ಇಸ್ಲಾಮಾಬಾದ್: ರಾಜಮೌಳಿ ನಿರ್ದೇಶನದ ಆರ್.ಆರ್.ಆರ್ ಸಿನಿಮಾ ಈಗಾಗಲೇ ಹಲವಾರು ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದೆ. ಸಿನಿಮಾದ ನಾಟು ನಾಟು ಹಾಡಂತೂ ಎಲ್ಲರ ಮೆಚ್ಚಿನ ಹಾಡಾಗಿ, ವೈರಲ್ ಆಗಿದೆ. ಈ ಹಾಡಿಗೆ ಸಾಮಾನ್ಯ ಜನರಿಂದ ಹಿಡಿದು ಸೆಲೆಬ್ರಿಟಿಗಳವರೆಗೆ ಎಲ್ಲರೂ ಹೆಜ್ಜೆ ಹಾಕಿರುವವರೇ. ಈ ಹಾಡಿನ ಪ್ರಸಿದ್ಧತೆ ಎಷ್ಟರ ಮಟ್ಟಿಗೆ ಹೆಚ್ಚಿದೆ ಎಂದರೆ ಪಾಕಿಸ್ತಾನ ಪ್ರಸಿದ್ಧ ನಟಿ ಕೂಡ ಮದುವೆ ಕಾರ್ಯಕ್ರಮವೊಂದರಲ್ಲಿ ಇದೇ ಹಾಡಿಗೆ ಹೆಜ್ಜೆ ಹಾಕಿದ್ದಾರೆ. ಆ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ (Viral Video) ಆಗಿದೆ ಕೂಡ.
ಇದನ್ನೂ ಓದಿ: Viral Video: ಅಮೆರಿಕ ಅಧ್ಯಕ್ಷ ಬೈಡೆನ್ ಎನ್ನುವ ಬದಲು ಅಧ್ಯಕ್ಷ ಒಬಾಮಾ ಎಂದ ವೈಟ್ಹೌಸ್ ಮಾಧ್ಯಮ ಕಾರ್ಯದರ್ಶಿ
ಪಾಕಿಸ್ತಾನದ ನಟಿ ಹನಿಯಾ ಅಮಿರ್ ಈಗ ನಾಟು ನಾಟು ಹಾಡಿಗೆ ಹೆಜ್ಜೆ ಕುಣಿಸಿರುವ ನಟಿ. ಮದುವೆ ಕಾರ್ಯಕ್ರಮವೊಂದರಲ್ಲಿ ನಟಿ ಈ ಹಾಡಿಗೆ ನೃತ್ಯ ಮಾಡಿದ್ದಾರೆ. ಅವರಿಗೆ ಇನ್ನೊಬ್ಬ ಯುವಕ ಸಾಥ್ ನೀಡಿದ್ದಾರೆ. ನಾಟು ನಾಟು ಹಾಡಿನ ಹುಕ್ ಅಪ್ ಸ್ಟೆಪ್ ಅನ್ನೂ ಈ ಜೋಡಿ ಹಾಕಿರುವುದನ್ನು ವಿಡಿಯೊದಲ್ಲಿ ಕಾಣಬಹುದು. ಹಾಗೆಯೇ ಕಾರ್ಯಕ್ರಮದಲ್ಲಿ ಪಾಕಿಸ್ತಾನದ ನಟ ಸಬೂರ್ ಅಲಿ ಅವರೂ ಇರುವುದನ್ನು ಕಾಣಬಹುದಾಗಿದೆ.
ನಟಿಯ ನೃತ್ಯದ ವಿಡಿಯೊವನ್ನು ದಿ ವೆಡ್ಡಿಂಗ್ ಬ್ರಿಡ್ಜ್ ಹೆಸರಿನ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ. ವಿಡಿಯೊ ಸಾವಿರಾರು ಮಂದಿಯಿಂದ ವೀಕ್ಷಣೆ ಪಡೆದಿದೆ. ಸಾವಿರಾರು ಮಂದಿ ವಿಡಿಯೊಗೆ ಲೈಕ್ ಮಾಡಿದ್ದಾರೆ ಕೂಡ. “ಅಬ್ಬಬ್ಬಾ, ನೃತ್ಯ ನೋಡಿದರೆ ವೇದಿಕೆಯೇ ಮುರಿಯುತ್ತದೆ ಎನಿಸುತ್ತಿದೆ. ಎಷ್ಟೊಂದು ಎನರ್ಜಿ ಇವರಿಬ್ಬರಿಗೆ” ಎಂದು ಜನರು ಕಮೆಂಟ್ ಮಾಡಲಾರಂಭಿಸಿದ್ದಾರೆ.
ಹನಿಯಾ ಅವರು ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ಆಗಾಗ ಭಾರತದ ಬಗ್ಗೆ ತಮಗಿರುವ ಪ್ರೀತಿಯನ್ನು ಹೊರಹಾಕುತ್ತಿರುತ್ತಾರೆ. ಇತ್ತೀಚೆಗೆ ಅವರು ತಮ್ಮ ಸ್ನೇಹಿತರೊಂದಿಗೆ ನಾಟು ನಾಟು ಹಾಡಿನ ಹುಕ್ ಅಪ್ ಸ್ಟೆಪ್ ಮಾಡಿದ ವಿಡಿಯೊವನ್ನು ಸಹ ಹಂಚಿಕೊಂಡಿದ್ದರು.