ಬೆಂಗಳೂರು: ಪೊಲೀಸರೆಂದರೆ ಸದೃಢ ದೇಹ, ಶಿಸ್ತು ಎಲ್ಲವೂ ನೆನಪಾಗುತ್ತದೆ. ಆದರೆ ಈ ವಿಡಿಯೊ ನೋಡಿದರೆ ಪೊಲೀಸರೆಷ್ಟು ಕ್ಯೂಟ್‌ ಎನಿಸುತ್ತದೆ. ಏಕೆಂದರೆ ಇಲ್ಲಿ ಪೊಲೀಸರಿಗೆ ಬಾಸ್‌ ಆಗಿರುವುದು ಕೇವಲ ಐದೇ ವರ್ಷದ ಪುಟಾಣಿ. ಈ ಪುಟಾಣಿಯ ಮುಂದಾಳತ್ವದಲ್ಲಿ ಪೊಲೀಸರ ಗುಂಪೊಂದು ಮೋಟಾರು ಬೈಕ್‌ನಲ್ಲಿ ಗಸ್ತು ತಿರುಗುವ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ (Viral Video) ಆಗಿದೆ.
ಇದನ್ನೂ ಓದಿ: Viral News | ನೆಟ್ಟಿಗರಿಗೆ ಸವಾಲೆಸೆದ ಹರ್ಷ್‌ ಗೋಯೆಂಕಾ; ನೀವು ಈ ಸವಾಲಲ್ಲಿ ಗೆಲ್ಲಬಲ್ಲಿರಾ?
ಇಂಗ್ಲೆಂಡ್‌ನ ದುರ್ಹಮ್‌ನ ನಿವಾಸಿಯಾಗಿರುವ ಹ್ಯಾರಿ(5)ಯ ತಂದೆ ಕಳೆದ ವರ್ಷ ಸಾವನ್ನಪ್ಪಿದ್ದಾರೆ. ಅಪ್ಪನ ಅಗಲಿಕೆಯಿಂದಾಗಿ ನೋವಿನಲ್ಲಿದ್ದ ಹ್ಯಾರಿಯ ಮುಖದಲ್ಲಿ ನಗು ವಾಪಸು ತರಿಸುವುದಕ್ಕೆಂದು ಆತನ ತಾಯಿ ಕ್ರಿಸ್ಮಸ್‌ಗೆ ಆತನಿಗೆ ವಿಶೇಷವಾದ ಉಡುಗೊರೆಯೊಂದನ್ನು ಕೊಟ್ಟಿದ್ದಾರೆ. ನೋಡುವುದಕ್ಕೆ ಪೊಲೀಸ್‌ ಬೈಕಿನಂತೆಯೇ ಕಾಣುವ ಪುಟಾಣಿ ಎಲೆಕ್ಟ್ರಿಕ್‌ ಬೈಕ್‌ನ್ನು ಮಗನಿಗೆ ಕೊಡಿಸಿದ್ದಾರೆ. ಈ ಬೈಕ್‌ ನೋಡಿದಾಗಿನಿಂದ ಹ್ಯಾರಿ ಮುಖದಲ್ಲಿ ಸಂತಸ ವಾಪಸಾಗಿದೆ.
ಇದನ್ನೂ ಓದಿ: Viral Video: ದ್ರೌಪದಿ ಅಮ್ಮನ ಉತ್ಸವದಲ್ಲಿ ಭಕ್ತರ ಮೇಲೆ ಕ್ರೇನ್ ಬಿದ್ದು ನಾಲ್ವರ ಸಾವು; ತಮಿಳುನಾಡು ದೇಗುಲದಲ್ಲಿ ದುರಂತ
ಈ ರೀತಿ ಹ್ಯಾರಿಗೆ ಅವರ ತಾಯಿ ಪೊಲೀಸ್‌ ಬೈಕಿನ ರೀತಿಯದ್ದೇ ಪುಟಾಣಿ ಬೈಕ್‌ ಕೊಡಿಸಿರುವ ವಿಚಾರ ದುರ್ಹಮ್‌ನ ಪೊಲೀಸ್‌ ಇಲಾಖೆ ಕಿವಿಗೆ ಬಿದ್ದಿದೆ. ಹ್ಯಾರಿಯ ಸಂತೋಷವನ್ನು ಇಮ್ಮಡಿ ಮಾಡುವುದಕ್ಕೆ ನಿರ್ಧರಿಸಿದ ಪೊಲೀಸ್‌ ಇಲಾಖೆ ಮತ್ತೊಂದು ಪ್ಲ್ಯಾನ್‌ ಮಾಡಿದೆ. ಹ್ಯಾರಿ ಮನೆ ಬಳಿ ನಾಲ್ವರು ಪೊಲೀಸ್‌ ಅಧಿಕಾರಿಗಳು ತಮ್ಮ ಎಲೆಕ್ಟ್ರಿಕ್‌ ಬೈಕ್‌ಗಳೊಂದಿಗೆ ಬಂದಿದ್ದು, ಹ್ಯಾರಿಯೊಂದಿಗೆ ಗಸ್ತು ತಿರುಗುವುದಕ್ಕೆ ಹೊರಟಿದ್ದಾರೆ. ಹ್ಯಾರಿ ಕೂಡ ಪೊಲೀಸರಂತೆಯೇ ಸಮವಸ್ತ್ರ ಧರಿಸಿ, ನಾಲ್ವರು ಅಧಿಕಾರಿಗಳಿಗೆ ನಾಯಕನಂತೆ ತಾನೇ ಮುಂದೆ ಬೈಕ್‌ ಓಡಿಸಿದ್ದಾನೆ. ಹ್ಯಾರಿ ನಾಲ್ಕು ಚಕ್ರದ ಬೈಕಿನಲ್ಲಿ ಪೊಲೀಸ್‌ ಆಗಿ ತಿರುಗಿದ ವಿಡಿಯೊವನ್ನು ಗುಡ್‌ ನ್ಯೂಸ್‌ ಮೂಮೆಂಟ್‌ ಹೆಸರಿನ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದೆ.
ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟ್‌ ಆದಾಗಿನಿಂದ ಒಳ್ಳೆಯ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ. ಲಕ್ಷಾಂತರ ಮಂದಿ ವಿಡಿಯೊವನ್ನು ವೀಕ್ಷಿಸಿ, ಲೈಕ್‌ ಮಾಡಿದ್ದಾರೆ. “ಪೊಲೀಸರು ಇಷ್ಟು ಒಳ್ಳೆಯವರಾಗಿರುತ್ತಾರೆಯೇ?” ಎಂದು ಅನೇಕರು ಆಶ್ಚರ್ಯವನ್ನು ಹೊರಹಾಕಿದ್ದಾರೆ.