ ನೆಟ್ಟಿಗರು ಚರ್ಚೆ ಆರಂಭಿಸಿದ್ದಾರೆ. ಹಾಗೆಯೇ ಬೇಕರಿಯವರ ಬಗ್ಗೆ ಬೇಸರವನ್ನೂ ವ್ಯಕ್ತಪಡಿಸಲಾರಂಭಿಸಿದ್ದಾರೆ. ಒಂದು ದಿನದ ಹಿಂದೆ ಹಾಕಲ್ಪಟ್ಟ ಈ ಪೋಸ್ಟ್‌ ಈಗಾಗಲೇ ಸಾವಿರಕ್ಕೂ ಅಧಿಕ ಮಂದಿಯಿಂದ ಲೈಕ್‌ ಪಡೆದುಕೊಂಡಿದೆ. ನೂರಾರು ಮಂದಿ ಪೋಸ್ಟ್‌ಗೆ ಕಾಮೆಂಟ್‌ಗಳನ್ನು ಹಾಕಿದ್ದಾರೆ.