ಬೆಂಗಳೂರು: ಒಬ್ಬ ನಾಯಕನನ್ನು ಹಿಡಿಯಲು ಹಲವು ಖಳ ನಾಯಕರು ಮುಗಿ ಬೀಳುವುದು, ನಾಯಕ ಎಲ್ಲರಿಂದ ತಪ್ಪಿಸಿಕೊಳ್ಳುವುದನ್ನು ನೀವು ಕಮರ್ಷಿಯಲ್‌ ಚಿತ್ರಗಳಲ್ಲಿ ನೋಡಿರುತ್ತೀರಿ. ಅದು ರೀಲ್‌ ಕಥೆಯಾಯ್ತು. ಇದೀಗ ರಿಯಲ್‌ನಲ್ಲೂ ಅದೇ ರೀತಿಯ ಘಟನೆಯೊಂದು ನಡೆದಿದೆ. ಇಲ್ಲಿ ಹೀರೊ ಸ್ಥಾನದಲ್ಲಿ ಪಾರಿವಾಳ ಇದ್ದರೆ ಖಳ ನಾಯಕರ ಪಾತ್ರ ತೊಟ್ಟಿದ್ದು ಬೆಕ್ಕುಗಳು. ಸದ್ಯ ಈ ವಿಡಿಯೊ ವೈರಲ್‌ (Viral Video) ಆಗಿದ್ದು, ನೆಟ್ಟಿಗರ ಗಮನ ಸೆಳೆದಿದೆ.
ವಿಡಿಯೊದಲ್ಲಿ ಏನಿದೆ?
ಬೆಕ್ಕುಗಳು ತಮ್ಮ ಕುತೂಹಲಕಾರಿ ಮತ್ತು ತುಂಟ ಸ್ವಭಾವಕ್ಕೆ ಹೆಸರುವಾಸಿ. ಈ ನಡವಳಿಕೆಯೇ ಕೆಲವೊಮ್ಮೆ ಅವುಗಳನ್ನು ತೊಂದರೆಗೆ ಸಿಲುಕಿಸಿದರೆ ನಮ್ಮ ಮೊಗದಲ್ಲಿ ನಗು ತರಿಸುತ್ತವೆ. ಬೆಕ್ಕುಗಳು ಬೇಟೆಯಾಡುವುದು ಹೊಸತೇನಲ್ಲ. ಅದರಲ್ಲೂ ನಗರಗಳಲ್ಲಿ ಇವು ಹೆಚ್ಚಾಗಿ ಪಾರಿವಾಳಗಳ ಬೆನ್ನ ಹಿಂದೆ ಬೀಳುತ್ತವೆ. ಅದರಂತೆ ಇತ್ತೀಚೆಗೆ 3 ಬೆಕ್ಕುಗಳ ಗುಂಪೊಂದು ಕಾರಿನ ಮೇಲೆ ಕುಳಿತ ಪಾರಿವಾಳವನ್ನು ಹಿಡಿಯಲು ಹೋಗಿ ವಿಫಲವಾಗಿರುವ ದೃಶ್ಯ ಗಮನ ಸೆಳೆಯುತ್ತಿದೆ. ಪಾರಿವಾಳವೊಂದು ಕಾರಿನ ಮೇಲೆ ಕುಳಿತಿರುತ್ತದೆ. ನೆಲದ ಮೇಲಿದ್ದ 3 ಬೆಕ್ಕುಗಳು ಅದನ್ನು ಹಿಡಿಯಲು ಯತ್ನಿಸುತ್ತವೆ. ಸ್ವಲ್ಪ ಹೊತ್ತಿನ ಬಳಿಕ ಬೆಕ್ಕೊಂದು ಕಾರಿನ ಮೇಲೆ ಹತ್ತಿ ದಾಳಿ ಮಾಡಿಯೇ ಬಿಡುತ್ತದೆ. ಇನ್ನೇನು ಸಿಕ್ಕೇ ಬಿಡ್ತು ಎನ್ನುವಾಗ ಪಾರಿವಾಳ ಹಾರಿ ಹೋಗುತ್ತದೆ.
