ಬೆಂಗಳೂರು: ದೇಹಕ್ಕೆ ವ್ಯಾಯಾಮ ಅತಿ ಮುಖ್ಯ. ಅದಕ್ಕೆಂದೇ ಹಲವರು ಯೋಗ ಮಾಡುತ್ತಾರೆ, ಇನ್ನು ಕೆಲವರು ಜಿಮ್‌ಗಳಿಗೆ ತೆರಳಿ ದೇಹ ದಂಡಿಸುತ್ತಾರೆ. ಜಿಮ್‌ಗಳಿಗೆ ಹೋಗುವವರಿಗೆ ಪುಷ್‌ ಅಪ್‌ ಮಾಮೂಲು. ಅದೇ ರೀತಿ ಇಲ್ಲೊಬ್ಬ ವ್ಯಕ್ತಿ ಪುಷ್‌ ಅಪ್‌ ಮಾಡುತ್ತಿದ್ದಾನೆ. ಆದರೆ ಈ ಪುಷ್‌ ಅಪ್‌ ಅನೇಕರಿಗೆ ಹಾಸ್ಯವೆನಿಸಿದ್ದರೆ ಹಲವರಿಗೆ ಸಿಟ್ಟು ತರಿಸಿದೆ. ಈ ಪುಷ್‌ಅಪ್‌ನ ವಿಡಿಯೊ ಕೂಡ ವೈರಲ್‌ (Viral Video) ಆಗಿದೆ.
ಸಾಮಾನ್ಯವಾಗಿ ಯಾವುದಾದರೂ ನಗರಗಳಿಗೆ ಹೋಗಬೇಕೆಂದರೆ ಆ ನಗರಕ್ಕೆ ಮೊದಲೇ ಈ ನಗರಕ್ಕೆ ಸ್ವಾಗತ ಎನ್ನುವಂತಹ ದೊಡ್ಡದೊಂದು ನಾಮಫಲಕ(ಸೈನ್‌ ಬೋರ್ಡ್‌) ಹಾಕಲಾಗಿರುತ್ತದೆ. ಆ ಸೈನ್‌ ಬೋರ್ಡ್‌ ಅನ್ನು ಹತ್ತಬೇಕು ಎಂದು ನೀವು ಎಂದಾದರೂ ಯೋಚನೆ ಮಾಡಿದ್ದೀರಾ? ಅಂತಹ ಯೋಚನೆಗಳೂ ತಲೆಗೆ ಬಂದಿರುವುದಿಲ್ಲ ಅಲ್ಲವೇ. ಆದರೆ ಇಲ್ಲಿ ವ್ಯಕ್ತಿಯೊಬ್ಬ ಅದೇ ಸೈನ್‌ ಬೋರ್ಡ್‌ ಅನ್ನು ಹತ್ತಿದ್ದಾನೆ. ಹತ್ತಿರುವುದು ಮಾತ್ರವಲ್ಲದೆ ಅದರ ಮೇಲೆ ನಿಂತು ಪುಷ್‌ ಅಪ್‌ ಅನ್ನೂ ಮಾಡುತ್ತಿದ್ದಾನೆ.
ಇದನ್ನೂ ಓದಿ: Video Viral: ಮುಗಿಯದ ʼಶಕ್ತಿʼ ಹುಚ್ಚಾಟ; ಸಾರಿಗೆ ಸಿಬ್ಬಂದಿಗೆ ಪೀಕಲಾಟ! ಸೀಟು ಇಲ್ಲ ಎಂದ ಕಂಡಕ್ಟರ್‌ಗೆ ಏಟು!
ಈ ದೃಶ್ಯವಿರುವ ವಿಡಿಯೊವನ್ನು ಸಂಬಲ್‌ಪುರಿ ಮಹಾನಿ ಹೆಸರಿನ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ. ಏಪ್ರಿಲ್‌ 30ರಂದು ಹಂಚಿಕೊಳ್ಳಲಾಗಿರುವ ಈ ವಿಡಿಯೊ ಲಕ್ಷಾಂತರ ಜನರಿಂದ ವೀಕ್ಷಣೆ ಪಡೆದುಕೊಂಡಿದೆ. ಹಾಗೆಯೇ 59 ಸಾವಿರಕ್ಕೂ ಅಧಿಕ ಮಂದಿ ವಿಡಿಯೊಗೆ ಲೈಕ್‌ ಮಾಡಿದ್ದಾರೆ.
ಈ ವಿಡಿಯೊಗೆ ಹಲವಾರು ರೀತಿಯ ಕಾಮೆಂಟ್‌ಗಳ ಸುರಿಮಳೆಯೇ ಸುರಿದುಬಂದಿದೆ. “ಭಾನುವಾರ ಜಿಮ್‌ ಮುಚ್ಚಿರುತ್ತದೆ. ಹಾಗಾಗಿ ಈತ ಸೈನ್‌ ಬೋರ್ಡ್‌ ಅನ್ನೇ ತನ್ನ ಜಿಮ್‌ ಮಾಡಿಕೊಂಡುಬಿಟ್ಟಿದ್ದಾನೆ”, “ಜಿಮ್‌ ಬಗ್ಗೆ ಎರಡು ಮೋಟಿವೇಷನಲ್‌ ವಿಡಿಯೊ ನೋಡಿದರೆ ಎಫೆಕ್ಟ್‌ ಇದು” ಎನ್ನುವಂತಹ ಹಲವಾರು ಹಾಸ್ಯಮಯ ಕಾಮೆಂಟ್‌ಗಳು ವಿಡಿಯೊಗೆ ಬಂದಿವೆ. ಅದೇ ರೀತಿಯಲ್ಲಿ ಸಾರ್ವಜನಿಕ ಆಸ್ತಿಯನ್ನು ಈ ರೀತಿ ದುರುಪಯೋಗ ಮಾಡಿಕೊಂಡವರ ವಿರುದ್ಧ ಶಿಕ್ಷೆಯಾಗಬೇಕು ಎನ್ನುವ ಗಂಭೀರ ಆರೋಪಗಳೂ ಕಾಮೆಂಟ್‌ನಲ್ಲಿ ಕೇಳಿಬಂದಿವೆ. ಅನೇಕರು ಈ ಹುಡುಗಾಟಕ್ಕೆ ಬೈದಿದ್ದಾರೆ ಕೂಡ.