ಟರ್ಕಿ: ಪ್ರಾಣಿಗಳಿಗೆ ನಿಯತ್ತು ಜಾಸ್ತಿ ಎನ್ನುವ ಮಾತಿದೆ. ಮನುಷ್ಯ ಸಹಾಯವನ್ನು ಮರೆತುಬಿಡುತ್ತಾನೆ, ಆದರೆ ಪ್ರಾಣಿಗಳು ಎಂದಿಗೂ ಮರೆಯುವುದಿಲ್ಲ ಎನ್ನುವುದನ್ನು ಕೇಳಿರುತ್ತೀರಿ. ಅದಕ್ಕೆ ಸಾಕ್ಷಿಯಂತಿದೆ ಈ ವಿಡಿಯೊ. ಭೂಕಂಪನದಿಂದಾಗಿ ಉರುಳಿದ್ದ ಕಟ್ಟಡದಡಿಗೆ ಸಿಲುಕಿದ್ದ ಬೆಕ್ಕೊಂದು ತನ್ನನ್ನು ರಕ್ಷಿಸಿದ ವ್ಯಕ್ತಿಯ ತೋಳು ಬಿಡದ ವಿಶೇಷ ವಿಡಿಯೊ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ (Viral Video) ಆಗಿದೆ.
ಇದನ್ನೂ ಓದಿ: Viral Video: ಕರಾಚಿ ಪೊಲೀಸ್ ಮುಖ್ಯಸ್ಥರ ಕಚೇರಿಯನ್ನು ಅತಿಕ್ರಮಿಸಿದ್ದ ಐವರು ಟಿಟಿಪಿ ಉಗ್ರರ ಹತ್ಯೆಗೈದ ಪಾಕ್ ಭದ್ರತಾ ಪಡೆ
ಬೆಕ್ಕೊಂದು ವ್ಯಕ್ತಿಯ ತೋಳಿನ ಮೇಲೆ ಕುಳಿತಿದೆ. ಎಷ್ಟು ಹೊತ್ತಾದರೂ ತೋಳಿನಿಂದ ಇಳಿಯದ ಬೆಕ್ಕು ಆತನ ಮುಖದ ಹತ್ತಿರ ಮುಖ ತೆಗೆದುಕೊಂಡು ಹೋಗಿ ಪ್ರೀತಿ ಮಾಡುತ್ತದೆ. ಅಲ್ಲಿಯೇ ಕುಳಿತುಕೊಂಡು ಆತ ಮೈ ಸವರುವುದನ್ನು ಆನಂದಿಸಲಾರಂಭಿಸುತ್ತದೆ. ಈ ದೃಶ್ಯವಿರುವ ವಿಡಿಯೊವನ್ನು ಉಕ್ರೇನ್‌ನ ಆಂತರಿಕ ವ್ಯವಹಾರಗಳ ಸಚಿವರ ಸಲಹೆಗಾರರಾಗಿರುವ ಆಂಟನ್ ಗೆರಾಶ್ಚೆಂಕೊ ಅವರು ಟ್ವಿಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
36 ಸೆಕೆಂಡುಗಳಷ್ಟು ಕಾಲವಿರುವ ಈ ವಿಡಿಯೊವನ್ನು ಗುರುವಾರದಂದು ಹಂಚಿಕೊಳ್ಳಲಾಗಿದೆ. “ಟರ್ಕಿಯಲ್ಲಿ ಬೆಕ್ಕನ್ನು ಅವಶೇಷಗಳಡಿಯಿಂದ ರಕ್ಷಿಸಲಾಗಿದೆ. ಅದು ಈಗ ತನ್ನ ರಕ್ಷಕನ ತೋಳನ್ನು ಬಿಟ್ಟು ಹೋಗಲು ನಿರಾಕರಿಸುತ್ತಿದೆ” ಎಂದು ವಿಡಿಯೊಗೆ ಕ್ಯಾಪ್ಶನ್ ಕೊಡಲಾಗಿದೆ. ಈ ವಿಡಿಯೊ ಈಗಾಗಲೇ 2.4 ಕೋಟಿಗೂ ಅಧಿಕ ಮಂದಿಯಿಂದ ವೀಕ್ಷಿಸಲ್ಪಟ್ಟಿದೆ. ಲಕ್ಷಾಂತರ ಮಂದಿ ವಿಡಿಯೊವನ್ನು ಲೈಕ್ ಮಾಡಿದ್ದು, ಹಂಚಿಕೊಂಡಿದ್ದಾರೆ. “ಮನುಷ್ಯನಿಗಿಂತ ಪ್ರಾಣಿಯೇ ಲೇಸು” ಎಂದು ಕಾಮೆಂಟ್ ಮಾಡಲಾರಂಭಿಸಿದ್ದಾರೆ.