ಈ ವಿಡಿಯೊವನ್ನು ಈಗಾಗಲೇ 7 ಲಕ್ಷಕ್ಕಿಂತ ಅಧಿಕ ಮಂದಿ ವೀಕ್ಷಿಸಿದ್ದಾರೆ. ಹಲವರು ಕಮೆಂಟ್‌ ಮೂಲಕ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಬೆಕ್ಕುಗಳ ದುಃಸ್ಥಿತಿಯನ್ನು ನೋಡಿ ನೆಟ್ಟಿಗರು ಆಶ್ಚರ್ಯಚಕಿತರಾಗಿದ್ದಾರೆ. ಆ ಒಂದು ಬೆಕ್ಕಿನ ಕಾರಣದಿಂದಾಗಿ ಪಾರಿವಾಳ ತಪ್ಪಿಸಿಕೊಂಡಿತು ಎಂದು ಅನೇಕರು ಹೇಳಿದ್ದಾರೆ. “ಆ ಒಂದು ಬೆಕ್ಕು ಇಬ್ಬರ ಪ್ಲ್ಯಾನ್‌ ಹಾಳು ಮಾಡಿತುʼʼ ಎಂದು ಒಬ್ಬರು ಹೇಳಿದ್ದಾರೆ. ʼʼಎಲ್ಲ ಗುಂಪಿನಲ್ಲಿ ಅಂತಹ ಒಬ್ಬ ಸ್ನೇಹಿತ ಇದ್ದೇ ಇರುತ್ತಾನೆʼʼ ಎಂದು ಇನ್ನೊಬ್ಬರು ಹೇಳಿದ್ದಾರೆ. “2 ಮಂದಿ ಸಂಚು ರೂಪಿಸಿದರೆ ಕೇವಲ 1 ಬೆಕ್ಕು ಮಾತ್ರ ಸಾಹಸ ಮಾಡಲು ಮುಂದಾಯಿತುʼʼ ಎಂದು ಮಗದೊಬ್ಬರು ಕಮೆಂಟ್‌ ಮಾಡಿದ್ದಾರೆ. ʼʼಈ ಬೆಕ್ಕುಗಳು ಬೇಟೆಯಾಡಲೂ ಇನ್ನಷ್ಟು ಬಳಗಬೇಕಿದೆʼʼ ಎಂದು ಇನ್ನೊಬ್ಬರು ಹೇಳಿದ್ದಾರೆ.
ಬಾರ್ಬಿ ಗೊಂಬೆಯೊಂದಿಗೆ ಆಟವಾಡಿದ ಬೆಕ್ಕು
ಬೆಕ್ಕುಗಳು ಬೇಟೆಯಾಡುವ ಜತೆಗೆ ತಮ್ಮ ವರ್ತನೆಯ ಮೂಲಕವೂ ಗಮನ ಸೆಳೆಯುತ್ತವೆ. ಇತ್ತೀಚೆಗೆ ಬೆಕ್ಕು ಬಾರ್ಬಿ ಗೊಂಬೆಗಳೊಂದಿಗೆ ಆಟವಾಡುತ್ತಿರುವ ವಿಡಿಯೊ ಕೂಡ ವೈರಲ್‌ ಆಗಿದೆ. ಥೇಟ್‌ ಮಗುವಿನಂತೆಯೇ ಈ ಬೆಕ್ಕು ಗೊಂಬೆಯೊಂದಿಗೆ ವರ್ತಿಸಿದೆ. ಗೊಂಬೆಯನ್ನು ತಬ್ಬಿಕೊಂಡು ಮುದ್ದು ಕೂಡ ಮಾಡಿದೆ. ಹಲವರು ಈ ವಿಡಿಯೊವನ್ನು ನೋಡಿ ಅಚ್ಚರಿ ವ್ಯಕ್ತಪಡಿಸಿದ್ದರೆ, ಕೆಲವರು ಮೆಚ್ಚುಗೆ ಸೂಚಿಸಿದ್ದಾರೆ. ಅದ್ಭುತ ವಿಡಿಯೊ ಎಂದು ಹಲವರು ಶ್ಲಾಘಿಸಿದ್ದಾರೆ. ಈ ಬೆಕ್ಕು ಮನುಷ್ಯನ ರೀತಿಯೇ ವರ್ತಿಸುತ್ತದೆ ಎಂದು ಅನೇಕರು ಉದ್ಘರಿಸಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ ಮಾಡಲಾದ ಈ ವಿಡಿಯೊವನ್ನು 1.7 ಲಕ್ಷಕ್ಕಿಂತ ಅಧಿಕ ಮಂದಿ ವೀಕ್ಷಿಸಿದ್ದಾರೆ. ಒಟ್ಟಿನಲ್ಲಿ ಬೆಕ್ಕುಗಳು ಯಾವತ್ತೂ ಮಾನವನ ಗಮನ ಸೆಳೆಯುತ್ತವೆ ಎನ್ನಲು ಈ ಎರಡು ವಿಡಿಯೊಗಳೇ ಸಾಕು.
ಇದನ್ನೂ ಓದಿ: Viral Video: ಚಲಿಸುವ ಬೈಕ್‌ನಲ್ಲೇ ರೊಮಾನ್ಸ್‌ ಮಾಡಿ; ಬಳಿಕ ಹೋಗಿ ಫೈನ್‌ ಕಟ್ಟಿದ!