ಮುಂಬೈ: ನಟ ಶಾರುಖ್‌ ಖಾನ್‌ ನಟನೆಯ ʼಪಠಾಣ್‌ʼ ಸಿನಿಮಾ ಭಾರತ ಮಾತ್ರವಲ್ಲದೆ ವಿಶ್ವದ 100ಕ್ಕೂ ಅಧಿಕ ರಾಷ್ಟ್ರಗಳಲ್ಲಿ ಬಿಡುಗಡೆಯಾಗಿ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಶಾರುಖ್‌ ಅಭಿಮಾನಿಗಳಂತೂ ನಾಲ್ಕು ವರ್ಷದ ನಂತರ ನೆಚ್ಚಿನ ನಟನನ್ನು ಹಿರಿತೆರೆ ಮೇಲೆ ನೋಡಿರುವ ಸಂತಸದಲ್ಲಿದ್ದಾರೆ. ಭಾರತದಲ್ಲಿರುವ ಅಭಿಮಾನಿಗಳ ಸಂಭ್ರಮವೇನೋ ಸಾಮಾನ್ಯವೆನ್ನಬಹುದು. ಆದರೆ ಜರ್ಮನಿಯಲ್ಲಿ ಜರ್ಮನಿ ಮಹಿಳೆಯೊಬ್ಬರು ಥಿಯೇಟರ್‌ ಒಳಗೆ ಪಠಾಣ್‌ ಸಿನಿಮಾದ ಹಾಡಿಗೆ ಹುಚ್ಚೆದ್ದು ಕುಣಿದಿದ್ದಾರೆ. ಆ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ (Viral Video) ಆಗಿದೆ.
ಇದನ್ನೂ ಓದಿ: viral video: ಮಕ್ಕಳಿಂದಲೇ ಶಾಲೆಯ ಶೌಚಾಲಯ ಸ್ವಚ್ಛಗೊಳಿಸಿದ ಹನೂರಿನ ಕೌದಳ್ಳಿ ಸರ್ಕಾರಿ ಶಾಲೆ ಶಿಕ್ಷಕರು
ಥಿಯೇಟರ್‌ನ ತೆರೆ ಮೇಲೆ ಪಠಾಣ್‌ ಸಿನಿಮಾದ ʼಜೂಮೆ ಜೋ ಪಠಾಣ್‌ʼ ಹಾಡು ಪ್ರಸಾರವಾಗುತ್ತಿದೆ. ತೆರೆಯ ಮುಂದೆಯೇ ನಿಂತ ಮಹಿಳೆ ಆ ಹಾಡಿಗೆ ಮನಸ್ಸು ಬಿಚ್ಚಿ ಹೆಜ್ಜೆ ಹಾಕುತ್ತಿದ್ದಾರೆ. ಹಾಡಿನ ಹುಕ್‌ ಅಪ್‌ ಸ್ಟೆಪ್‌ ಅನ್ನು ಚಾಚೂ ತಪ್ಪದೆ ಕುಣಿಯುತ್ತಿದ್ದಾರೆ. ಇಂತದ್ದೊಂದು ವಿಡಿಯೊವನ್ನು ನೆಟ್ಟಿಗರೊಬ್ಬರು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದು, “ಭಾರತವನ್ನು ಬಿಟ್ಟುಬಿಡಿ, ಜರ್ಮನಿಯ ಜನರೂ ಕೂಡ ಪಠಾಣ್‌ ನೋಡಿ ಖುಷಿಯಲ್ಲಿ ಕುಣಿಯಲಾರಂಭಿಸಿದ್ದಾರೆ” ಎಂದು ಬರೆದುಕೊಂಡಿದ್ದಾರೆ.
13 ಸೆಕೆಂಡುಗಳ ಈ ವಿಡಿಯೊವನ್ನು ಶುಕ್ರವಾರದಂದು ಟ್ವಿಟರ್‌ನಲ್ಲಿ ಹಂಚಿಕೊಳ್ಳಲಾಗಿದ್ದು, ವಿಡಿಯೊ ಒಂದೇ ದಿನದಲ್ಲಿ ಲಕ್ಷಾಂತರ ಜನರಿಂದ ವೀಕ್ಷಣೆ ಪಡೆದುಕೊಂಡಿದೆ. ಸಾವಿರಾರು ಮಂದಿ ವಿಡಿಯೊಗೆ ಮೆಚ್ಚುಗೆಯ ಕಾಮೆಂಟ್‌ಗಳನ್ನು ಮಾಡಲಾರಂಭಿಸಿದ್ದಾರೆ. ಸಿನಿಮಾದ ಅಂತ್ಯದಲ್ಲಿ ಬರುವ ಈ ಹಾಡಿಗೆ ಗಾಯಕರಾಗಿರುವ ಅರಿಜಿತ್ ಸಿಂಗ್, ಸುಕೃತಿ ಕಾಕರ್, ವಿಶಾಲ್ ದದ್ಲಾನಿ ಮತ್ತು ಶೇಖರ್ ರಾವ್ಜಿಯಾನಿ ಧ್ವನಿ ನೀಡಿದ್ದಾರೆ. ಈ ಟ್ರೆಂಡಿಂಗ್‌ ಹಾಡನ್ನು ಕುಮಾರ್ ಬರೆದಿದ್ದಾರೆ.