ನವದೆಹಲಿ: ದೆಹಲಿ ಮೆಟ್ರೋ ಆಗಾಗ ಸುದ್ದಿಯಾಗುತ್ತಿರುತ್ತದೆ. ಯಾರೋ ನೃತ್ಯ ಮಾಡಿದರು, ಯಾರೋ ಕಿತ್ತಾಡಿದರೋ, ಇನ್ಯಾರೋ ತೀರಾ ಚಿಕ್ಕ ಬಟ್ಟೆ ತೊಟ್ಟು ಬಂದು ನಾಚಿಕೆ ತರಿಸಿದರು ಎನ್ನುವ ಸುದ್ದಿಗಳನ್ನು ನೀವು ನೋಡಿರುತ್ತೀರಿ. ಇದೀಗ ಅದೇ ರೀತಿಯಲ್ಲಿ ಮತ್ತೊಬ್ಬ ಯುವತಿ ದೆಹಲಿ ಮೆಟ್ರೋದಲ್ಲಿ ಹಾಟ್‌ ಆಗಿ ಹೆಜ್ಜೆ ಹಾಕಿದ್ದು, ನೆಟ್ಟಿಗರ (Viral Video) ಕೆಂಗಣ್ಣಿಗೆ ಗುರಿಯಾಗಿದ್ದಾಳೆ.
ಪರಿ ಶರ್ಮಾ ಹೆಸರಿನ ಯುವತಿ ದೆಹಲಿಯ ಮೆಟ್ರೋದಲ್ಲಿ ನೃತ್ಯ ಮಾಡಿದ್ದಾಳೆ. ಬೂದು ಬಣ್ಣದ ಪ್ಯಾಂಟ್‌ ತೊಟ್ಟ ಆಕೆ ಅದಕ್ಕೆ ಕಪ್ಪು ಬಣ್ಣದ ನೆಟ್‌ ಟಾಪ್‌ ಹಾಕಿದ್ದಾಳೆ. ಆಕೆ ಮೆಟ್ರೋದಲ್ಲಿ ಇದ್ದಕ್ಕಿದ್ದಂತೆ ಹಿಂದಿಯ ಅಸ್ಸಲಾಮೆ ಇಶ್ಕ್‌ ಹಾಡಿಗೆ ಹೆಜ್ಜೆ ಹಾಕಲಾರಂಭಿಸುತ್ತಾಳೆ. ಅಕ್ಕ ಪಕ್ಕ ಇದ್ದವರೆಲ್ಲ ಒಮ್ಮೆ ಗಾಬರಿಯಾಗಿ ಆಕೆಯ ಕಡೆ ನೋಡುತ್ತಾರೆ. ಆಮೇಲೆ ಈ ಯುವಕರದ್ದು ಇದೇ ಗೋಳು ಎನ್ನುವಂತೆ ಮುಖ ತಿರುಗಿಸಿಕೊಳ್ಳುತ್ತಾರೆ. ಆಕೆಯ ಹಿಂದೆ ನಿಂತಿದ್ದ ವ್ಯಕ್ತಿ ಮಾತ್ರ ಪೂರ್ತಿ ನೃತ್ಯವನ್ನು ಗಾಬರಿಯಿಂದಲೇ ನೋಡುತ್ತಾನೆ.
ಇದನ್ನೂ ಓದಿ: Video Viral: ವಿದೇಶಿ ಯೂಟ್ಯೂಬರ್‌ನನ್ನು ಎಳೆದಾಡಿ ಹಲ್ಲೆ ಮಾಡಿದ ಪುಂಡ; ಅರ್ಧ ಗಂಟೆಯಲ್ಲೇ ಬಂಧನ
ಈ ವಿಡಿಯೊವನ್ನು ಪರಿ ಶರ್ಮಾ ಮೇ 21ರಂದು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾಳೆ. ಅಂದಿನಿಂದಿ ಇಂದಿನವರೆಗೆ ಈ ವಿಡಿಯೊ ಲಕ್ಷಾಂತರ ಮಂದಿಯಿಂದ ವೀಕ್ಷಣೆ ಪಡೆದುಕೊಂಡಿದೆ. 40 ಸಾವಿರಕ್ಕೂ ಅಧಿಕ ಮಂದಿ ಈ ವಿಡಿಯೊಗೆ ಲೈಕ್‌ ಮಾಡಿದ್ದಾರೆ. ಸಾಕಷ್ಟು ಮಂದಿ ವಿಡಿಯೊವನ್ನು ತಮ್ಮ ಸ್ನೇಹಿತರೊಂದಿಗೆ ಹಂಚಿಕೊಂಡಿದ್ದಾರೆ ಕೂಡ.
ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಮೆಟ್ರೋದಲ್ಲಿ ನೃತ್ಯ ಮಾಡಬಾರದು ಎಂದು ಎಷ್ಟು ಬಾರಿ ಎಚ್ಚರಿಸಿದರೂ ಜನರು ಹೀಗೆಯೇ ವರ್ತಿಸುತ್ತಿದ್ದಾರೆ ಎಂದು ನೆಟ್ಟಿಗರು ದೂರಲಾರಂಭಿಸಿದ್ದಾರೆ. ಕಾಮೆಂಟ್‌ನಲ್ಲಿ ದೆಹಲಿ ಪೊಲೀಸರು, ಮೆಟ್ರೋ ಅಧಿಕಾರಿಗಳನ್ನು ಟ್ಯಾಗ್‌ ಮಾಡಿ ಯುವತಿಯ ವಿರುದ್ಧ ಕ್ರಮ ತೆಗೆದುಕೊಳ್ಳಿ ಎಂದು ಹೇಳಲಾರಂಭಿಸಿದ್ದಾರೆ. ಇನ್ನು ಹಲವರು ಯುವತಿಯ ನೃತ್ಯ ಚೆನ್ನಾಗಿದೆ ಎಂದು ಮೆಚ್ಚುಗೆಯ ಮಾತುಗಳನ್ನೂ ಹೇಳುತ್ತಿದ್ದಾರೆ.