ಲಕ್ನೋ: ಆಸ್ತಿ, ಹಣದ ಮೇಲಿನ ವ್ಯಾಮೋಹ ಮನುಷ್ಯನನ್ನು ಎಂತಹ ದುಷ್ಕೃತ್ಯಕ್ಕಾದರೂ ಎಳೆದುಕೊಂಡು ಹೋಗುತ್ತದೆ. ಅದಕ್ಕೆ ಸಾಕ್ಷಿ ಎನ್ನುವಂತಹ ವಿಡಿಯೊವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ವೈರಲ್‌ (Viral Video) ಆಗಿದೆ.
ಇದನ್ನೂ ಓದಿ: Viral News : ಹುಷಾರಿಲ್ಲವೆಂದು ಸುಳ್ಳು ಹೇಳಿ ರಜೆ ತೆಗೆದುಕೊಳ್ಳುವುದೂ ಕಷ್ಟವೇ! ನಿಮ್ಮ ಆರೋಗ್ಯವನ್ನು ಅಳೆಯುತ್ತದೆ ಈ ಎಐ
ವೃದ್ಧೆಯೊಬ್ಬರ ಶವವನ್ನು ಕಾರಿನ ಹಿಂಬದಿಯ ಸೀಟಿನಲ್ಲಿ ಮಲಗಿಸಲಾಗಿದೆ. ಮಧ್ಯ ವಯಸ್ಸಿನ ವ್ಯಕ್ತಿಯೊಬ್ಬರು ಆ ವೃದ್ಧೆಯ ಶವದ ಕೈ ಬೆರಳಿಗೆ ಇಂಕು ಹಚ್ಚಿಸಿ, ಅದನ್ನು ದಾಖಲೆ ಪತ್ರಗಳ ಮೇಲೆ ಒತ್ತಿಸಿಕೊಳ್ಳುತ್ತಿದ್ದಾರೆ. ಹಲವು ದಾಖಲೆಗಳಿಗೆ ಇದೇ ರೀತಿಯಲ್ಲಿ ಮೋಸದಿಂದ ಬೆರಳಚ್ಚು ಹಾಕಿಸಿಕೊಳ್ಳುತ್ತಾರೆ. ಇಂತಹ ದೃಶ್ಯವಿರುವ ವಿಡಿಯೊ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ.
ಅಂದ ಹಾಗೆ ಈ ವಿಡಿಯೊ ಉತ್ತರ ಪ್ರದೇಶದ ಆಗ್ರಾ ನಗರದ್ದು ಎಂದು ಹೇಳಲಾಗಿದೆ. ವಿಡಿಯೊದಲ್ಲಿರುವ ವ್ಯಕ್ತಿ ಆಸ್ತಿಯ ಆಸೆಗೆ ಸತ್ತ ಅಜ್ಜಿಯನ್ನೇ ಆಸ್ಪತ್ರೆಗೆ ಕರೆದುಕೊಂಡು ಹೋಗುವ ನೆಪ ಹೇಳಿ ಕಾರಿನಲ್ಲಿ ಕರೆತಂದಿದ್ದಾರೆ. ಅಲ್ಲಿ ಅವರಿಂದ ಬೆರಳಚ್ಚು ಪಡೆದಿದ್ದಾರೆ. ಅವರು ಬೆರಳಚ್ಚು ಪಡೆದಿದ್ದು ಅಜ್ಜಿಯ ವಿಲ್‌ ಮೇಲೆ ಎಂದು ಹೇಳಲಾಗಿದೆ.
ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗುತ್ತಿದ್ದಂತೆಯೇ ಜನರು ಆ ವ್ಯಕ್ತಿಯ ಮೇಲೆ ರೊಚ್ಚಿಗೆದ್ದಿದ್ದಾರೆ. ಮೋಸ ಮಾಡುತ್ತಿರುವ ಆ ವ್ಯಕ್ತಿ ಮೇಲೆ ಕಠಿಣ ಕ್ರಮ ತೆಗೆದುಕೊಳ್ಳಬೇಕೆಂದು ಉತ್ತರ ಪ್ರದೇಶ ಪೊಲೀಸರಲ್ಲಿ ಮನವಿ ಮಾಡಲಾರಂಭಿಸಿದ್ದಾರೆ.