ಬೆಂಗಳೂರು: ಕ್ರೀಡಾಕೂಟಗಳನ್ನು ನೋಡುವವರಿಗೆ ಅದರಲ್ಲಿ ಪ್ರಶಸ್ತಿ ಪ್ರದಾನ ಮಾಡುವ ಪರಿಚಯವಿರುತ್ತದೆ. ಪೋಡಿಯಂ ಮೇಲೆ ಮೂವರು ವಿಜೇತರನ್ನು ನಿಲ್ಲಿಸಿ ಅವರ ಕೊರಳಿಗೆ ಪದಕವನ್ನು ಹಾಕಲಾಗುತ್ತದೆ. ಮೊದಲ ಸ್ಥಾನ ಗೆದ್ದವರಿಗೆ ಚಿನ್ನ, ಎರಡನೇ ಸ್ಥಾನ ಗೆದ್ದವರಿಗೆ ಬೆಳ್ಳಿ ಮತ್ತು ಮೂರನೇ ಸ್ಥಾನ ಗೆದ್ದವರಿಗೆ ಕಂಚಿನ ಪದಕ ಹಾಕಿ ಸನ್ಮಾನಿಸಲಾಗುತ್ತದೆ. ಆದರೆ ಇಲ್ಲಿ ಮಾತ್ರ ಮೂರನೇ ಸ್ಥಾನ ಗೆದ್ದವರಿಗೇ ಚಿನ್ನ (Viral Video) ಪದಕ ನೀಡಲಾಗಿದೆ.
ಹೌದು. ಅದೊಂದು ಕ್ರೀಡಾಕೂಟದ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಯುತ್ತಿರುತ್ತದೆ. ಆಗ ಪ್ರಶಸ್ತಿ ಪ್ರದಾನ ಮಾಡುವವರು ಬಂದು ಮೂರನೇ ಸ್ಥಾನ ಗೆದ್ದಿರುವ ಕ್ರೀಡಾಪಟುವಿನ ಕೊರಳಿಗೆ ಚಿನ್ನದ ಪದಕವನ್ನು ಹಾಕುತ್ತಾರೆ. ಅದು ಚಿನ್ನದ ಪದಕ ಎಂದು ತಿಳಿಯದ ಕ್ರೀಡಾಪಟು ಪದಕ ಗೆದ್ದ ಸಂತಸವನ್ನು ಸಂಭ್ರಮಿಸುತ್ತಿರುತ್ತಾರೆ. ಅಷ್ಟರಲ್ಲಿ ಆಕೆಯ ಪಕ್ಕ ನಿಂತಿದ್ದ ಇನ್ನಿಬ್ಬರು ಕ್ರೀಡಾಪಟುಗಳು “ಅದು ಕಂಚಿನ ಪದಕವಲ್ಲ, ಚಿನ್ನದ್ದು” ಎಂದು ಆ ಕ್ರೀಡಾಪಟುವಿಗೆ ಮನವರಿಕೆ ಮಾಡುತ್ತಾರೆ.
ಇದನ್ನೂ ಓದಿ: Viral News : ನಿಮ್ಮ ಕಣ್ಣಿಗೊಂದು ಸವಾಲು: ಈ ಚಿತ್ರದಲ್ಲಿ ವಿಶೇಷವಾಗಿರುವ ಕೈ ಗುರುತಿಸಿ
ಆಗ ಆ ಕ್ರೀಡಾಪಟು ತನ್ನ ಕೊರಳಿಗೆ ಹಾಕಲಾಗಿದ್ದ ಪದಕವನ್ನು ತೆಗೆದು ತಾನೇ ಮೊದಲ ಸ್ಥಾನದಲ್ಲಿದ್ದ ಕ್ರೀಡಾಪಟುವಿನ ಕೊರಳಿಗೆ ಹಾಕುತ್ತಾರೆ. ಆಗ ಮೂವರೂ ಸಂಭ್ರಮಿಸಲಾರಂಭಿಸುತ್ತಾರೆ.
ಈ ದೃಶ್ಯವಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. ದಿ ಫಿಗೆನ್‌ ಹೆಸರಿನ ಟ್ವಿಟರ್‌ ಖಾತೆಯಲ್ಲಿ ಈ ವಿಡಿಯೊ ಹಂಚಿಕೊಳ್ಳಲಾಗಿದೆ. ಈ ವಿಡಿಯೊ ನೋಡಿರುವ ನೆಟ್ಟಿಗರು ಅದಕ್ಕೆ ತಮ್ಮದೇ ಆದ ವ್ಯಾಖ್ಯಾನಗಳನ್ನು ಬರೆಯಲಾರಂಭಿಸಿದ್ದಾರೆ. “ಮೂರನೇ ಸ್ಥಾನ ಗೆದ್ದ ಕ್ರೀಡಾಪಟು ಇನ್ನಿಬ್ಬರು ಕ್ರೀಡಾಪಟುಗಳಿಗಿಂತ ಅಂದವಾಗಿದ್ದಳು. ಹಾಗಾಗಿ ಆತ ಆಕೆಗೇ ಚಿನ್ನದ ಪದಕ ಹಾಕಿಬಿಟ್ಟಿದ್ದಾನೆ. ಬೇರೆ ಯಾರನ್ನೂ ನೋಡಿಯೇ ಇಲ್ಲ” ಎಂದು ಕೆಲವರು ಹೇಳಲಾರಂಭಿಸಿದ್ದಾರೆ. “ಪದಕ ಪ್ರದಾನಿಸಿದವರು ಮನೆಯಲ್ಲಿ ಹೆಂಡತಿ ಜತೆ ಜಗಳ ಆಡಿಕೊಂಡು ಬಂದಿರಬೇಕು. ಹಾಗಾಗಿ ಅವರಿಗೆ ತಾವೇನು ಮಾಡುತ್ತಿದ್ದೇವೆ ಎಂದೇ ಗೊತ್ತಾಗಿಲ್ಲ” ಎಂದು ಇನ್ನು ಕೆಲವರು ಹೇಳಿದ್ದಾರೆ. “ಆಕೆಯೇ ಅವನ ಫೇವರಿಟ್‌” ಎಂದು ಕೆಲವರು ಚರ್ಚಿಸಲಾರಂಭಿಸಿದ್ದಾರೆ.